1 Samuel 31 - Yn Vible Casherick 1775 1819

CAB. XXXI

¹ Nish ren ny Philistinee caggey noi Israel: as roie deiney Israel er-chea roish ny Philistinee, as huitt ad lesh cragh trome ayns cronk Gilboa.

² As deiyr ny Philistinee chion er Saul, as er e vec; as varr ny Philistinee Jonathan, as Abinadab, as Malchi-shua, mec Saul.

³ As hie’n caggey dy dewil noi Saul, as haink ny sideyryn stiagh er; as v’eh lhottit dy baase lioroo.

⁴ Eisht dooyrt Saul rish e armyder, Tayrn dty chliwe, as roie mee trooid lesh; er-aggle dy jig ny chymmyltee shoh dy roie mee trooid, as boggyssagh harrym. Agh cha jinnagh e armyder laue er, son va rouyr aggle er: shen-y-fa ghow Saul cliwe, as huitt eh er.

⁵ As tra honnick e armyder dy row Saul marroo, huitt eshyn myrgeddin er e chliwe, as hooar eh baase mârish.

⁶ Myr shoh hooar Saul baase, marish e hree mec, as e armyder, as ooilley ny deiney va mygeayrt-y-mysh myrgeddin, er y laa cheddin.

⁷ As tra honnick deiney Israel va er cheu elley jeh’n choan, as adsyn va er cheu elley jeh Jordan, dy row deiney Israel er roie er y hon, as dy row Saul as e vec marroo, hreig ad ny ard-valjyn, as roie ad er-chea; as haink ny Philistinee, as ren ad cummal ayndoo.

⁸ As haink eh gy-kione laa-ny-vairagh, tra haink ny Philistinee dy roostey ny merriu, dy dooar ad Saul as e hree mec er duittym ayns slieau Gilboa.

⁹ As yiare ad e chione jeh, as rooisht ad jeh e eïlley-caggee, as hug ad fys gys cheer ny Philistinee ooilley mygeayrt dy hoilshaghey eh ayns thie ny jallooyn oc, as mastey’n pobble.

¹⁰ As hug ad yn eïlley-caggee echey ayns thie Ashtaroth; as chrogh ad seose e chorp rish voalley Beth-shan.

¹¹ As tra va cummaltee Yabesh-gilead er chlashtyn jeh shen va ny Philistinee er n’yannoo rish Saul:

¹² Hrog ooilley ny deiney dunnal orroo, as ren ad troailt fud-ny-hoie, as ghow ad sheese corp Saul, as kirp e vec, veih voalley Beth-shan, as haink ad gys Jabesh, as losht ad ad ayns shen.

¹³ As ghow ad ny craueyn oc, as ren ad goanluckey ad fo billey ec Jabesh, as hrosht ad shiaght laa.