2 Reeaghyn 12 - Yn Vible Casherick 1775 1819

CAB. XII

¹ Ayns y chiaghtoo vleïn jeh Jehu, ghow Jehoash toshiaght dy reill; as ren eh reill da-eed bleïn ayns Jerusalem: as ennym e voir va Zibiah jeh Beer-sheba.

² As ren Jehoash shen ny va cairagh ayns shilley’n Chiarn ooilley e laghyn, myr va Jehoiada yn saggyrt er chur roish.

³ Agh cha row ny ard-ynnydyn foast treigit: ren y pobble kinjagh chebbal oural as lostey incense ayns ny ard-ynnydyn.

⁴ As dooyrt Jehoash rish ny saggyrtyn, Ooilley argid yn chooid chasherick t’er ny choyrt lesh stiagh gys thie’n Chiarn, eer argid y cheesh ta soit er kione dagh dooinney dy eeck, as ooilley’n argid ta dagh dooinney lesh cree arryltagh dy hebbal ayns thie’n Chiarn,

⁵ Lhig da ny saggyrtyn y hroggal eh, dy chooilley ghooinney jeh e ainjys, dy cherraghey brishaghyn y thie, raad erbee vees failleil ry-gheddyn.

⁶ Agh myr shen ve derrey’n trass vleïn as feed jeh ree Jehoash, nagh row ny saggyrtyn er cherraghey brishaghyn y thie.

⁷ Eisht deïe Jehoash son Jehoiada yn saggyrt, as ny saggyrtyn elley, as dooyrt eh roo, Cre’n-fa nagh vel shiu jannoo mie brishaghyn y thie? Nish er-y-fa shen, ny trog-jee ny sodjey argid jeh nyn ainjys, agh livrey-jee stiagh ny t’eu dy cherraghey thie’n Chiarn.

⁸ Er shoh cha row ny saggyrtyn dy hroggal argid arragh jeh’n pobble, chamoo dy yannoo seose brishaghyn y thie.

⁹ Agh ghow Jehoiada yn saggyrt kishtey, as ren eh towl ’sy vullagh, as hoie eh eh liorish yn altar, er y cheu yesh myr ta fer cheet stiagh ayns thie’n Chiarn: as ny saggyrtyn dreill y dorrys hug ayn ooilley’n argid haink stiagh gys thie’n Chiarn.

¹⁰ As myr shen ve, tra honnick ad dy row mooarane argid ’sy chishtey, dy daink scrudeyr y ree as yn ard-saggyrt seose, as hug ad eh ayns sporranyn, as choont ad yn argid va ry-gheddyn ayns thie’n Chiarn.

¹¹ As livrey ad yn argid, erreish da ve coontit, gys laueyn ny obbreeyn, va stiurtyn er thie’n Chiarn: as hug ad eh da ny seyir as ny masoonee dy ve baarit ayns obbyr thie’n Chiarn,

¹² As dauesyn va giarey fuygh, as cummey claghyn, as dy chionnaghey fuygh as claghyn cummit dy cherraghey brishaghyn thie’n Chiarn, as son ooilley ny va baarit er y thie dy yannoo seose eh.

¹³ Ny-yeih, cha row foast jeant son thie’n Chiarn claareeyn argid, smalyderyn, basonyn, trumpetyn, siyn airh ny argid, lesh yn argid v’ayns tashtaghyn thie’n Chiarn:

¹⁴ Agh hug ad shen da ny labreeyn dy cherraghey thie’n Chiarn.

¹⁵ Ny-yeih, cha ren ad coontey rish ny deiney, ayns ny laueyn oc v’ad er livrey yn argid dy ve baarit er ny obbreeyn: son va’n dellal oc ynrick.

¹⁶ Cha row ny ourallyn son loght as peccah ’sy choontey ayns thie yn Chiarn: va shen lesh ny saggyrtyn.

¹⁷ Eisht hie Hazael ree Syria seose, as ren eh caggey noi Gath, as ghow eh eh: as hyndaa Hazael e eddin dy gholl noi Jerusalem.

¹⁸ As ghow Jehoash ree Yudah ooilley yn chooid chasherick, va Jehoshaphat, as Jehoram, as Ahaziah e ayraghyn, reeaghyn Yudah, er chasherickey, as e chooid chasherick hene, as ooilley’n airh v’er ny gheddyn ayns tashtaghyn thie’n Chiarn, as ayns thie’n ree, ad hug eh ad gys Hazael ree Syria, as hyndaa eh ersooyl veih Jerusalem.

¹⁹ As y chooid elley jeh obbraghyn Yoash, as ooilley ny ren eh, nagh vel ad scruit ayns lioar recortyssyn reeaghyn Yudah?

²⁰ As hrog ny sharvaantyn echey, as ghow ad coyrle follit n’oï, as varr ad Joash ayns thie Millo, t’er y raad gys Silla.

²¹ Son woaill Jozachar mac Shimeath, as Jehozabad mac Shomer, e harvaantyn, eh, dy dooar eh baase; as doanluck ad eh marish e ayraghyn ayns ard-valley Ghavid: as ren Amaziah e vac reill ayns e ynnyd.