2 Corinthianee 3 - Yn Vible Casherick 1775 1819

CAB. III

¹ Lhiass dooin ny-sodjey shin hene y voylley? ny vel shin, myr feallagh elley, feme screeuyn moyllee hiuish, ny screeuyn moyllee veue?

² Shiuish yn screeuyn ainyn scruit ayns nyn greeaghyn, toiggit as lhaiht liorish dy chooilley ghooinney:

³ Son wheesh as dy vel shiu dy cronnal er nyn soilshaghey dy ve screeuyn Chreest, t’er ny hirveish liorinyn, scruit cha nee lesh ink, agh lesh Spyrryd yn Jee bio; cha nee er buird chloaie, agh er buird foalley’n chree.

⁴ As lheid y treishteil shen ta ain trooid Creest ayns Jee.

⁵ Cha nee dy vel shin fondagh j’in hene dy smooinaghtyn nhee erbee myr j’in hene; agh ta’n phooar ain veih Jee.

⁶ Eh ta myrgeddin er n’yannoo shin shirveishee cooie jeh’n chonaant noa; cha nee jeh’n leigh, agh jeh’n spyrryd: son ta’n leigh gobbraghey baase, agh ta’n spyrryd coyrt bioys.

⁷ Agh my va shirveish y vaaish, scruit as grainnit er claghyn, gloyroil; myr shen nagh voddagh cloan Israel jeeaghyn dy gyere er eddin Voses, son sollyssid e eddin, yn sollyssid cheddin va dy lheïe ersooyl.

⁸ Kys nagh bee shirveish y spyrryd ny smoo gloyroil?

⁹ Son my va shirveish yn deyrey gloyroil, foddey smoo ta’n chirveish dy ynrickys er-e-skyn ayns gloyr.

¹⁰ Son eer shen va jeant gloyroil, cha row gloyr ayn er yn ayrn shoh, er coontey yn ghloyr ta er-e-skyn.

¹¹ Son my va shen t’er ny choyrt naardey gloyroil, foddey smoo ta shen ta farraghtyn gloyroil.

¹² Fakin eisht dy vel ain lheid y treishteil, ta shin goaill orrin dy loayrt lesh slane reamys.

¹³ As cha nee myr Moses, hug coodagh er e eddin, nagh voddagh cloan Israel dy baghtal cur-my-ner jerrey [yn leigh] shen ta [nish] er ny choyrt ergooyl.

¹⁴ Agh va nyn aignaghyn dollit: son gys y laa t’ayn jiu ta’n coodagh cheddin er-mayrn orroo, ayns lhaih yn chenn chonaant; yn coodagh cheddin ta goit jeh ayns Creest.

¹⁵ Agh gys yn eer laa jiu, tra ta Moses er ny lhaih, ta’n coodagh er nyn greeaghyn.

¹⁶ Ny-yeih, tra hyndaa-ys ad gys y Chiarn, bee’n coodagh er ny ghoaill ersooyl.

¹⁷ Nish she’n Chiarn yn Spyrryd shen: as raad ta Spyrryd y Chiarn, shen y raad ta reamys.

¹⁸ Agh shinyn ooilley lesh eddin foshlit, cur-my-ner myr ayns gless gloyr y Chiarn, ta shin er nyn gaghlaa gys y chaslys cheddin, veih gloyr gys gloyr, myr liorish Spyrryd y Chiarn.