1 Samuel 30 - Yn Vible Casherick 1775 1819

CAB. XXX

¹ As haink eh gy-kione, tra va David as e gheiney er jeet gys Ziklag er y trass laa, dy row ny Amalekiteyn er vrishey stiagh er ardjyn y jiass, as Ziklag, as er ghoaill Ziklag, as er lostey eh lesh aile;

² As v’ad er n’ghoaill ny mraane v’ayn nyn gappee: cha ren ad veg y varroo, mooar ny beg, agh hug ad lhieu ad ersooyl, as hie ad rhymboo.

³ Myr shen haink David as e gheiney gys yn ard-valley, as cur-my-ner, ve losht lesh aile; as va ny mraane, ny mec, as ny inneenyn oc goit nyn gappeeyn.

⁴ Eisht hrog David as y pobble va mârish seose nyn goraa, as cheayn ad, derrey nagh row pooar oc dy cheayney ny sodjey.

⁵ As va daa ven Ghavid goit nyn gappee, Ahinoam veih Jezreel, as Abigail ben Nabal veih Carmel.

⁶ As va David dy mooar seaghnit; son va’n pobble aarloo dy chlaghey eh, er-yn-oyr dy row cree ooilley’n pobble trimshagh, dy chooilley ghooinney son e vec, as e inneenyn: agh hug David e varrant ayns y Chiarn e Yee.

⁷ As dooyrt David rish Abiathar y saggyrt, mac Ahimelech, Ta mee guee ort, cur lhiat hym yn ephod. As haink Abiathar lesh yn ephod er gys David.

⁸ As hir David coyrle veih’n Chiarn, gra, Jem’s geiyrt er y cheshaght shoh? jean-ym berraghtyn orroo? As dreggyr eh, Immee, eiyr orroo; son nee oo son shickyrys berraghtyn orroo, as cosney reesht y slane spooilley.

⁹ Myr shen hie David, eh-hene as y shey cheead dooinney va mârish, as haink ad gys yn strooan Besor, raad duirree paart jeu va faagit nyn lurg.

¹⁰ Agh hie David geiyrt orroo lesh kiare cheead dooinney: (son duirree daa cheead dooinney nyn yeï, va cha tooillit nagh voddagh ad goll harrish y strooan Besor.)

¹¹ As haghyr ad er Egyptian ’sy vagher, as hug ad lhieu eh gys David, as hug ad arran da, as ren eh gee; as hug ad er giu ushtey.

¹² As hug ad peesh dy cheeak figgagh da, as daa ghossan dy raisinyn: as tra v’eh er ghoaill beaghey va e chree er ny niartaghey: son cha row eh er gheddyn veg y veaghey rish three laa as three oieghyn.

¹³ As dooyrt David rish, Quoi lesh oo? as cre veih haink oo? As dooyrt eh, Ta mish dooinney aeg veih Egypt, sharvaant da Amalekite; as daag my vainshtyr mee, er-yn-oyr dy huitt mee ching three laa er-dy-henney.

¹⁴ Ren shin brishey stiagh er cheer jiass ny Cherethiteyn, as er ardjyn Yudah, as er y jiass jeh Caleb; as losht shin Ziklag lesh aile.

¹⁵ As dooyrt David rish, Vod uss y raad y yeeaghyn dou gys y cheshaght shoh? As dooyrt eh, Jean breearrey dou liorish Jee, nagh jean oo m’y varroo, ny m’y livrey gys laueyn my vainshtyr, as ver-ym lhiam oo gys y cheshaght shoh.

¹⁶ As tra v’eh er chur lesh eh sheese, cur-my-ner v’ad skeaylt ooilley fud y vagheragh, gee, as giu, as daunsin, son boggey jeh’n spooilley mooar v’ad er n’ghoaill ass cheer ny Philistinee, as cheer Yudah.

¹⁷ As woaill David ad veih brishey’n laa gys fastyr laa-ny-vairagh; as cha ren dooinney jeu scapail, agh kiare cheead dy gheiney aegey, varkee ersooyl er camelyn.

¹⁸ As chossyn David ooilley ny va ny Amalekiteyn er chur lhieu ersooyl; as hooar David reesht e ghaa ven.

¹⁹ As cha row monney dy choayl oc ayns nhee erbee, beg ny mooar, mec ny inneenyn, ny spooilley, ny nhee erbee v’er ny ghoaill voue: chossyn David back ooilley.

²⁰ As ghow David ooilley ny shioltaneyn as ny shellooyn, v’ad er scarrey veih’n maase elley v’oc, as dooyrt ad, Shoh spooilley Ghavid.

²¹ As haink David gys y daa cheead dooinney, va cha tooillit nagh voddagh ad geiyrt er David, v’ad myrgeddin êginit dy aagail nyn yeï ec strooan Besor: as hie ad magh quail David, as ny deiney va mârish: as tra haink David er-gerrey da’n pobble, vannee eh ad.

²² Eisht dreggyr ooilley’n vooinjer creoi-chreeagh, yn chloan shen dy Velial, hie marish David, as dooyrt ad, Er-yn-oyr nagh jagh ad mârin, cha der mayd daue ayrn erbee jeh’n spooilley ta shin er chosney, er-lhimmey da dy chooilley ghooinney e ven, as e chloan, dy vod ad goaill ad, as goll rhymboo.

²³ Eisht dooyrt David, Cha nee shen myr nee shiu, my vraaraghyn, lesh y chooid ta’n Chiarn er chur dooin, t’er choadey shin, as er livrey gys nyn laue yn cheshaght haink magh nyn ’oï.

²⁴ Son quoi eh oddys shassoo lhieu ayns y chooish shoh? agh corrym rish ayrn y dooinney ta goll gys y chaggey, vees yn ayrn echeysyn ta fuirriaght nyn yeï son gard er y chooid.

²⁵ As veih’n traa shen magh, ren eh shoh son slattys as oardagh ayns Israel, gys y laa t’ayn jiu.

²⁶ As tra haink David gys Ziklag, hug eh kuse jeh’n spooilley gys shanstyr Yudah, eer gys e chaarjyn, (gra, Cur-my-ner, gioot er nyn son, jeh spooilley noidyn y Chiarn;)

²⁷ Dauesyn va ayns Beth-el, as dauesyn va ayns jiass Ramoth, as dauesyn va ayns Jattir,

²⁸ As dauesyn va ayns Aroer, as dauesyn va ayns Siphmoth, as dauesyn va ayns Eshtemoa,

²⁹ As dauesyn va ayns Rachal, as dauesyn va ayns ard-valjyn ny Jerahmeeliteyn, as dauesyn va ayns ard-valjyn ny Keniteyn,

³⁰ As dauesyn v’ayns Hormah, as dauesyn v’ayns Chor-ashan, as dauesyn va ayns Athach,

³¹ As dauesyn v’ayns Hebron, as gys dy chooilley ynnyd va David as e gheiney oayllagh dy haaghey.