1 Samuel 1 - Yn Vible Casherick 1775 1819

CAB. I

¹ Nish va dooinney dy row jeh Ramathaim-zophim, jeh slieau Ephraim, as va’n ennym echey Elkanah, mac Jehoram, mac Elihu, mac Tohu, mac Zuph, ny Ephrathite:

² As va daa ven echey; va ennym y derrey yeh Hannah, as ennym y jeh elley Peninnah: as va cloan ec Peninnah, agh va Hannah gyn cloan.

³ As hie yn dooinney shoh seose ass e ard-valley dagh bleïn dy choyrt ooashley, as dy hebbal oural gys y Chiarn dy heshaght-flaunyss, ayns Shiloh. As va daa vac Eli, Hophni as Phinehas, saggyrtyn y Chiarn ayns shen.

⁴ As tra va Elkanah chebbal oural, hug eh ayrnyn jeh da Peninnah e ven, as da ooilley ny mec as ny inneenyn eck.

⁵ Agh da Hannah hug eh ayrn dooble; son bynney lesh Hannah: agh va’n Chiarn er vreayll ee veih gymmyrkey cloan.

⁶ As ren ish va geadaghey mooee myrgeddin brasnaghey ee dy floutagh, gys sproght yn chree eck, er-yn-oyr, nagh row’n Chiarn er choyrt jee cloan.

⁷ As myr ren eh shoh dy chooilley vleïn, tra hie ad seose gys thie’n Chiarn, shoh myr ren ee brasnaghey ee; shen-y-fa cheayn ee, as cha goghe ee beaghey.

⁸ Eisht dooyrt Elkanah e sheshey r’ee, Hannah, cre’n-fa t’ou keayney? as cre’n-fa nagh vel oo gee? as cre’n-fa ta dty chree seaghnit? nagh vel mish ny share dhyt na jeih mec?

⁹ Myr shen dirree Hannah erreish daue v’er n’ee as n’iu ayns Shiloh: (nish hoie Eli yn saggyrt er stoyl-briwnys liorish pillar ayns cabbane-agglish y Chiarn:)

¹⁰ As v’ee ayns sherriuid anmey, as ghow ee padjer gys y Chiarn, as cheayn ee dy sharroo.

¹¹ As ren ee breearrey, as dooyrt ee, O Hiarn dy heshaght-flaunyss, my nee oo dy jarroo jeeaghyn er seaghyn dty inney-veyl, as cooinaghtyn orrym, as nagh jarrood oo dt’inney-veyl, agh dy der oo da dt’inney-veyl lhiannoo-mac, eisht neem’s eh y chasherickey gys y Chiarn ooilley laghyn e vea, as cha jig razor er e chione.

¹² As haink eh gy-kione, myr v’ee tannaghtyn dy jeean ayns padjer gys y Chiarn dy dug Eli tastey da ny meillyn eck.

¹³ Nish va Hannah loayrt r’ee hene ayns e cree, agh va ny meillyn eck goll, ga nagh row yn choraa eck er ny chlashtyn: er-y-fa shen, heill Eli dy row ee er-meshtey.

¹⁴ As dooyrt Eli r’ee, Caïd vees oo myr shoh er-meshtey? cur voïd y feeyn.

¹⁵ As dreggyr Hannah, as dooyrt ee, Cha nee shen myr te, my hiarn; ta mish ben dy chree seaghnit; cha vel mee er n’iu feeyn ny jough lajer, agh ta mee er n’yannoo m’accan jeean gys y Chiarn.

¹⁶ Ny gow dt’inney-veyl dy ve inneen Velial: son veih mooadys my hrimshey as my heaghyn ta mee ec y traa shoh er hebbal my phadjer.

¹⁷ Eisht dreggyr Eli, as dooyrt eh, Immee royd ayns shee: as dy giall Jee Israel dhyt yn aghin t’ou yeearree veih.

¹⁸ As dooyrt ee, Lhig da dt’inney-veyl geddyn foayr ayns dty hilley. Myr shen hie yn ven rhymbee, as ren ee gee, as cha row trimshey ny sodjey ry-akin urree.

¹⁹ As dirree ad seose dy moghey, as hug ad ooashley kiongoyrt rish y Chiarn, as hyndaa ad, as haink ad gys nyn dhie hene ayns Ramah: as ren Elkanah gerjaghey Hannah e ven, as chooinee’n Chiarn urree.

²⁰ Shen-y-fa haink eh gy-kione, lurg da Hannah v’er yientyn, as y traa eck er jeet, dy ren ee mac y ymmyrkey, as denmys ee eh Samuel, gra, Er-yn-oyr dy vel mee er yeearree eh veih’n Chiarn.

²¹ As hie’n dooinney Elkanah, as ooilley e hie, seose dy hebbal gys y Chiarn yn oural-bleeaney, as e vreearrey.

²² Agh cha jagh Hannah seose mâroo, son dooyrt ee rish e sheshey, Fuirree-ym derrey vees yn lhiannoo charbaït, as eisht ver-ym lhiam eh, dy hebbal eh fenish y Chiarn, dy hirveish eh choud s’bio eh.

²³ As dooyrt Elkanah e sheshey r’ee, Jean dt’aigney; fuirree derrey vees oo er harbaa eh; as dy jean y Chiarn yn goo echey hene ’chooilleeney. Myr shen duirree’n ven, as hug ee keeagh da e mac, derrey v’eh charbaït.

²⁴ As tra v’ee er harbaa eh, ghow ee eh seose mâree, as three dew, as un ephah dy flooyr, as saagh feeyney, as hug ee lh’ee eh gys thie yn Chiarn ayns Shiloh: as va’n lhiannoo aeg.

²⁵ As varr ad dow, as hug ad lhieu yn lhiannoo gys Eli.

²⁶ As dooyrt ee, Oh my hiarn; myr ta dty annym bio, my hiarn, she mish y ven hass liort’s ayns shoh, goaill padjer gys y Chiarn.

²⁷ Son y lhiannoo shoh va my aghin; as ta’n Chiarn er chooilleeney my yeearree:

²⁸ Shen-y-fa ta mish myrgeddin er eeasagh eh da’n Chiarn; choud’s vees eh bio bee eh eeasit da’n Chiarn, As hug ad ooashley da’n Chiarn ayns shen.