1 Samuel 21 - Yn Vible Casherick 1775 1819

CAB. XXI

¹ Eisht haink David gys Nob, gys Ahimelech yn saggyrt: as va aggle er Ahimelech dy veeiteil David, as dooyrt eh rish, Kys te dy vel oo dty-lomarcan, as nagh vel dooinney erbee mayrt?

² As dooyrt David rish Ahimelech y saggyrt, Ta mee currymit ayns byssness liorish y ree, ta er ghra rhym, Ny lhig da fys ve ec dooinney erbee er y chooish t’ou mysh, ny cre ta er dty churrym: as ta mee er n’oardaghey my heshaght gys lheid as lheid y boayl.

³ Nish er-y-fa shen cre ta fo dty laue? cur dou queig bwilleenyn arran ayns my laue, ny cre-erbee t’ayd aarloo.

⁴ As dreggyr y saggyrt David, as dooyrt eh, Cha vel yn arran cadjin fo my laue; agh ta arran casherick liorym; my ta ny deiney aegey er vreayll ad-hene veih mraane.

⁵ As dreggyr David y saggyrt, as dooyrt eh rish, Son firrinys cha vel mraane er ve mârin rish ny three laghyn shoh, neayr’s haink mee magh, as ta kirp ny deiney aegey glen, as ta’n arran nish myr dy beagh eh cadjin, son ta arran elley ec y traa shoh er ny chasherickey er y voayrd.

⁶ Er shoh hug y saggyrt yn arran casherick da; son cha row arran erbee ayns shen, agh yn arran casherick, v’er ny scughey veih fenish y Chiarn, dy chur arran noa ’syn ynnyd er y laa ve er ny ghoaill ersooyl.

⁷ Nish va dooinney dy row jeh sharvaantyn Saul cooilleeney e vreearrey fenish y Chiarn er y laa cheddin, as va’n ennym echey Doeg, ny Edomite, mainshtyr bochillyn Saul.

⁸ As dooyrt David rish Ahimelech, Vel ayd ayns shoh fo dty laue shleiy ny cliwe? son cha vel mee er chur lhiam my chliwe, ny my wappinyn mârym, er son dy row sarey’n ree jeean.

⁹ As dooyrt y saggyrt, Cur-my-ner ta cliwe Gholiath yn Philistine, ren uss y varroo ayns coan Elah, ayns shoh soilit ayns coodagh cooyl yn ephod: my-haittin lhiat shen, gow eh; son cha vel cliwe erbee arragh ayns shoh. As dooyrt David, Cha vod ny share ve ayn; cur dou eh.

¹⁰ As hrog David er, as chossyn eh ersooyl yn laa shen ayns aggle roish Saul, as hie eh gys Achish ree Ghath.

¹¹ As dooyrt sharvaantyn Achish rish, Nagh nee shoh David ree yn cheer? nagh ren ad arraneyn y ghoaill ry-cheilley my-e-chione ’sy daunsin, gra, Ta Saul er varroo e housaneyn, as David e yeih thousaneyn?

¹² As ghow ny goan shoh greme dowin ayns cree Ghavid, as v’eh ayns aggle feer vooar roish Achish ree Ghath.

¹³ As ren eh e ymmyrkey ’chaghlaa kiongoyrt roo, as lhig eh er dy row eh ass e cheeayll, as rouail lesh e laueyn er coollaghyn y yiat, as lhiggey da’n shelley echey shilley sheese er e aasaag.

¹⁴ Eisht dooyrt Achish rish e harvaantyn, Cur-my-ner, ta shiu fakin nagh vel y dooinney er hene: cre’n-fa eisht ta shiu er chur lhieu eh hym’s?

¹⁵ Cre t’aym’s dy yannoo rish deiney keoïe, dy vel shiu er chur lhieu yn fer shoh dy chloie yn ommydan ayns my enish? jig e lheid shoh stiagh my hie?