1 Samuel 24 - Yn Vible Casherick 1775 1819

CAB. XXIV

¹ As haink eh gy-kione, erreish da Saul v’er jyndaa veih geiyrt er ny Philistinee, dy row eh er ny insh da Saul, gra, Cur-my-ner, ta David ayns faasagh En-gedi.

² Eisht ghow Saul three thousaneyn dy gheiney reiht Israel, as hie eh dy gheddyn magh David as e gheiney mastey creggyn ny goair feïe.

³ As myr v’eh goll, haink eh gys bwoailtchyn ny geyrragh, raad va ooig; as hie Saul stiagh dy ghoaill snap dy chadley: as va David as e gheiney cheu-sthie ec kione sodjey stiagh yn ooig.

⁴ As dooyrt deiney Ghavid rish, Jeeagh, nish y laa my-e-chione loayr y Chiarn rhyt, Cur-my-ner, nee’m dty noid y livrey gys dty laue, dy yannoo rish myr sailt. Eisht hayrn David er-gerrey, as yiare eh jeh skyrt coamrey Saul gyn-yss da.

⁵ As haink eh gy-kione lurg shen, dy daink arrys er cree Ghavid, dy row eh er yiarey jeh skyrt Saul.

⁶ As dooyrt eh rish e gheiney, Ny lhig y Chiarn dy jinnin’s yn red shoh y yannoo rish my vainshtyr, ree ooilit y Chiarn, dy heeyney magh my laue n’oï, fakin dy vel eh fer-ooilit y Chiarn.

⁷ Myr shen ren David e gheiney y lhiettal lesh ny goan shoh, as cha n’uillaghey eh daue laue y choyrt er Saul. Agh hrog Saul er ass yn ooig, as hie eh er e raad.

⁸ Lurg shen hrog David er myrgeddin, as hie eh magh ass yn ooig, as dyllee eh lurg Saul, gra, My hiarn yn ree. As tra yeeagh Saul ny yeï, chroym David lesh e eddin gys y thalloo, as hug eh ooashley da.

⁹ As dooyrt David rish Saul, Cre’n-fa t’ou geaishtagh rish goan deiney, gra, Cur-my-ner, ta David shirrey dty assee?

¹⁰ Cur-my-ner, ta dty hooillyn hene nish er vakin kys dy ren y Chiarn uss y livrey yn laa jiu gys my laue ayns yn ooig: as choyrlee paart mee dy dty varroo; agh ren my hooill dty sparail; as dooyrt mee, Cha sheeyn-ym magh my laue noi my hiarn; son t’eh ree ooilit y Chiarn.

¹¹ Ny-sodjey, my ayr, jeeagh er shoh, jeeagh eer er skyrt dty choamrey ayns my laue: son liorish dy yiare mee jeh skyrt dty choamrey, as nagh ren mee oo y varroo, foddee oo toiggal as goaill tastey nagh vel olk ny drogh-yannoo ayns my laue, as nagh vel mee er yannoo peccah dt’oï; ny-yeih t’ou shelg son my vioys dy ghoaill eh.

¹² Dy jean y Chiarn briwnys eddyr mish as uss, as lhig da’n Chiarn cooilleeney ’ghoaill ort: agh er my hon’s, cha bee my laue ort.

¹³ Cordail rish raa yn chenndeeaght, Ta olk cheet veih’n olk: agh ort’s cha bee my laue.

¹⁴ Quoi ny lurg ta ree Israel er jeet magh? quoi eh t’ou geiyrt er? er moddey marroo, er jargan.

¹⁵ Dy bee yn Chiarn er-y-fa shen ny vriw, as dy jean eh briwnys eddyr mish as uss, as fakin, as goaill seose my chooish, as m’y livrey ass dty laue.

¹⁶ As haink eh gy-kione, erreish da David v’er loayrt ny goan shoh rish Saul, dy dooyrt Saul, Nee shoh’n choraa ayd’s, my vac Ghavid? As hrog Saul seose e choraa as cheayn eh.

¹⁷ As dooyrt eh rish David, T’ou uss ny s’cairal na ta mish: son t’ou er chooilleeney mie dooys, son yn olk ren mish kiarail dt’oï’s.

¹⁸ As t’ou er hoilshaghey dou yn laa shoh kys t’ou er ghellal dy mie rhym; ayns nagh ren oo m’y varroo, tra ren y Chiarn mish y livrey ayns dty laue.

¹⁹ Son my ta dooinney geddyn e noid, jean eh yn raad y lhiggey da? Dy jean y Chiarn er-y-fa shen uss y chooilleeney dy mie son ny t’ou er n’yannoo rhym er y laa shoh.

²⁰ As nish cur-my-ner, ta fys aym dy mie, dy bee uss dy jarroo yn ree, as dy bee reeriaght Israel er ny niartaghey ayns dty laue.

²¹ Cur dty vreearrey dou er-y-fa shen liorish y Chiarn, nagh giare oo jeh my luight my yeï, as nagh jean oo my ennym y stroie ass thie m’ayrey.

²² As hug David e vreearrey da Saul. As hie Saul roish gys e hie: agh hie David as e gheiney seose gys nyn ynnydyn lajer dy hauchys.