1 Samuel 9 - Yn Vible Casherick 1775 1819

CAB. IX

¹ Nish va dooinney jeh Benjamin, va’n ennym echey Kish, mac Abiel, mac Zeror, mac Bechorath, mac Aphiah, Benjamite, dooinney feer phooaral.

² As va mac echey va’n ennym echey Saul, reih dooinney aeg as aalin; as cha row mastey cloan Israel persoon ny stoamey na eh: veih e gheayltyn seose v’eh ny s’thollee na veg jeh’n pobble.

³ As va assylyn Kish, ayr Saul, er n’gholl er-shaghryn; as dooyrt Kish rish Saul e vac, Gow nish mayrt fer jeh’n vooinjer, trog ort, as immee dy yeeaghyn son ny assylyn.

⁴ As hie eh trooid slieau Ephraim, as er e hoshiaght trooid cheer Shalisha, agh cha row ad ry-gheddyn: eisht hie ad trooid cheer Shalim, as ayns shen cha row ad; as hie eh trooid cheer ny Benjamiteyn, agh cha row ad ayns shen.

⁵ As tra v’ad er jeet gys cheer Zuph, dooyrt Saul rish e harvaant va mârish, Tar, as lhig dooin goll thie; er-aggle nagh nee son ny assylyn vees m’ayr imneagh, agh er ny son ain hene.

⁶ As dooyrt eh rish, Cur-my-ner nish, ta ayns yn ard-valley shoh dooinney dy Yee, as t’eh ny ghooinney ooasle; cre-erbee t’eh dy ghra, te dy shickyr er ny chooilleeney: lhig dooin nish goll huggey: foddee dy der eh roïn yn raad lhisagh shin goaill.

⁷ Eisht dooyrt Saul rish e harvaant, Agh cur-my-ner, my hem mayd cre t’ain dy hebbal da’n dooinney? son ta’n arran hug shin lhien son y raad baarit, as cha vel gioot ain dy hebbal da’n dooinney dy Yee: vel red erbee ain?

⁸ As dreggyr y charvaant Saul reesht, as dooyrt eh, Cur-my-ner, t’aym’s ayns shoh yn chiarroo ayrn jeh shekel argid: shen ver-ym da’n dooinney dy Yee dy insh dooin nyn raad.

⁹ (Ayns traa dy row ayns Israel, tra hie dooinney dy vriaght jeh Jee, shoh myr dooyrt eh, Tar-jee, lhig dooin goll gys y fakyder: son eshyn ta nish enmyssit phadeyr, v’eh roish nish enmyssit fakyder.)

¹⁰ Eisht dooyrt Saul rish e harvaant, Feer vie; tar, lhig dooin goll: myr shen hie ad gys yn ard-valley, raad va’n dooinney dy Yee.

¹¹ As myr hie ad seose y chronk gys yn ard-valley, haink mraane aegey nyn guail, va goll magh dy hayrn ushtey, as dooyrt ad roo, Vel y fakyder ayns shoh?

¹² As dreggyr ad, as dooyrt ad, T’eh; cur-my-ner, t’eh reue: jean-jee siyr nish; son haink eh jiu gys yn ard-valley; son ta oural-feailley ec yn pobble dy hebbal jiu er yn ard-altar.

¹³ Cha leah’s hig shiu stiagh ’syn ard-valley yiow shiu eh chelleeragh, roish my jed eh seose gys yn ynnyd ard dy ee: son cha jean y pobble gee derrey hig eh, er-yn-oyr dy vel eh dy oltaghey’n oural, as eisht ta ny goaldee gee. Jean-jee siyr eisht; son mysh y traa shoh yiow shiu eh.

¹⁴ As hie ad seose gys yn ard-valley; as tra v’ad er jeet stiagh s’yn ard-valley, cur-my-ner, haink Samuel nyn guail, myr v’eh goll seose gys yn altar.

¹⁵ Nish va’n Chiarn er hoilshaghey da Samuel er-lheh, yn laa roish my daink Saul, gra,

¹⁶ Mairagh, mysh y traa shoh, ver-yms hood dooinney ass cheer Venjamin; as nee oo eshyn y ooilaghey dy ve captan er my phobble Israel, dy vod eh sauail my phobble ass laue ny Philistinee: son ta mee er yeeaghyn er my phobble, er-yn-oyr dy vel yn accan oc er jeet kiongoyrt rhym.

¹⁷ As tra honnick Samuel Saul, dooyrt y Chiarn rish, Cur-my-ner yn dooinney mychione echey loayr mee rhyt: shoh eh nee reill harrish my phobble.

¹⁸ Eisht hayrn Saul er-gerrey da Samuel ’sy yiat, as dooyrt eh, Insh dou, ta mee guee ort, c’raad ta thie yn fakyder.

¹⁹ As dreggyr Samuel Saul, as dooyrt eh, Mish yn fakyder: gow seose roym gys yn ard-ynnyd; son nee shiu goaill beaghey mârym jiu; as mairagh lhig-ym y raad dhyt, as insh-ym dhyt ooilley ny t’ayns dty chree.

²⁰ As er son dty assylyn va caillit three laa er-dy-henney, ny bee ayns imnea erbee; son t’ad er ny gheddyn. As quoi er ta ooilley yeearree Israel? nagh nee ort’s te, as er ooilley thie dt’ayrey?

²¹ As dreggyr Saul as dooyrt eh, Nagh nee Benjamite mee, jeh’n tribe sloo coontit ayns Israel? as nagh vel my chynney’s ny s’fardalee na ooilley kynneeyn tribe Venjamin? cre’n-fa eisht t’ou loayrt rhym’s er yn aght shoh?

²² As ghow Samuel Saul as e harvaant, as hug eh lesh ad stiagh ’sy pharlar, as hug eh orroo soie seose gys kione y voayrd, mastey ny goaldee, va mysh jeih persoonyn as feed.

²³ As dooyrt Samuel rish y choagyrey, Cur lhiat yn ayrn shen jeh’n bee aarlit hug mee dhyt, mychione dooyrt mee rhyt, Cur dy lhiattee eh.

²⁴ As ghow’n coagyrey yn clingan, as ny v’er, as hoie ee eh roish Saul: as dooyrt Samuel, Cur-my-ner shen ny ta freilt! gow eh hood, as ee; son gys y traa shoh ve freilt dty chour, er-dyn traa dooyrt mee, Ta mee er chuirrey’n pobble. Myr shen ren Saul yn laa cheddin goaill beaghey marish Samuel.

²⁵ As tra v’ad er jeet neose veih’n ard-ynnyd gys yn ard-valley, va glare eddyr Samuel as Saul ayns ard-shamyr y thie.

²⁶ As dirree ad dy moghey: as haink eh gy-kione mysh brishey’n laa, dy deïe Samuel er Saul gys yn ard-shamyr, gra, Trog ort, dy voddym lhiggey’n raad dhyt. As dirree Saul, as hie ad ny-neesht magh, eshyn as Samuel, gys boayl er-lheh.

²⁷ As myr v’ad goll sheese ec kione yn ard-valley, dooyrt Samuel rish Saul, Abbyr rish y yuilley goll er e hoshiaght roïn, (as hie eh er e hoshiaght,) agh fuirree uss tammylt ayns shoh, dy voddym soilshaghey dhyt goo’n Chiarn.