1 Samuel 4 - Yn Vible Casherick 1775 1819

CAB. IV

¹ As va aigney’n Chiarn er ny hoilshaghey liorish Samuel da ooilley Israel. Nish hie Israel magh dy chaggey noi ny Philistinee, ren ad campal liorish Eben-ezer; as ren ny Philistinee campal ayns Aphek.

² As hug ny Philistinee ad-hene ayns order-caggee noi Israel: as tra haink ad dy cheilley, va’n varriaght ec ny Philistinee er Israel; as varr ad jeh’n armee ’sy vagher mysh kiare thousane dooinney.

³ As tra va’n pobble er jeet gys y champ dooyrt shanstyr Israel, Cre’n-fa ta’n Chiarn er woalley shin jiu roish ny Philistinee? lhig dooin cur fys son arg conaant y Chiarn veih Shiloh, tra hig eh hooin dy vod eh shin y hauail veih laueyn nyn noidyn.

⁴ Er shoh hug yn pobble fys gys Shiloh, dy choyrt lhieu veih shen arg conaant y Chiarn dy heshaght-flaunyss, ta cummal eddyr ny cherubim: as va daa vac Eli, Hophni as Phinehas, ayns shen marish arg conaant Yee.

⁵ As tra va arg conaant y Chiarn er jeet gys y champ, dyllee ooilley Israel lesh ard choraa, dy ren eer y thalloo craa lesh.

⁶ As tra cheayll ny Philistinee feiyr yn yllagh, dooyrt ad, Cre’n yllagh mooar shoh ayns camp ny Hebrewnee? As hoig ad dy row arg y Chiarn er jeet gys y champ.

⁷ As va aggle er ny Philistinee, son dooyrt ad, Ta Jee er jeet gys y champ. As dooyrt ad, Smerg dooinyn! son cha vel lheid y red er ve jeant roïe.

⁸ Smerg dooin! quoi nee shin y livrey ass laue ny Jeeghyn niartal shoh? ad shoh ny Jeeghyn woaill ny Egyptianee lesh whilleen kerraghey ’syn aasagh.

⁹ Bee-jee dunnal, as jean-jee gymmyrkey shiu-hene myr deiney, O shiuish Philistinee, nagh jig shiu dy ve fo keesh da ny Hebrewnee, myr v’adsyn diuish: ymmyrk-jee shiu-hene myr deiney, as lhig dooin caggey.

¹⁰ As huitt ny Philistinee orroo; as va Israel er nyn mwoalley, as chossyn dy chooilley ghooinney gys e chummal hene; as va cragh feer vooar ny-vud oc, son huitt jeih thousaneyn as feed jeh coshee Israel.

¹¹ As va arg Yee goit; as va daa vac Eli, Hophni as Phinehas, er nyn marroo.

¹² As roie dooinney dy Venjamin veih’n chaggey, as haink eh gys Shiloh er y laa cheddin, lesh e choamraghyn raipit, as ooir er e chione.

¹³ As tra haink eh, cur-my-ner, va Eli ny hoie er stoyl rish lhiattee’n raad, dy gheddyn naight: son va e chree er-creau son arg Yee. As tra va’n dooinney er jeet stiagh ’syn ard-valley lesh y naight, va yllaghey as eam trimshagh trooid ooilley’n ard-valley.

¹⁴ As tra cheayll Eli feiyr yn eam, dooyrt eh, Cre’n feiyr boiragh shoh ta mee clashtyn? As haink y dooinney stiagh dy siyragh, as dinsh eh da Eli.

¹⁵ Nish va Eli kiare-feed as hoght bleeaney jeig dy eash; as va e hooillyn moal, nagh voddagh eh fakin.

¹⁶ As dooyrt y dooinney rish Eli, Mish eh haink jiu veih’n armee as ren cosney veih’n chaggey. As dooyrt eh, Kys t’ad er gholl er ayns shen, my vac?

¹⁷ As dreggyr yn chaghter as dooyrt eh, Ta Israel er roie er-chea roish ny Philistinee, as myrgeddin ta baase mooar sleih, as ta dty ghaa vac, Hophni as Phinehas, myrgeddin marroo, as ta arg Yee goit.

¹⁸ As haink eh gy-kione, cha leah’s denmys eh arg Yee, dy huitt eh jeh’n stoyl gour e ghrommey, rish lhiattee’n yiat, as vrish eh e wannal, as hooar eh baase; son v’eh ny henn ghooinney trome. As v’eh er vriwnys Israel da-eed bleïn.

¹⁹ As va’n inneen-’sy-leigh echey, ben Phinehas, torragh, as er-gerrey da’n traa: as tra cheayll ee yn naight dy row arg Yee goit, as dy row’n ayr-’sy-leigh eck as e sheshey marroo, chroym ee ee-hene, as va pianyn troailt urree.

²⁰ As myr v’ee ayns raad y vaaish, dooyrt ny mraane va mâree, Bee er dty gherjaghey, son t’ou er n’ymmyrkey mac. Agh cha dug ee ansoor, chamoo hug ee geill da.

²¹ Agh denmys ee yn lhiannoo I-chabod, gra, Ta’n ghloyr er n’immeeaght veih Israel: (er-yn-oyr dy row arg Yee goit, as er graih yn ayr-’sy-leigh eck as e sheshey:)

²² As dooyrt ee, Ta gloyr Israel er n’immeeaght; son ta arg Yee goit.