1 Samuel 18 - Yn Vible Casherick 1775 1819

CAB. XVIII

¹ As haink eh gy-kione tra v’eh erreish loayrt rish Saul, dy row annym Yonathan as annym Ghavid sniemmit dy cheilley, as bynney lesh Jonathan eh myr yn annym echey hene.

² As ghow Saul eh yn laa cheddin, as cha lhiggagh eh da goll roish arragh gys thie e ayrey.

³ Eisht ren Jonathan as David conaant ry-cheilley, er-yn-oyr dy bynney lesh eh myr e annym hene.

⁴ As ghow Jonathan yn coamrey v’er hene, as hug eh er David eh, as ooilley e gharmadyn, eer gys e chliwe, as gys e vhow, as gys e chryss-caggee.

⁵ As hie David magh [ayns caggey] raad erbee dy dug Saul eh, as ren eh gymmyrkey eh hene dy tastagh: as hoie Saul eh harrish ny deiney-caggee; as v’eh ayns ard foayr rish ooilley’n pobble, as myrgeddin rish fir-oik Saul.

⁶ As shoh myr ve, tra haink ad back, lurg da David ve er varroo yn Philistine, dy daink ny mraane ass ooilley ard-valjyn Israel, goaill arraneyn, as daunsin, dy veeiteil ree Saul, lesh tabretyn, lesh gennallys, as lesh greïnyn-kiaullee.

⁷ As dreggyr ny mraane yn derrey yeh yn jeh elley myr v’ad cloie, as dooyrt ad, Ta Saul er varroo e housaneyn, as David e yeih thousaneyn.

⁸ As va Saul feer chorree, as hug y raa shoh sou er e aigney; as dooyrt eh, Gys lieh Ghavid t’ad er choyrt jeih thousaneyn, as my lieh’s cha vel ad er choyrt agh thousaneyn: as cre smoo baillish nish agh y reeriaght?

⁹ As va drogh hooill ec Saul er David veih’n laa shen magh.

¹⁰ As haink eh gy-kione ny lurg shoh, dy daink spyrryd olk veih Jee er Saul, as v’eh branlaadee ayns mean e hie; as ren David cloie lesh e laue, myr bollagh eh: as va shleiy ayns laue Saul.

¹¹ As hilg Saul y shleiy; son dooyrt eh, bwoaill-ym David lesh eer gys y voalley. As chossyn David ass e hilley daa cheayrt.

¹² As va Saul ayns aggle roish David, er-yn-oyr dy row’n Chiarn mârish, as dy row eh er hreigeil Saul.

¹³ Er-y-fa shen ren Saul eh y scughey foddey voish, as hug eh magh eh ny chaptan harrish thousane: as hie eh magh as haink eh stiagh lesh aïgh mie roish y pobble.

¹⁴ As ren David gymmyrkey eh-hene dy creeney ayns ooilley e raaidyn: as va’n Chiarn mârish.

¹⁵ Shen-y-fa tra honnick Saul dy row eh gymmyrkey eh-hene feer chreeney, v’eh ayns aggle roish.

¹⁶ Agh va cree ooilley Israel as Yudah soit er David, er-yn-oyr dy row ooilley e yannoo, ayns goll magh as cheet stiagh mâroo, cheet lesh dy mie.

¹⁷ As dooyrt Saul rish David, Cur-my-ner, my inneen shinney Merab, ish ver-ym dhyt son ben; ynrycan bee uss dunnal er my hon, as jean caggey ayns lieh’n Chiarn: son dooyrt Saul, Ny lhig da my laue’s ve er, agh lhig da tuittym liorish laueyn ny Philistinee.

¹⁸ As dooyrt David rish Saul, Quoi mish? as cre ta my vea, ny lught-thie m’ayrey ayns Israel, dy beign mac-’sy-leigh yn ree?

¹⁹ Agh haink eh gy-kione, ec y traa va Merab inneen Saul dy ve er ny choyrt da David, dy row ee er ny choyrt da Adriel yn Meholathite son ben.

²⁰ As va Michal inneen Saul ayns graih rish David: as dinsh ad shoh da Saul, as by-haittin lesh eh.

²¹ As dooyrt Saul, Ver-yms ee da dy ve son ribbeh da, as dy vod laue ny Philistinee ve n’oï. Shen-y-fa dooyrt Saul rish David, Bee uss jiu my vac-’sy-leigh lesh unnane jeh’n jees.

²² As hug Saul sarey da e harvaantyn, gra, Loayr-jee rish David dy follit, as abbyr-jee, Cur-my-ner, ta’n ree goaill taitnys aynyd, as shinney lesh ooilley e harvaantyn oo: nish er-y-fa shen, bee uss mac-’sy-leigh yn ree.

²³ As loayr sharvaantyn Saul ny goan cheddin ayns clashtyn Ghavid. As dooyrt David, Vel shiu jeeaghyn er myr red fardalagh dy ve mac-’sy-leigh da ree, fakin dy vel mish my ghooinney boght, as beg soit jee’m.

²⁴ As dinsh sharvaantyn Saul da, gra, Shoh myr loayr David.

²⁵ As dooyrt Saul, Myr shoh jir shiu rish David, Cha vel y ree shirrey toghyr erbee, agh keead chymmylt jeh ny Philistinee, dy ghoaill cooilleeney er noidyn y ree. Agh smooinee Saul dy chur er David tuittym liorish laue ny Philistinee.

²⁶ As tra va e harvaantyn er n’insh da David ny goan shoh, dy by-haittin lesh David dy ve mac-’sy-leigh yn ree: as cha lhig eh shaghey.

²⁷ Shen-y-fa dirree David, as hie eh-hene as e gheiney, as varr eh jeh ny Philistinee daa cheead dooinney; as hug David lesh ny chymmyltyn oc, as hug eh stiagh ad ayns slane coontey da’n ree, dy voddagh eh ve mac-’sy-leigh da’n ree. As hug Saul Michal e inneen da son ben.

²⁸ As honnick Saul, as ghow eh tastey dy row’n Chiarn marish David, as dy bynney lesh Michal inneen Saul eh.

²⁹ As son shoh va Saul foast ayns aggle smoo roish David; as haink Saul dy ve noid David dy kinjagh.

³⁰ Eisht hie princeyn ny Philistinee magh dy chaggey: as haink eh gy-kione, erreish daue v’er n’gholl magh, dy ren David gymmyrkey eh-hene ny s’dunnal na ooilley sharvaantyn Saul; myr shen dy row’n ennym echey dy mooar soit jeh.