1 Samuel 10 - Yn Vible Casherick 1775 1819

CAB. X

¹ Eisht ghow Samuel boteil dy ooil, as gheayrt eh eh er e chione, as phaag eh eh, as dooyrt eh, Nagh vel eh er-yn-oyr dy vel y Chiarn er dty ooilaghey dy ve captan harrish e eiraght?

² Erreish dhyt’s ve er m’aagail jiu, eisht yiow daa ghooinney liorish lhiaght Rachel, ayns ardjyn Venjamin, ec Zelzah; as jir ad rhyt, Ta ny assylyn v’ou uss briaght nyn yeï er ny gheddyn: as cur-my-ner, cha nee son ny assylyn ta imnea dt’ayrey nish, agh t’eh ayns trimshey er nyn son hene, gra, Cre’n erree t’er jeet er my vac?

³ Eisht heu er dty hoshiaght veih shen, as hig oo gys thalloo-rea Tabor, as ayns shen hig three deiney dty whail goll seose dy hirveish Jee gys Beth-el, fer jeu cur lesh three mannanyn, fer elley three bwilleenyn arran, as yn er elley boteil feeyney:

⁴ As nee ad dty vannaghey, as ver ad dhyt daa willeen arran, nee oo y ghoaill veih nyn laueyn.

⁵ Lurg shen, hig oo gys cronk Yee, raad ta garrison ec ny Philistinee: as hig eh gy-kione tra t’ou er roshtyn choud shen gys yn ard-valley, dy jig dty whail sheshaght d’adeyryn, cheet neose veih’n ard-ynnyd, lesh psalteree, as drum, as feddan, as claasagh, rhymboo, goaill arraneyn-moyllee.

⁶ As hig Spyrryd y Chiarn ort hene, as gowee oo arraneyn-moyllee mâroo, as bee oo er dty chaghlaa gys dooinney elley.

⁷ As hig eh gy-kione, tra hig ny cowraghyn shoh ort, dy jean uss gymmyrkey oo-hene myr vees feme rish; son ta Jee mayrt.

⁸ As hed oo sheese roym’s gys Gilgal; as cur-my-ner, hig-yms sheese hood, dy hebbal ourallyn-losht, as ourallyn-shee: shiaght laa nee oo farkiagh, derrey hig-ym, dy chur royd cre nee oo y yannoo.

⁹ As shen myr ve, tra hyndaa eh dy gholl voish Samuel, dy dug Jee cree noa da: as haink ooilley ny cowraghyn cheddin gy-kione er y laa shen.

¹⁰ As tra v’ad er jeet gys y chronk, cur-my-ner, haink sheshaght d’adeyryn ny whail; as va Spyrryd Yee er, as ghow eh arraneyn-moyllee mâroo.

¹¹ As haink eh gy-kione tra honnick e ainjyssee dy row eh myr phadeyr mastey ny phadeyryn, dy dooyrt y pobble ry-cheilley, Cre shoh t’er jeet harrish mac Kish? Vel Saul myrgeddin mastey ny phadeyryn?

¹² As dreggyr fer, as dooyrt eh, Agh quoi e ayr? Shen-y-fa haink eh dy ve shenn-raa, Vel Saul myrgeddin mastey ny phadeyryn?

¹³ As tra va’n chirveish shoh harrish, hie eh gys yn ard-ynnyd.

¹⁴ As dooyrt naim Saul rishyn, as rish e harvaant, Cre’n raad hie shiu? As dooyrt eh, Dy yeeaghyn lurg ny assylyn: as tra honnick shin nagh row ad ry-gheddyn, haink shin gys Samuel.

¹⁵ As dooyrt naim Saul, Insh dou, ta mee guee ort, cre dooyrt Samuel riu.

¹⁶ As dooyrt Saul rish e naim, Dinsh eh dooin dy firrinagh dy row ny assylyn er ny gheddyn. Agh jeh cooish y reeriaght, my-e-chione loayr Samuel rish, cha loayr eh fockle.

¹⁷ As ren Samuel sumney yn pobble fenish y Chiarn gys Mizpeh;

¹⁸ As dooyrt eh rish cloan Israel, Myr shoh ta’n Chiarn Jee Israel gra, Hug mee lhiam Israel seose ass Egypt, as livrey mee shiu veih ny Egyptianee, as veih pooar dy chooilley reeriaght, as vouesyn ren tranlaase erriu:

¹⁹ As ta shiuish yn laa jiu er hyndaa cooyl rish yn Jee eu, ren shiu y livrey ass ooilley nyn arkys as seaghyn: as dooyrt shiu rish, Cha nee myr shen; agh cur dooin ree dy reill harrin. Nish er-y-fa shen, shass-jee fenish y Chiarn cordail rish ny tribeyn, as ny thousaneyn eu.

²⁰ As tra doardee Samuel ooilley tribeyn Israel dy heet kionfenish, huitt y lot er tribe Venjamin.

²¹ Tra v’eh er choyrt er tribe Venjamin dy heet kionfenish lurg nyn lught-thie, huitt y lot er lught-thie Matri, as haink y lot magh er Saul mac Kish: as tra yeeagh ad er e hon, cha row eh ry-gheddyn.

²² Shen-y-fa vrie ad jeh’n Chiarn ny sodjey, darragh y dooinney kionfenish. As dreggyr y Chiarn, Cur-my-ner, t’eh er cheiltyn eh-hene mastey’n stoo.

²³ As roie ad, as hug ad lhieu eh veih shen: as tra v’eh ny hassoo mastey’n pobble, v’eh ny s’thollee na veg jeh’n pobble, seose veih e gheayltyn.

²⁴ As dooyrt Samuel rish ooilley’n pobble, Cur-jee my-ner yn dooinney ta’n Chiarn er reih, nagh vel e lheid mastey ooilley’n pobble: As deïe ooilley’n pobble, as dooyrt ad, Dy bannee Jee yn ree.

²⁵ Eisht dinsh Samuel da’n pobble cre’n aght veagh stayd y reeriaght, as ren eh scrieu eh ayns lioar, as hasht eh seose eh ayns cabbane-agglish y Chiarn. As hug Samuel ooilley yn pobble ersooyl, dy chooilley ghooinney gys e hie hene.

²⁶ As hie Saul myrgeddin thie gys Gibeah, as gard dy gheiney-caggee mârish, ny creeaghyn oc va Jee er jyndaa dy ve lesh.

²⁷ Agh dooyrt cloan Velial, Kys nee ’n dooinney shoh shinyn y livrey? As hoie ad beg jeh, as cha dug ad lhieu gioot erbee huggey: agh cha lhig eh monney er.