1 Samuel 8 - Yn Vible Casherick 1775 1819

CAB. VIII

¹ As haink eh gy-kione tra va Samuel shenn, dy ren eh e vec briwnyn er Israel.

² Nish va ennym y fer shinney Joel, as va ennym e nah vac Abiah: v’ad shoh nyn mriwnyn ayns Beer-sheba.

³ As cha ren e vec shooyl ayns e raaidyn; agh v’ad shêgin er cosney, as ghow ad giootyn, as ren ad cassey briwnys.

⁴ As haggil ooilley shanstyr Israel ad-hene cooidjagh, as haink ad gys Samuel gys Ramah.

⁵ As dooyrt ad rish, Cur-my-ner, t’ou uss shenn, as cha vel dty vec shooyl ayns dty raaidyn: cur dooin nish ree dy vriwnys shin myr t’ec dy chooilley ashoon elley.

⁶ Agh va shoh dy mooar noi aigney Samuel, tra dooyrt ad, Cur dooin ree dy reill harrin. As ghow Samuel padjer gys y Chiarn.

⁷ As dooyrt y Chiarn rish Samuel, Cur raad da coraa yn pobble ayns ooilley ny t’ad dy ghra rhyt: son cha nee uss t’ad er yiooldey voue, agh mish, veih reill harrystoo.

⁸ Cordail rish ooilley ny obbraghyn t’ad er n’yannoo, er-dyn laa hug mee lhiam ad seose ad Egypt gys yn eer laa shoh, lioroo t’ad er my hreigeil, as er hirveish jeeghyn elley; myrgeddin t’ad jannoo rhyt’s.

⁹ Nish er-y-fa shen, cur raad da nyn yeearree: agh ec y traa cheddin cur dty vriwnys dy foshlit nyn ’oï, as cur toiggal daue cre’n aght nee’n ree dellal roo vees reill harrystoo.

¹⁰ As dinsh Samuel ooilley goan y Chiarn da’n pobble va shirrey ree er.

¹¹ As dooyrt eh, Shoh myr vees yn aght nee’n ree reill harrishdiu; nee eh goaill ny mec eu, as pointeil ad da hene, son e ainee, as dy ve ny markee echey, as paart jeu dy ve nyn goshee roish ny fainee.

¹² As nee eh goardrail da hene captanyn harrish thousaneyn, as captanyn harrish lieh-cheeadyn; as ver eh paart dy hraaue as dy chuirr e halloo, as dy vuinn e ouyr, as feallagh elley dy yannoo e ghreïnyn-caggee, as e ghreïnyn-fainee.

¹³ As ny inneenyn euish nee eh goaill dy ve miljeyderyn, as dy ve coagyryn, as fuinneyderyn.

¹⁴ As nyn magheryn nee eh goaill, as nyn garaghyn-feeyney, as ny garaghyn-olive eu, eer yn chooid share jeu, as ver eh ad da e harvaantyn.

¹⁵ As nee eh goaill yn jeihoo ayrn jeh’n arroo, as jeh ny garaghyn-feeyney eu, as ver eh ad da ny fir-oik echey, as da e harvaantyn.

¹⁶ As nee eh goaill nyn fir-vooinjerey, as nyn inneenyn-veyl, as ny deiney aegey ’stoamey eu, as nyn assylyn, as ver eh ad gys e obbyr hene.

¹⁷ Gowee eh yn jeihoo ayrn jeh ny kirree eu: as bee shiu ny sharvaantyn echey.

¹⁸ As nee shiu gaccan dy trome er y laa shen, kyndagh rish y ree vees shiu er reih; as cha der y Chiarn clashtyn diu er y laa shen.

¹⁹ Ny-yeih, dob y pobble dy choyrt biallys da coyrle Samuel; as dooyrt ad, Cha jean eh mie; agh ree vees ain harrin;

²⁰ Dy vod shinyn myrgeddin ve myr ashoon elley; as dy vod nyn ree shin y vriwnys, as dy ve nyn leeideilagh, as dy reill ny caggaghyn ain.

²¹ As cheayll Samuel ooilley goan y pobble, as hie eh harrystoo reesht ayns clashtyn y Chiarn.

²² As dooyrt y Chiarn rish Samuel, Jean myr t’ad geearree, as cur ree daue. As dooyrt Samuel rish deiney Israel, Reue-jee dy chooilley ghooinney gys e ard-valley hene.