2 Reeaghyn 14 - Yn Vible Casherick 1775 1819

CAB. XIV

¹ Ayns y nah vleïn jeh Joash, mac Jehoahaz ree Israel, ren Amaziah, mac Joash ree Yudah, reill.

² V’eh queig bleeaney as feed dy eash tra ghow eh toshiaght dy reill, as reill eh nuy bleeaney as feed ayns Jerusalem: ennym e voir va Jehoaddan jeh Jerusalem.

³ As ren eh shen ny va cairagh ayns shilley’n Chiarn, ny-yeih, cha nee myr David e ayr: deiyr eh ayns dy chooilley nhee er cliaghtaghyn Joash e ayr.

⁴ Ny-yeih, cha row ny ard-ynnydyn treigit: ren y pobble foast chebbal oural as lostey incense er ny ynnydyn ardey.

⁵ As haink eh gy-kione, cha leah’s v’eh er ny hickyraghey ayns y reeriaght, dy dug eh gy-baase e vooinjer v’er varroo’n ree e ayr.

⁶ Agh cloan ny dunveryn cha dug eh gy-baase: cordail rish shen ny ta scruit ayns lioar leigh Voses, ayn hug y Chiarn sarey, gra, Cha bee ny ayraghyn er nyn goyrt gy-baase son y chloan, ny’n chloan er nyn goyrt gy-baase son ny ayraghyn; agh bee dy chooilley ghooinney er ny choyrt gy-baase son e loght hene.

⁷ Varr eh jeh Edom jeih thousaneyn, ayns y ghlione-sollan, as ghow eh Selah ayns caggey, as ren eh genmys eh Joktheel, gys y laa t’ayn jiu.

⁸ Eisht hug Amaziah chaghteryn gys Jehoash, mac Jehoahaz, mac Jehu ree Israel, gra, Tar, lhig dooin jeeaghyn y cheilley ’syn eddin.

⁹ As hug Jehoash ree Israel fys gys Amaziah ree Yudah, gra, Hug yn onnane v’ayns Lebanon chaghteraght gys y cedar v’ayns Lebanon, gra, Cur dty inneen da my vac son ben: as hie baagh oaldey v’ayns Lebanon shaghey, as stamp eh fo-chosh yn onnane.

¹⁰ T’ou uss dy jarroo er woalley Edom, as ta dty chree er dty hroggal seose; jean boggyssagh son shoh, as fuirree ec y thie; son cre’n-fa yinnagh oo roie ayns dangere, oo-hene dy huittym ayns caggey, as Judah mayrt?

¹¹ Agh cha n’eaishtagh Amaziah: Shen-y-fa hie Jehoash ree Israel seose; as hug eshyn as Amaziah ree Yudah eddin yn derrey yeh da’n jeh elley ec Beth-shemesh, va bentyn da Judah.

¹² As hooar Judah yn chooid smessey veih Israel; as ren dy chooilley ghooinney chea gys e chabbane.

¹³ As ghow Jehoash ree Israel Amaziah ree Yudah, mac Jehoash, mac Ahaziah, ec Beth-shemesh, as haink eh gys Jerusalem, as vrish eh sheese jeh voalley Yerusalem, veih giat Ephraim gys y yiat corneilagh, kiare cheead cubit er lhiurid.

¹⁴ As gow eh ooilley’n airh, as yn argid, as ooilley ny siyn v’er ny gheddyn ayns thie’n Chiarn, as ayns tashtaghyn thie’n ree, as raanteenyn, as hyndaa eh reesht gys Samaria.

¹⁵ Nish y chooid elley jeh obbraghyn Jehoash, as e niart, as kys ren eh caggey rish Amaziah ree Yudah, nagh vel ad scruit ayns lioar recortyssyn reeaghyn Israel?

¹⁶ As chaddil Jehoash marish e ayraghyn, as v’eh oanluckit ayns Samaria marish reeaghyn Israel; as ren Jeroboam e vac reill ny ynnyd.

¹⁷ As va Amaziah, mac Joash ree Yudah, bio lurg baase Jehoash, mac Jehoahaz ree Israel, queig bleeaney jeig.

¹⁸ As y chooid elley jeh obbraghyn Amaziah, nagh vel ad scruit ayns lioar recortyssyn reeaghyn Yudah?

¹⁹ Nish dirree ad magh n’oï ayns Jerusalem: as chossyn eh roish gys Lachish; agh hie ad er e eiyrt’s gys Lachish, as varr ad eh ayns shen.

²⁰ As hug ad lhieu eh lesh cabbil; as v’eh oanluckit ec Jerusalem marish e ayraghyn, ayns ard-valley Ghavid.

²¹ As ghow ooilley pobble Yudah Azariah, (va shey bleeaney jeig dy eash,) as ren ad eh yn ree ayns ynnyd e ayr Amaziah.

²² Hrog eh Elath, as hug eh eh reesht da Judah: lurg shen chaddil eh marish e ayraghyn.

²³ Ayns y wheiggoo vleïn jeig jeh Amaziah, mac Joash ree Yudah, ghow Jeroboam, mac Joash ree Israel, toshiaght dy reill ayns Samaria, as ren eh reill un vleïn as da-eed.

²⁴ As ren eh shen ny va olk ayns shilley’n Chiarn; cha ren eh treigeil ooilley peccaghyn Yeroboam mac Nebat, hayrn Israel gys peccah.

²⁵ Ren eh seose ardjyn Israel veih cagliagh Hamath gys keayn y strah, cordail rish raa’n Chiarn Jee Israel, loayr eh liorish shirveish e harvaant Jonah, mac Amittai, yn phadeyr, va jeh Gath-hepher.

²⁶ Son honnick y Chiarn seaghyn Israel, dy row ad feer dewil: son cha row couyr erbee faagit sthie ny mooie, ny cooneyder son Israel.

²⁷ Agh cha dooyrt y Chiarn dy jinnagh eh dolley ass ennym Israel veih fo niau: agh haue eh ad liorish laue Yeroboam mac Yoash.

²⁸ Nish y chooid elley jeh obbraghyn Yeroboam, as ooilley ny ren eh, as e niart, kys ren eh caggey, as kys chossyn eh reesht da Israel Damascus, as Hamath, ta bentyn da Judah, nagh vel ad scruit ayns lioar recortyssyn reeaghyn Israel?

²⁹ As chaddil Jeroboam marish e ayraghyn, eer marish reeaghyn Israel: as ren Zechariah e vac reill ’syn ynnyd echey.