2 Reeaghyn 1 - Yn Vible Casherick 1775 1819

CAB. I

¹ Eisht dirree Moab magh noi Israel lurg baase Ahab.

² As huitt Ahaziah sheese trooid uinniag veih ard shamyr e hie ayns Samaria, as v’eh broojit: as hug eh chaghteryn, as dooyrt eh roo, Immee-jee, as brie-jee jeh Baal-zebub jee Ekron, jean-yms coural jeh’n doghan shoh.

³ As dooyrt ainle y Chiarn rish Elijah yn Tishbite, Trog ort, as gow sheese quail chaghteryn ree Samaria, as abbyr roo, Nee son nagh vel Jee ayns Israel, dy vel shiuish goll dy vriaght jeh Baal-zebub, jee Ekron?

⁴ Nish, shen-y-fa, myr shoh ta’n Chiarn dy ghra, Cha jig oo neose veih’n lhiabbee shen er t’ou er gholl seose, agh yiow son shickyrys baase. As hie Elijah roish.

⁵ As tra hyndaa ny chaghteryn reesht huggey, dooyrt eh roo, Cre’n-fa ta shiu nish er jeet back?

⁶ As dooyrt ad rish, Haink dooinney seose nyn guail, as dooyrt eh rooin, Reue-jee, chyndaa-jee reesht gys y ree hug shiu er y chaghteraght shoh, as abbyr-jee rish, Myr shoh ta’n Chiarn dy ghra, Nee son nagh vel Jee ayns Israel, dy vel uss er choyrt dy vriaght jeh Baal-zebub jee Ekron? shen-y-fa cha jig oo neose veih’n lhiabbee shen t’ou er gholl seose, agh yiow son shickyrys baase.

⁷ As dooyrt eh roo, Cre’n monney dy ghooinney v’eh haink seose nyn guail, as dinsh diu ny goan shoh?

⁸ As dreggyr ad eh, V’eh ny ghooinney geyshteenagh, as cryss liare mysh e veeghyn. As dooyrt eh, Shen Elijah yn Tishbite.

⁹ Eisht hug y ree huggey captan lieh-cheead lesh e heshaght. As hie ad seose huggey; (as cur-my-ner v’eh ny hoie er mullagh cronk;) as loayr eh rish, Uss ghooinney dy Yee, ta’n ree er ghra, Tar neose.

¹⁰ As dreggyr Elijah as dooyrt eh rish captan y lieh-cheead, My she dooinney dy Yee mish, eisht lhig da aile cheet neose veih niau dy stroie uss as dty heshaght. As haink aile neose veih niau, ren eshyn as e heshaght y stroie.

¹¹ As hug eh reesht huggey captan elley dy lieh-cheead lesh e heshaght. As loayr eh as dooyrt eh rish, O ghooinney dy Yee, myr shoh ta’n ree er ghra, Tar neose dy tappee.

¹² As dreggyr Elijah as dooyrt eh roo, My she dooinney dy Yee mee, lhig da aile cheet neose veih niau, nee uss as dty heshaght y stroie. As haink aile Yee neose veih niau, ren eshyn as e heshaght y stroie.

¹³ As hug eh reesht captan y trass lieh-cheead, as e heshaght. As hie trass chaptan y lieh-cheead seose, as haink eh as huitt eh er e ghlioonyn kiongoyrt rish Elijah, as ren eh aghin huggey, as dooyrt eh rish, O ghooinney dy Yee, ta mee guee ort, lhig da my vioys, as bioys ny jeih as da-eed shoh dty harvaantyn, ve deyr ayns dty hilley.

¹⁴ Cur-my-ner haink aile neose veih niau, ren lostey seose daa chaptan ny lieh-cheeadyn elley, marish nyn sheshaghtyn: shen-y-fa, lhig da’n vioys aym’s ve deyr ayns dty hilley.

¹⁵ As dooyrt ainle y Chiarn rish Elijah, Gow sheese mârish; ny gow aggle roish. As hrog eh er, as hie eh sheese mârish gys y ree.

¹⁶ As dooyrt eh rish, Myr shoh ta’n Chiarn dy ghra, Son wheesh as dy dug oo chaghteryn dy vriaght jeh Baal-zebub jee Ekron, (nee er-yn-oyr nagh row Jee ayns Israel dy vriaght jeh e ghoo?) shen-y-fa cha jig oo neose jeh’n lhiabbee er t’ou er n’gholl seose, agh yiow son shickyrys baase.

¹⁷ Myr shen hooar eh baase, cordail rish raa’n Chiarn va Elijah er loayrt: as ren Jehoram reill ’sy ynnyd, ayns y nah vleïn jeh Jehoram mac Jehoshaphat ree Yudah; son nagh row mac echey.

¹⁸ Nish y chooid elley jeh obbraghyn Ahaziah v’eh er n’yannoo, nagh vel ad scruit ayns lioar recortyssyn reeaghyn Israel.