1 Samuel 19 - Yn Vible Casherick 1775 1819

CAB. XIX

¹ As loayr Saul rish Jonathan e vac, as rish ooilley e phobble, ad dy varroo David.

² Agh v’ec Jonathan mac Saul lane taitnys ayns David: as dinsh Jonathan da David, gra, Ta Saul m’ayr shirrey dy dty varroo: nish er-y-fa shen, ta mee guee ort, gow kiarail jeed hene derrey’n voghrey, as fuirree ayns ynnyd follit, as jean oo-hene y cheiltyn:

³ As hem’s magh as shass-ym liorish my ayr ’sy vagher raad t’ou follit, as loayr-ym rish m’ayr my-dty-chione; as cre-erbee yioym magh insh-ym dhyt.

⁴ As loayr Jonathan fockle mie son David rish Saul e ayr, as dooyrt eh rish, Ny lhig da’n ree peccah yannoo noi e harvaant, noi David; er-yn-oyr nagh vel eh er n’yannoo peccah dt’oï, as er-yn-oyr dy vel eh er hirveish oo dy firrinagh.

⁵ Son hug eh e vioys ayns e laue, as varr eh yn Philistine, as dobbree’n Chiarn saualtys mooar son Israel: honnick oo-hene eh, as ghow boggey jeh; cre’n-fa eisht, nee oo aggair y yannoo noi fuill gyn-loght, dy varroo David gyn oyr?

⁶ As deaisht Saul rish coraa Yonathan: as loo Saul, Myr ta’n Chiarn bio, cha bee eh er ny varroo.

⁷ As deïe Jonathan er David, as dinsh eh da ooilley ny reddyn shen: as hug Jonathan lesh David gys Saul, as v’eh ayns yn eanish echey myr v’eh roïe.

⁸ As va caggey ayn reesht: as hie David magh, as ren eh caggey rish ny Philistinee, as ren eh traartys mooar ny-vud oc; as roie ad er-chea voish.

⁹ As va’n spyrryd olk veih’n Chiarn er Saul, myr v’eh ny hoie ayns e hie, as shleiy ny laue: as chloie David lesh e laue.

¹⁰ As hir Saul dy woalley David eer gys y voalley lesh y shleiy; agh lheim eh dy lhiattee veih feanish Saul, as woaill eh yn shleiy stiagh ’sy voalley: as chossyn David ersooyl, as haue eh eh-hene yn oie shen.

¹¹ Hug Saul myrgeddin chaghteryn gys thie Ghavid, dy lhie fo-chlea er e hon, as dy varroo eh sy voghrey: as dinsh Michal ben Ghavid da, gra, Mannagh gow kiarail jeh dty vioys noght, mairagh bee oo er dty varroo.

¹² Er shoh lhig Michal David sheese trooid uinniag: as hie eh er-chea, as shoh myr scaap eh.

¹³ As ghow Michal jalloo, as hug ee eh ayns y lhiabbee, as hug ee pillow dy gheaysh ghoair son bolstyr, as hug ee eaddagh harrish.

¹⁴ As tra hug Saul chaghteryn dy ghoaill David, dooyrt ee, T’eh ching.

¹⁵ As hug Saul ny chaghteryn reesht dy yeeaghyn David, gra, Cur-jee lhieu seose eh hym’s ayns y lhiabbee myr t’eh, dy voddym eh y varroo.

¹⁶ As tra va ny chaghteryn er jeet stiagh, cur-my-ner, va jalloo ayns y lhiabbee, lesh pillow dy gheaysh ghoair son e volstyr.

¹⁷ As dooyrt Saul rish Michal, Cre’n-fa t’ou myr shoh er my volley, as er lhiggey’n raad da my noid, dy vel eh er scapail? As dreggyr Michal Saul, Dooyrt eh rhym, Lhig dou goll; er-nonney marr-ym oo.

¹⁸ Er shoh chossyn David ersooyl lesh e vioys, as haink eh gys Samuel ec Ramah, as dinsh eh da ooilley ny va Saul er n’yannoo rish: as hie eh-hene as Samuel, as ren ad cummal ayns Naioth.

¹⁹ As ve inshit da Saul, gra, Cur-my-ner, ta David ee Naioth ayns Ramah.

²⁰ As hug Saul chaghteryn dy ghoaill David: as tra honnick ad y cheshaght dy adeyryn phadeyrys, as Samuel ny hassoo myr mainshtyr harrystoo, haink Spyrryd Yee er chaghteryn Saul, as ren adsyn phadeyrys myrgeddin.

²¹ As tra ve inshit da Saul, hug eh chaghteryn elley, as ren adsyn myrgeddin phadeyrys: as hug Saul chaghteryn reesht y trass cheayrt, as ren adsyn myrgeddin phadeyrys.

²² Eisht hie eh-hene myrgeddin gys Ramah, as haink eh gys y chibbyr vooar t’ec Sechu, as dênee eh, as dooyrt eh, C’raad ta Samuel as David? As dooyrt fer, Cur-my-ner, t’ad ec Naioth liorish Ramah.

²³ As hie eh gys Naioth liorish Ramah, as va Spyrryd Yee ersyn myrgeddin, as hie eh er e hoshiaght phadeyrys, derrey haink eh gys Naioth liorish Ramah.

²⁴ As cheau eh jeh e choamrey reeoil myrgeddin, as ren eh phadeyrys kiongoyrt rish Samuel er yn aght cheddin, as lhie eh sheese gyn coamrey ooilley’n laa shen, as ooilley’n oie shen. Shen-y-fa, jir ad, Vel Saul myrgeddin mastey ny phadeyryn?