2 Reeaghyn 13 - Yn Vible Casherick 1775 1819

CAB. XIII

¹ Ayns y trass vleïn as feed jeh Joash, mac Ahaziah ree Yudah, ghow Jehoahaz mac Jehu toshiaght dy reill harrish Israel ayns Samaria, as reill eh shiaght bleeaney jeig.

² As ren eh shen ny va olk ayns shilley’n Chiarn, as deiyr eh er peccaghyn Yeroboam mac Nebat, v’er hayrn Israel gys peccah; cha hreig eh ad.

³ As va jymmoose y Chiarn er ny vrasnaghey noi Israel; as livrey eh ad gys laue Hazael ree Syria, as gys laue Ben-hadad mac Hazael, ooilley nyn laghyn.

⁴ As ren Jehoahaz e accan gys y Chiarn, as ren y Chiarn geaishtagh rish: son honnick eh seaghyn Israel, er-yn-oyr dy ren ree Syria tranlaase orroo.

⁵ (As hug y Chiarn livreyder da Israel, ren ad y hauail veih laue ny Syrianee: as va cloan Israel ec shee ayns ny cabbaneyn oc, myr v’ad roïe.

⁶ Ny-yeih cha ren ad scarrey rish peccaghyn thie Yeroboam, hayrn Israel fo peccah, agh jimmee ad ayndoo: as va keyll ny jallooyn ny hassoo myrgeddin ayns Samaria.)

⁷ Chamoo daag eh jeh’n pobble da Jehoahaz, agh jeih markee as da-eed, as jeih fainee, as jeih thousane coshee; son va ree Syria er stroie ad, as er woalley ad myr joan y laare-vooie.

⁸ Nish y chooid elley jeh obbraghyn Jehoahaz, as ooilley ny ren eh, as e niart, nagh vel ad scruit ayns lioar recortyssyn reeaghyn Israel?

⁹ As chaddil Jehoahaz marish e ayraghyn; as doanluck ad eh ayns Samaria: as ren Joash e vac reill ny ynnyd.

¹⁰ Ayns y chiaghtoo vleïn jeig as feed jeh Joash ree Yudah, ghow Jehoash mac Jehoahaz toshiaght dy reill harrish Israel ayns Samaria, as reill eh shey bleeaney jeig.

¹¹ As ren eh shen ny va olk ayns shilley’n Chiarn; cha hreig eh ooilley peccaghyn Yeroboam mac Nebat, hayrn Israel fo peccah: huill eh ayndoo.

¹² As y chooid elley jeh obbraghyn Yoash, as ooilley ny ren eh, as e niart lesh ren eh caggey noi Amaziah ree Yudah, nagh vel ad scruit ayns lioar recortyssyn reeaghyn Israel?

¹³ As chaddil Joash marish e ayraghyn; as ren Jeroboam soie er y stoyl-reeoil echey: as va Joash oanluckit ayns Samaria marish reeaghyn Israel.

¹⁴ Nish va Elisha ching jeh e hingys baaish. As haink Joash ree Israel sheese huggey, as cheayn eh harrish, as dooyrt eh, O my ayr! fainagh Israel, as ny markee echey!

¹⁵ As dooyrt Elisha rish, Gow bow as sideyn: as ghow eh huggey bow as sideyn.

¹⁶ As dooyrt eh rish ree Israel, Cur dty laue er y vhow: as hug eh e laue er; as hug Elisha ny laueyn echey er laueyn y ree.

¹⁷ As dooyrt eh, Foshil yn uinniag lesh y shiar: as doshil eh eh. Eisht dooyrt Elisha, Lhig side: as lhig eh. As dooyrt eh, Side livrey-ys y Chiarn, as side y livrey-ys veih Syria; son nee oo ny Syrianee y woalley ayns Aphek, derrey t’eu er stroie ad.

¹⁸ As dooyrt eh, Gow ny sideyn: as ghow eh ad. As dooyrt eh rish ree Israel, Bwoaill er y thalloo: as woaill eh three keayrtyn, as scuirr eh.

¹⁹ As va’n dooinney dy Yee corree rish, as dooyrt eh, Lhisagh oo v’er woalley queig ny shey dy cheayrtyn; eisht veagh uss er woalley Syria derrey v’ou er stroie eh: agh nish cha bwoaill uss Syria agh three keayrtyn.

²⁰ As hooar Elisha baase, as doanluck ad eh. As ren sheshaghtyn ny Moabiteyn brishey stiagh ’sy cheer ec toshiaght ny bleeaney.

²¹ As haink eh gy-kione, myr v’ad goanluckey dooinney, cur-my-ner, honnick ad sheshaght dy gheiney; as cheau ad y dooinney ayns oaie Elisha: as tra va’n dooinney lhiggit sheese, as er ventyn rish craueyn Elisha, haink eh gys bioys, as hass eh er e chassyn.

²² Agh ren Hazael ree Syria tranlaase er Israel rish ooilley laghyn Jehoahaz.

²³ As va’n Chiarn graysoil daue, as chymmoil orroo, er coontey e chonaant rish Abraham, Isaac, as Jacob, as cha jinnagh eh ad y stroie, chamoo ad y scarrey foast veih e enish.

²⁴ Myr shen hooar Hazael, ree Syria baase; as ren Ben-hadad e vac reill ’syn ynnyd echey.

²⁵ As chossyn Jehoash, mac Jehoahaz, reesht ass laueyn Ben-hadad, mac Hazael, ny ard-valjyn v’eh er ghoaill veih Jehoahaz e ayr ’sy chaggey: three keayrtyn hooar Joash y varriaght er, as chossyn eh reesht ard-valjyn Israel.