1 Samuel 3 - Yn Vible Casherick 1775 1819

CAB. III

¹ As ren y lhiannoo Samuel shirveish gys y Chiarn fo Eli. As va goo’n Chiarn goaun ayns ny laghyn shen; cha row ashlish foshlit erbee.

² As haink eh gy-kione ec y traa shen, tra va Eli er lhie sheese dy ghoaill fea, as dy row e hoilshey cha moal, nagh voddagh eh fakin;

³ As my jagh lamp Yee ass ayns cabbane-agglish y Chiarn, raad va arg Yee, as roish my va Samuel er lhie sheese dy chadley;

⁴ Dy deïe’n Chiarn er Samuel: as dreggyr eh, Ta mish ayns shoh.

⁵ As roie eh gys Eli, as dooyrt eh, Ta mee ayns shoh; son deïe oo orrym. As dooyrt Eli, Cha deïe mish ort; lhie sheese reesht. As hie eh dy lhie.

⁶ As deïe’n Chiarn reesht, Samuel. As dirree Samuel, as hie eh gys Eli, as dooyrt eh, Ta mee ayns shoh; son deïe oo orrym. As dreggyr eh, Cha deïe mish ort, my vac; lhie sheese reesht.

⁷ Shoh myr ren Samuel roish my bione da yn Chiarn, as roish my va goo’n Chiarn er ny hoilshaghey da.

⁸ As deïe’n Chiarn er Samuel reesht yn trass cheayrt. As dirree eh, as hie eh gys Eli, as dooyrt eh, Ta mee ayns shoh, son ren oo geamagh orrym. As dennee Eli dy nee’n Chiarn v’er n’eamagh er y lhiannoo.

⁹ Shen-y-fa dooyrt Eli rish Samuel, Gow royd dy lhie; as my ver eh eam dhyt, nee oo freggyrt, Loayr, Hiarn, son ta dty harvaant clashtyn. Er shoh hie Samuel dy lhie sheese ayns e ynnyd.

¹⁰ As haink y Chiarn, as deïe eh myr ren eh roïe, Samuel, Samuel. Eisht dreggyr Samuel, Loayr, Hiarn; son ta dty harvaant clashtyn.

¹¹ As dooyrt y Chiarn rish Samuel, Cur-my-ner, neem’s red y chooilleeney ayns Israel, yn red cheddin ver nyn dappey vouesyn nee clashtyn eh.

¹² Er y laa shen neem’s cooilleeney noi Eli dy chooilley nhee ta mee er loayrt mychione e hie: tra hem laue roo, hem trooid lesh yn obbyr.

¹³ Son ta mee er n’insh da dy goym kerraghey er e hie, gys earishyn foddey, son y peccah nagh vel gyn-yss da; er-yn-oyr dy ren e vec ad-hene mollaghtagh, as nagh ren eh smaghtaghey ad.

¹⁴ As shen-y-fa ta mee er vreearrey mychione lught-thie Eli, nagh bee lhiasaghey jeant son mee-chraueeaght thie Eli lesh chebballyn ny ourallyn son dy bragh.

¹⁵ As lhie Samuel derrey’n voghrey, as doshil eh dorryssyn thie yn Chiarn: as va aggle er Samuel dy hoilshaghey’n ashlish da Eli.

¹⁶ Eisht deïe Eli er Samuel, as dooyrt eh, Samuel my vac. As dreggyr eh, Ta mee ayns shoh.

¹⁷ As dooyrt eh, Cre shen ta’n Chiarn er ghra rhyt? ta mee guee ort, ny keill eh voym’s: dy jean Jee myr shen rhyt, as ny smoo neesht, my nee oo fockle hene y cheiltyn voym jeh ooilley ny dooyrt eh rhyt.

¹⁸ As dinsh Samuel da dy chooilley ockle, as cha cheill eh veg voish. As dooyrt Eli, She’n Chiarn t’ayn: e aigney dy row jeant.

¹⁹ As daase Samuel, as va’n Chiarn mârish, as cha lhig eh da veg jeh e ghoan dy huittym gys y thalloo.

²⁰ As va fys ec ooilley Israel, veih Dan eer gys Beer-sheba, dy row Samuel er ny oardaghey dy ve phadeyr y Chiarn.

²¹ As haink y Chiarn reesht kionfenish ayns Shiloh: son ren y Chiarn eh-hene y hoilshaghey da Samuel ayns Shiloh, liorish goo’n Chiarn.