2 Recortyssyn 3 - Yn Vible Casherick 1775 1819

CAB. III

¹ Eisht ren Solomon toshiaght dy hroggal thie’n Chiarn ayns Jerusalem er cronk Moriah, raad va’n Chiarn er hoilshaghey eh-hene da David e ayr, ’sy voayl kiarit liorish David ayns laare-arroo Ornan yn Jebusite.

² As ghow eh toshiaght dy hroggal er y nah laa jeh’n nah vee, ’sy chiarroo vleïn jeh e reill.

³ Nish shoh yn towshan myr hug Jee roish Solomon son troggal thie Yee. Yn lhiurid ayns cubityn lurg y chied towse, va three-feed cubit, as y lheead feed cubit.

⁴ As va lhiurid y phorch v’er eddin y thie feed cubit, cordail rish lheead y thie, as va’n yrjid shey-feed: as choodee eh eh harrish er cheu-sthie lesh glen airh.

⁵ As y thie mooar hene ren eh eh y ceillal lesh fuygh-juys, as choodee eh shen harrish lesh glen airh, as ren eh grainney er biljyn-palm, as linkyn airh.

⁶ As hoie eh magh y thie dy stoamey lesh claghyn costal son aalid: as va’n airh veih cheer Parvaim.

⁷ Choodee eh myrgeddin yn thie, ny jeaystyn, ny pillaryn, as ny voallaghyn echey, as ny coollaghyn lesh airh, as ghrainnee eh cherubim er ny voallaghyn,

⁸ As ren eh yn thie smoo casherick, va’n lhiurid echey cordail rish lheead y thie, feed cubit, as y lheead echey feed cubit: as choodee eh eh harrish lesh glen airh mysh shey cheead talent.

⁹ As va towse ny treinaghyn jeih shekelyn as da-eed dy airh: as choodee eh ny shamyryn b’yrjey lesh airh.

¹⁰ As ayns y thie smoo casherick ren eh daa cherubim dy obbyr ghrainnit, as choodee eh ad harrish lesh airh.

¹¹ As va skianyn ny cherubim feed cubit er lhiurid: va un skian y derrey cherub queig cubityn, roshtyn gys voalley’n thie: as y skian elley myrgeddin queig cubityn, roshtyn gys skian y cherub elley.

¹² As va skian y cherub elley queig cubityn, roshtyn gys voalley’n thie; as va’n skian elley queig cubityn, roshtyn gys skian yn cherub elley.

¹³ Ren skianyn ny cherubim shoh skeayley ad-hene magh feed cubit; as v’ad shassoo er nyn gassyn, as va nyn eddinyn chyndaa stiagh.

¹⁴ As ren eh yn coodagh va eddyr y chiamble as yn ynnyd casherick dy ghorrym, as purple, as scarleod, as aanrit keyl, as dobbree eh cherubim er.

¹⁵ Myrgeddin ren eh roish y thie daa phillar jeh queig cubityn jeig as feed ayns yrjid, as va’n obbyr-attee v’er mullagh dagh pillar jeu queig cubityn.

¹⁶ As ren eh linkyn airh, myr ’syn ynnyd casherick, as hug eh ad er king ny pillaryn, as ren eh keead pomegranate, as hug eh ad eddyr ny linkyn.

¹⁷ As hoie eh seose ny pillaryn roish y chiamble, yn derrey yeh er y laue yesh, as y jeh elley er y laue chiare; as denmys eh shen v’er y laue yesh, Jachin, as shen v’er y laue chiare, Boaz.