1 Samuel 16 - Yn Vible Casherick 1775 1819

CAB. XVI

¹ As dooyrt y Chiarn rish Samuel, Caïd nee oo dobberan son Saul, fakin dy vel mish er yiooldey rish veih reill harrish Israel? Lhieen dty eairk lesh ooil, as immee; ver-yms oo gys Jesse yn Beth-lehemite: son ta mee er chiarail dou hene ree mastey e vec.

² As dooyrt Samuel, Kys oddym goll? my chlinnys Saul jeh, nee eh m’y varroo. As dooyrt y Chiarn, Gow colbagh mayrt, as abbyr, Ta mee cheet dy hebbal oural gys y Chiarn.

³ As jean Jesse y chuirrey gys yn oural, as soilshee-yms dhyt cre t’ayd dy yannoo: as nee oo eshyn y ooilaghey neem’s genmys dhyt.

⁴ As ren Samuel myr loayr y Chiarn, as haink eh gys Beth-lehem: as va shanstyr y valley ayns imnea tra haink eh, as dooyrt ad, Vel oo cheet dy sheeoil?

⁵ As dooyrt eh, Dy sheeoil: ta mee er jeet dy hebbal oural gys y Chiarn; jean-jee shiu-hene y chasherickey, as tar-jee mârym gys yn oural. As va Jesse as e vec er nyn gasherickey, as chuir eh ad gys yn oural.

⁶ As haink eh gy-kione, tra v’ad er jeet, dy yeeagh eh er Eliab, as smooinee eh rish hene, Son shickyrys ta fer-ooilit y Chiarn kiongoyrt rish.

⁷ Agh dooyrt y Chiarn rish Samuel, Ny jeeagh er e eddin, ny cre cha thollee t’eh; son dy vel mee er n’obbal eh; son cha vel y Chiarn fakin, myr ta dooinney fakin; son ta dooinney briwnys cordail rish ny t’eh fakin, agh ta’n Chiarn fakin y cree.

⁸ Eisht deïe Jesse er Abinadab, as hug eh er goll kiongoyrt rish Samuel. As dooyrt eh, Chamoo ta’n Chiarn er reih eh shoh.

⁹ Eisht hug Jesse er Shammah dy gholl shaghey. As dooyrt eh, Chamoo ta’n Chiarn er reih eh shoh.

¹⁰ Reesht, hug Jesse er shiaght jeh e vec dy ve fenish Samuel. As dooyrt Samuel rish Jesse, Cha vel y Chiarn er reih ad shoh.

¹¹ As dooyrt Samuel rish Jesse, Nee ad shoh ooilley dty chloan? As dooyrt eh, Ta foast fer saa n’ad shoh, as cur-my-ner, t’eh bochillagh ny kirree. As dooyrt Samuel rish Jesse, Cur fys er e hon: son cha soie mayd gys y voayrd derrey hig eh.

¹² As hug eh fys er e hon, as hug eh lesh stiagh eh. Nish v’eh ruishagh, as dy eddin aalin, as stoamey dy yeeaghyn er. As dooyrt y Chiarn, Irree, jean eh y ooilaghey, son shoh’n dooinney.

¹³ Eisht ghow Samuel yn eairk dy ooil, as ren eh eh y ooilaghey er-lheh veih e vraaraghyn: as haink Spyrryd y Chiarn er David veih’n laa shen magh. Myr shen dirree Samuel, as hie eh gys Ramah.

¹⁴ Agh ren Spyrryd y Chiarn Saul y hreigeil, as v’eh seaghnit lesh spyrryd dy olkys veih’n Chiarn.

¹⁵ As dooyrt sharvaantyn Saul rish, Cur-my-ner nish, ta spyrryd dy olkys veih Jee dy dty voirey.

¹⁶ Lhig da nyn jiarn nish goardaghey dty harvaantyn, dy vriaght son dooinney schleioil dy chloie er y chlaasagh: as hig eh gy-kione, tra vees y spyrryd olk shoh ort veih Jee, dy jean eh cloie lesh e laue, as yiow couyr.

¹⁷ As dooyrt Saul rish e harvaantyn, Fow-jee dou nish claaseyder mie, as cur-jee lhieu eh hym.

¹⁸ Eisht dreggyr fer jeh ny sharvaantyn, as dooyrt eh, Cur-my-ner, ta mee er vakin fer jeh mee Jesse yn Beth-lehemite, dy vel eh cloieder schleioil, as dooinney feer dunnal, as dooinney caggee, as tushtagh ayns cooishyn, as persoon stoamey, as ta’n Chiarn mârish.

¹⁹ Shen-y-fa hug Saul chaghteryn gys Jesse, as dooyrt eh, Cur hym’s David dty vac, ta marish ny kirree.

²⁰ As ghow Jesse lught assyl dy arran, as boteil feeyney, as mannan, as hug eh ad lesh David e vac gys Saul.

²¹ As haink David gys Saul, dy hirveish eh: as v’eh ayns ard foayr rish; as haink eh dy ve ny armyder fo.

²² As hug Saul fys gys Jesse, gra, Lhig da David, ta mee guee ort, shassoo kiongoyrt rhym; son t’eh er gheddyn foayr ayns my hilley.

²³ As haink eh gy-kione, tra haink y doghan dy aigney seaghnit veih Jee er Saul, dy ghow David claasagh, as chloie eh lesh e laue: myr shen va Saul er ny ooraghey, as hooar eh couyr, as va fea echey veih’n drogh-spyrryd.