1 Samuel 14 - Yn Vible Casherick 1775 1819

CAB. XIV

¹ Nish va laa dy row, dy dooyrt Jonathan mac Saul rish y dooinney aeg e armyder, Tar, as lhig dooin goll harrish gys garrison ny Philistinee, ta er y cheu elley. Agh va shoh gyn-yss da e ayr.

² As va Saul ’sy chione elley jeh Gibeah, fo billey-pomegranate ayns Migron: as va earroo’n pobble va mârish mysh shey cheead dooinney;

³ As myrgeddin Ahiah mac Ahitub, braar I-chabod, mac Phinehas, mac Eli, saggyrt y Chiarn ayns Shiloh, coamrit lesh yn ephod. As cha dennee yn pobble dy row Jonathan er n’immeeaght.

⁴ As eddyr ny raaidyn coon ghow Jonathan dy chosney harrish gys gard ny Philistinee, va carrick ard brishtagh er dagh cheu: as va ennym y derrey yeh Bozez, as ennym y jeh elley Seneh.

⁵ Va oaie yn derrey yeh lesh y twoaie jeeragh er Michmash, as yn jeh elley lesh y jiass jeeragh er Gibeah.

⁶ As dooyrt Jonathan rish y dooinney aeg e armyder, Tar, as lhig dooin goll harrish gys garrison ny chymmyltee shoh: foddee eh ve dy jean y Chiarn gobbraghey er nyn son: son te’n un chooid da’n Chiarn dy hauail liorish mooarane ny liorish beggan.

⁷ As dooyrt yn armyder rish, Jean ooilley ny t’ayns dty chree; chyndaa raad sailt; cur-my-ner, ta mish mayrt cordail rish dty aigney.

⁸ Eisht dooyrt Jonathan, Cur-my-ner, hed mayd harrish gys ny deiney shoh, as shin hene y hoilshaghey daue.

⁹ My jir ad myr shoh rooin, Fuirree-jee derrey hig mayd hiu; eisht shass mayd raad ta shin, as cha jem mayd seose huc.

¹⁰ Agh my jir ad myr shoh, Tar-jee seose hooin; eisht hed mayd seose: son ta’n Chiarn er livrey ad gys nyn laue; as bee shoh son cowrey dooin.

¹¹ As ren ad ny-neesht ad-hene y hoilshaghey da gard ny Philistinee: as dooyrt ny Philistinee, Cur-my-ner, ta ny Hebrewnee cheet magh ass ny tuill raad dollee ad ad-hene.

¹² As dreggyr deiney’n gharrison Jonathan as e armyder, as dooyrt ad, Tar-jee seose hooin, as jeeagh mayd red ennagh diu. As dooyrt Jonathan rish e armyder, Tar seose my yeï; son ta’n Chiarn er livrey ad gys laue Israel.

¹³ As ren Jonathan drappal seose er e laueyn as er e chassyn, as e armyder ny yeï: as v’ad er nyn yiarey sheese roish Jonathan; as varr yn armyder geiyrt er.

¹⁴ As y chied slaughter shen ren Jonathan as e armyder, ve mysh feed dooinney, ayns mygeayrt lieh acre hallooin, oddagh cubbyl dy ghew y hraaue.

¹⁵ As va’n cheshaght-chaggee as ooilley’n pobble er-creau fud y vagheragh: va’n garrison as ny roosteyryn er-creau myrgeddin; as va craa-hallooin ayn: myr shen dy row craa feer atchimagh ny-vud oc.

¹⁶ As yeeagh arreyderyn Saul ayns Gibeah jeh Benjamin, as cur-my-ner, va’n cheshaght lheïe ersooyl, as hie ad er nyn doshiaght bwoalley sheese yn derrey yeh yn jeh elley.

¹⁷ Eisht dooyrt Saul rish y pobble va mârish, Gow-jee earroo’n sleih, dy yeeaghyn quoi t’er n’gholl voïn. As tra v’ad er ghoaill y coontey, cur-my-ner, cha row Jonathan as e armyder ayns shen.

¹⁸ As dooyrt Saul rish Ahiah, Cur lhiat gys shoh arg Yee: (son va arg Yee ec y traa shen marish cloan Israel.)

¹⁹ As haink eh gy-kione choud’s va Saul loayrt rish y taggyrt, dy ren y tharmane va ayns sheshaght-caggee ny Philistinee troggal as goaill niart ny syrjey as ny syrjey: as dooyrt Saul rish y taggyrt, Cum dty laue.

²⁰ As ren Saul as ooilley’n pobble va mârish ad-hene y haglym cooidjagh, as haink ad gys y chaggey: as cur-my-ner, va cliwe dagh dooinney noi e heshey, as va cragh dewil ny-vud oc.

²¹ As ny Hebrewnee va marish ny Philistinee roish y traa shen, hie seose mâroo gys y champ, hyndaa adsyn myrgeddin dy ve er cheu ny Israeliteyn va marish Saul as Jonathan.

²² Myrgeddin ooilley deiney Israel, va er cheiltyn ad-hene ayns slieau Ephraim, tra cheayll ad dy row ny Philistinee er roie er-chea, deiyr adsyn myrgeddin chion orroo ’sy chaggey.

²³ Myr shoh ren y Chiarn Israel y hauail yn laa cheddin: as hie ad er nyn doshiaght caggey choud’s Beth-aven.

²⁴ As va deiney Israel fo seaghyn yn laa shen: son dy row Saul er choyrt y pobble fo sarey chion, gra, Cursit dy row’n dooinney ghoys monney erbee dy veaghey derrey’n astyr, dy voddym cooilleeney ’ghoaill er my noidyn: myr shen cha ren veg jeh’n pobble goaill greme dy veaghey.

²⁵ As haink ooilley’n pobble gys keyll, raad va mill er y thalloo.

²⁶ As tra va’n pobble er jeet stiagh ’sy cheyll, cur-my-ner, ren y vill shilley; agh cha dug dooinney erbee e laue gys e veeal: son va’n pobble fo aggle yn mollaght.

²⁷ Agh cha geayll Jonathan dy row e ayr er choyrt y pobble fo’n sarey, shen-y-fa heeyn eh magh baare y lorg v’echey ayns e laue, as hum eh eh ayns kere-volley, as hug eh e laue gys e veeal; as va e hooillyn er nyn niartaghey.

²⁸ Eisht dreggyr fer jeh’n pobble, as dooyrt eh, Hug dt’ayr yn pobble fo sarey chion, lesh breearrey, gra, Cursit dy row’n dooinney ta goaill veg y veaghey yn laa shoh. As va’n pobble faiynt.

²⁹ Eisht dooyrt Jonathan, Ta my ayr er voirey’n cheer: jeeagh-jee, ta mee guee erriu, kys ta my hooillyn er nyn niartaghey, neayr’s vlasht mee kuse jeh’n vill shoh.

³⁰ Nagh foddey bare dooin, dy beagh y pobble jiu er n’ee dy arryltagh jeh spooilley nyn noidyn t’ad er ghoaill? nagh beagh nish cragh foddey smoo mastey ny Philistinee?

³¹ As woaill ad ny Philistinee yn laa shen veih Michmash derrey Aijalon: as va’n pobble slane tooillit.

³² Er shoh roie’n pobble er y spooilley, as ghow ad kirree, as dew, as lheiyee, as ren ad y varroo ad er y thalloo: as d’ee yn pobble jeu lesh yn uill.

³³ Eisht dinsh ad da Saul, gra, Cur-my-ner, ta’n pobble jannoo peccah noi’n, Chiarn, ayns dy vel ad gee yn eill lesh yn uill. As dooyrt eh, Ta shiu er n’yannoo dy aggairagh: rowl-jee nish hym ayns shoh clagh vooar.

³⁴ As dooyrt Saul, Immee-jee mastey’n pobble, as abbyr-jee roo, Cur-jee lhieu hym gys shoh dy chooilley ghooinney e ghow, as dy chooilley ghooinney e cheyrrey, as marr-jee ad ayns shoh, as ee-jee; as ny jean-jee peccah noi’n Chiarn ayns gee lesh yn uill. As hug ooilley’n pobble lhieu dy chooilley ghooinney e ghow mârish yn oie shen, as ren ad y varroo ad ayns shen.

³⁵ As hrog Saul altar gys y Chiarn: shen va’n chied altar hrog eh gys y Chiarn.

³⁶ As dooyrt Saul, Lhig dooin goll sheese er-eiyrt’s ny Philistinee ’syn oie, as ad y spooilley derrey’n vadran; as ny lhig dooin dooinney jeu y aagail bio. As dooyrt ad, Jean myr s’mie lhiat. Eisht dooyrt y saggyrt, Lhig dooin ayns shoh tayrn er-gerrey gys Jee.

³⁷ As hir Saul coyrle er Jee, Jem seose er-eiyrt’s ny Philistinee? jean uss ad y livrey gys laue Israel? Agh cha dug eh ansoor da er y laa shen.

³⁸ As dooyrt Saul, Tayrn-jee er-gerrey ooilley shiuish ard-gheiney’n pobble: as lhig dooin briaght as fakin; quoi by-chyndagh rish y peccah shoh jiu:

³⁹ Son myr ta’n Chiarn bio, ta sauail Israel, ga dy beagh eh ayns Jonathan my vac, bee eh dy shickyr er ny choyrt gy-baase. Agh cha row dooinney mastey ooilley’n pobble hug ansoor da.

⁴⁰ Eisht dooyrt eh rish ooilley Israel, Bee-jee shiuish er y derrey heu, as beem’s as Jonathan my vac er y cheu elley. As dooyrt y pobble rish Saul, Jean myr s’mie lhiat hene.

⁴¹ Eisht dooyrt Saul rish y Chiarn Jee Israel, Cur dooin cowrey cronnal. As haink y cowrey magh er Saul as Jonathan: agh va’n pobble er nyn seyrey.

⁴² As dooyrt Saul, Tilg-jee lottyn eddyr mish as Jonathan my vac. As va Jonathan goit.

⁴³ Eisht dooyrt Saul rish Jonathan, Insh dou, cre t’ou er n’yannoo. As dinsh Jonathan da, as dooyrt eh, Cha ren mee agh blashtyn jeh kuse fardalagh dy vill er baare y lorg v’ayns my laue, as cur-my-ner, ta mee dy hurranse baase.

⁴⁴ As dreggyr Saul, Shoh as ny smoo dy der Jee orrym; mannagh bee oo er dty choyrt gy-baase, Yonathan.

⁴⁵ As dooyrt y pobble rish Saul, Bee Jonathan er ny choyrt gy-baase, ta er n’obbraghey lheid y varriaght mooar shoh ayns Israel? Ny lhig eh Jee: myr ta’n Chiarn bio, cha jean un renaig jeh e chione tuittym gys y thalloo; son t’eh er n’obbraghey marish Jee yn laa shoh. Myr shen ren y pobble Jonathan y hauail, nagh dooar eh baase.

⁴⁶ Eisht hie Saul seose veih geiyrt er ny Philistinee, as hie ny Philistinee gys nyn ynnyd hene.

⁴⁷ Myr shen ghow Saul yn reiltys harrish Israel, as ren eh caggey noi ooilley e noidyn er dy chooilley heu, noi Moab, as noi cloan Ammon, as noi Edom, as noi reeaghyn Zobah, as noi ny Philistinee: as cre-erbee yn raad hyndaa eh, hooar eh yn varriaght.

⁴⁸ As haggil eh sheshaght-caggee, as woaill eh ny Amalekiteyn, as ren eh Israel y livrey ass ny laueyn ocsyn va roïe er spooilley ad.

⁴⁹ Nish va mec Saul, Jonathan, as Ishui, as Melchi-shua: as shoh va enmyn y daa inneen echey; ennym yn unnane shinney Merab, as ennym yn unnane saa Michal:

⁵⁰ As va ennym ben Saul Ahinoam, inneen Ahimaaz: as va ennym captan e heshaght-chaggee, Abner mac Ner, naim Saul.

⁵¹ As Kish va ayr Saul; as va Ner, ayr Abner mac Abiel.

⁵² As va caggey dewil noi ny Philistinee ooilley laghyn Saul: as raad chronnee Saul dooinney trean erbee, ny dooinney dunnal, ghow eh ad son sidooryn fo hene.