2 Reeaghyn 10 - Yn Vible Casherick 1775 1819

CAB. X

¹ As v’ec Ahab three-feed mec [as jeih] ayns Samaria: as hug Jehu screeunyn gys Samaria, gys fir-reill yn ard-valley, gys yn chanstyr, as gys oaseiryn cloan Ahab, gra,

² Nish cha leah’s hig y screeuyn shoh hiuish, fakin dy vel mec nyn mainshtyr mêriu, as dy vel eu fainee as cabbil, as myrgeddin ard-valley fencit, as greïnyn-caggee,

³ Reih-jee magh yn fer share as ’stoamey jeh mec nyn mainshtyr, as soie-jee eh er stoyl-reeoil e ayrey, as jean-jee caggey son thie nyn mainshtyr.

⁴ As v’ad erskyn-towse agglagh, as dooyrt ad, Cur-my-ner, cha hass daa ree roish; kys eisht hassys shinyn?

⁵ As hug fer-reill y thie, as kiannoort yn ard-valley, yn chanstyr myrgeddin, as oaseiryn y chloan, chaghteraght gys Jehu, gra, Ta shinyn dty harvaantyn, as nee mayd cre-erbee elley sailt; agh er son ree cha jean mayd soiaghey harrin: jean shen ny ta mie ayns dty hooillyn.

⁶ Eisht hug eh screeuyn huc yn nah cheayrt, gra, My ta shiu er y cheu aym’s, as my nee shiu geaishtagh rish my choraa, gow-jee king ny deiney mec nyn mainshtyr, as tar-jee hym’s gys Jezreel mysh y traa shoh mairagh. (Nish va mec y ree three-feed persoon as jeih; as v’ad marish ard-gheiney’n ard-valley, va dy hroggal ad)

⁷ As haink eh gy-kione, tra haink y screeuyn shoh huc, dy ghow ad mec y ree, as varr ad three-feed persoon as jeih, as hug ad ny king oc ayns baskadyn huggey gys Jezreel.

⁸ As haink chaghter, as dinsh eh da, gra, T’ad er choyrt lhieu king mec y ree. As dooyrt eh, Cur-jee ad nyn lhie ayns daa charnane rish lhiattee’n yiat, derrey’n voghrey.

⁹ As haink eh gy-kione ’sy voghrey, dy jagh eh magh, as hass eh, as dooyrt eh rish ooilley’n pobble, Ta shiuish gyn loght: Cur-my-ner, dirree mish magh noi my vainshtyr, as varr mee eh: agh quoi varr ad shoh ooilley?

¹⁰ Toig-jee nish nagh duitt nhee erbee jeh goo’n Chiarn gys y thalloo, ren y Chiarn fockley magh mychione thie Ahab: son ta’n Chiarn er n’yannoo shen ny loayr eh liorish e harvaant Elijah.

¹¹ Shoh myr ren Jehu stroie ooilley ny v’er-mayrn jeh thie Ahab ayns Jezreel, as ooilley e ard-gheiney, as e chaarjyn, as e haggyrtyn, derrey nagh daag eh fer jeu er-mayrn.

¹² As hrog eh er, as hie eh roish, as haink eh gys Samaria. As myr v’eh ec y phaal er y raad,

¹³ Veeit Jehu rish braaraghyn Ahaziah ree Yudah, as dooyrt eh, Quoi shiuish? As dreggyr ad, Ta shinyn braaraghyn Ahaziah; as ta shin goll sheese dy yeearree bea as slaynt da cloan y ree, as cloan y ven-reïn.

¹⁴ As dooyrt eh, Gow-jee ad bio. As ghow ad bio ad, as hug ad gy-baase ad ec loghan y phaal, eer daa ghooinney as da-eed; chamoo daag eh veg jeu er-mayrn.

¹⁵ As tra v’eh er n’gholl veih shen, haghyr eh er Jehonadab mac Rechab cheet ny whail, as vannee eh da, as dooyrt eh rish, Vel dty chree’s firrinagh lhiam’s, myr ta my chree’s lesh dty chree’s? As dreggyr Jehonadab, Ta. My te myr shen, cur dou dty laue er. As hug eh da e laue: as ghow eh seose eh huggey ayns yn ainagh.

¹⁶ As dooyrt eh, Tar mârym’s, as cur-my-ner my ghraih jeean son y Chiarn. Myr shen hug ad er markiagh ayns yn ainagh.

¹⁷ As tra haink eh gys Samaria, hug eh dy baase ooilley v’er-mayrn da Ahab ayns Samaria, derrey v’eh dy bollagh er stroie eh, cordail rish raa’n Chiarn, v’eh er loayrt rish Elijah.

¹⁸ As haggil Jehu ooilley’n pobble cooidjagh, as dooyrt eh roo, Ren Ahab shirveish Baal ny veggan, agh nee Jehu ard shirveish da.

¹⁹ Shen-y-fa nish chaggil-jee hym’s ooilley phadeyryn Vaal, ooilley e hirveishee, as ooilley e haggyrtyn, ny lhig dooinney jeu ve ergooyl; son ta oural aym’s dy hebbal da Baal: quoi-erbee nagh jig kionfenish, cha bee eh faagit bio. Agh ren Jehu shoh dy croutagh, dy voddagh eh stroie shirveishee Vaal.

²⁰ As dooyrt Jehu, Jean-jee feailley casherick y ockley magh son Baal. As ren ad fockley magh eh.

²¹ As hug Jehu fys trooid ooilley Israel; as haink ooilley shirveishee Vaal, myr shen cha row dooinney jeu nagh daink; as haink ad stiagh ayns chiamble Vaal; as va thie Vaal lane veih kione dy kione.

²² As dooyrt eh rishyn va harrish yn êrin, Cur-jee lhieu magh coamraghyn son ooilley ooashleyderyn Vaal. As hug ad lhieu magh huc ny coamraghyn.

²³ As hie Jehu, as Jehonadab mac Rechab, stiagh ayns chiamble Vaal, as dooyrt ad rish shirveishee Vaal, Brie-jee, as jeeagh-jee nagh bee veg ayns shoh mêriu jeh sharvaantyn y Chiarn, agh shirveishee Vaal ny-lomarcan.

²⁴ As tra hie ad stiagh, dy hebbal ourallyn as chebballyn-losht, doardee Jehu kiare-feed dooinney cheu-mooie, as dooyrt eh, My nee veg jeh ny deiney, ta mee er livrey gys nyn laue, scapail, eshyn lhiggys y raad da, bee’n vioys echey son y vioys echeysyn.

²⁵ As haink eh gy-kione, cha leah’s v’ad er n’yannoo jerrey jeh chebbal yn oural-losht, dy dooyrt Jehu rish y ghard, as rish ny captanyn, Stiagh-jee, as marr-jee ad; ny lhig-jee da fer hene cheet magh. As yiare ad jeh ad lesh foyr y chliwe; as cheau’n ghard as ny captanyn ad magh, as hie ad gys ard-valley thie Vaal.

²⁶ As hug ad lhieu magh ny jallooyn ass thie Vaal, as ren ad lostey ad.

²⁷ As vrish ad sheese jalloo Vaal, as vrish ad sheese thie Vaal, as ren ad eh ny horran gys y laa t’ayn jiu.

²⁸ Myr shoh ren Jehu Baal y stroie ass Israel.

²⁹ Ny-yeih, cha hreig Jehu peccaghyn Yeroboam mac Nebat, lioroo v’eh er hayrn Israel gys peccah, ta shen, my lheiyee airhey v’ayns Beth-el, as ayns Dan.

³⁰ As dooyrt y Chiarn rish Jehu, er-yn-oyr dy vel oo er n’yannoo dy mie, ayns cooilleeney shen ny ta cairagh ayns my hooillyn, as er n’yannoo rish thie Ahab cordail rish ooilley ny va ayns my chree, nee dty chloan gys y chiarroo heeloghe soie er stoyl-reeoil Israel.

³¹ Agh cha dug Jehu geill dy hooyl ayns leigh’n Chiarn Jee Israel lesh ooilley e chree: son cha hreig eh peccaghyn Yeroboam, ren Israel y hayrn fo peccah.

³² Ayns ny laghyn shen ghow’n Chiarn toshiaght dy hionney stiagh Israel: as woaill Hazael ad ayns ooilley ardjyn Israel;

³³ Veih Jordan lesh y shiar, ooilley cheer Ghilead, ny Gaditeyn, as ny Reubeniteyn, as ny Manassiteyn, veih Aroer, (ta liorish awin Arnon,) eer gys Gilead as Bashan.

³⁴ Nish y chooid elley jeh obbraghyn Jehu, as ooilley ny ren eh, as ooilley e niart, nagh vel ad scruit ayns lioar recortyssyn reeaghyn Israel.

³⁵ As chaddil Jehu marish e ayraghyn; as doanluck ad eh ayns Samaria: as ren Jehoahaz e vac reill ’syn ynnyd echey.

³⁶ As y traa ren Jehu reill harrish Israel ayns Samaria va hoght bleeaney as feed.