1 Reeaghyn 7 - Yn Vible Casherick 1775 1819

CAB. VII

¹ Agh va Solomon three bleeaney jeig troggal e hie hene, as va’n thie slane cummit.

² Hrog eh neesht thie keylley Lebanon; va’n lhiurid echey keead cubit, as yn lheead echey jeih cubityn as da-eed, as yn yrjid echey jeih cubityn as feed; as kiare roaghyn dy phillaryn cedar, lesh beamyn cedar er ny pillaryn.

³ As ve coodit lesh cedar erskyn ny beamyn, va nyn lhie er queig pillaryn as da-eed, queig-jeig ayns roa.

⁴ As va uinniagyn ayns three roaghyn, as va soilshey noi soilshey ayns three roaghyn.

⁵ As va ooilley ny coollaghyn as ny essynyn square rish ny uinniagyn; as va soilshey noi soilshey ayns three roaghyn.

⁶ As ren eh porch dy phillaryn, va’n lhiurid echey jeih cubityn as da-eed, as yn lheead echey jeih cubityn as feed: as va’n porch cordail roo; as va ny pillaryn elley, as y beam lajer cordail roo.

⁷ Eisht ren eh porch son y stoyl-briwnys, veih shen dy hirveish briwnys, eer yn porch-quaallagh: as ve coodit lesh cedar, veih’n derrey heu jeh’n laare gys y cheu elley.

⁸ As va cooyrt elley cheu-sthie jeh porch y thie, raad v’eh cummal, va jeh’n obbyr cheddin. Hrog Solomon myrgeddin thie da inneen Pharaoh (v’eh er ghoaill son ben,) goll-rish y phorch shoh.

⁹ V’ad shoh ooilley jeant jeh claghyn costal, cordail rish towse ny claghyn cummit saauit lesh saaueyn er dagh cheu, eer veih’n undin gys mullagh y voalley, as myr shoh er cheu-mooie lesh y chooyrt vooar.

¹⁰ As va’n undin jeant jeh claghyn costal, eer claghyn mooarey; claghyn jeh jeih cubityn, as claghyn jeh hoght cubityn.

¹¹ As va’n mullagh jeant jeh claghyn costal, (lurg towse ny claghyn cummit,) as cedaryn.

¹² As va’n chooyrt vooar ooilley mygeayrt jeant lesh three roaghyn dy chlaghyn cummit, as roa dy veamyn cedar, chammah son y chooyrt sodjey stiagh jeh thie’n Chiarn, as son porch y thie.

¹³ As hug Solomon fys, as hug eh lesh Hiram veih Tyre.

¹⁴ V’eh mac ben-treoghe jeh sheeloghe Naphtali, as va e ayr dooinney jeh Tyre, ny obbree ayns prash: as v’eh jeant magh lesh creenaght as tushtey, as schleioil ayns obbraghyn prashey. As haink eh gys ree Solomon, as ghow eh ayns laue yn slane obbyr.

¹⁵ Son ren eh roie daa phillar dy phrash, hoght cubityn jeig y pheesh ayns yrjid; as va dagh pillar jeu daa chubit jeig mygeayrt.

¹⁶ As ren eh daa attey dy phrash roit, dy hoiaghey er mullagh ny pillaryn: va yrjid dagh attey queig cubityn:

¹⁷ As lieenteenyn dy obbyr chequer, as feeaghyn dy obbyr-linkyn son ny atteeyn va soit er mullagh ny pillaryn; shiaght son dagh attey.

¹⁸ As ren eh ny pillaryn, as daa roa mygeayrt er y derrey obbyr-lieeney, dy choodaghey ny atteeyn v’er y vullagh, lesh pomegranateyn: as shoh myr ren eh son yn attey elley.

¹⁹ As va ny atteeyn v’er mullagh ny pillaryn jeant jeh cummey lilee foshlit ayns y phorch, kiare cubityn.

²⁰ As va pomegranateyn neesht er mullagh ny atteeyn er y daa phillar, jeeragh er y voogh va liorish yn obbyr-lieen: as va ny pomegranateyn daa cheead, ayns roaghyn ooilley mygeayrt er yn attey elley.

²¹ As hoie eh seose ny pillaryn ayns porch y chiamble: as hoie eh seose yn pillar yesh, as ren eh genmys eh Jachin; as hoie eh seose yn pillar chiare, as ren eh genmys eh Boaz.

²² As er mullagh ny pillaryn va obbyr casley rish lilee: myr shoh va jerrey er obbyr ny pillaryn.

²³ As ren eh keayn roit y yannoo, jeh jeih cubityn veih’n derrey oirr gys yn oirr elley: ve ooilley mygeayrt runt, as va’n yrjid echey queig cubityn: as va’n slane combaase echey jeih cubityn as feed ooilley mygeayrt.

²⁴ As fo’n oirr echey runt mygeayrt va knoppyn soit mysh, jeih ayns cubit, combaasal yn cheayn mygeayrt: va ny knoppyn soit ayns daa roa tra ve roit.

²⁵ Ve soit er daa ghow jeig, three jeeaghyn lesh y twoaie, as three lesh y sheear, as three lesh y jiass, as three lesh y shiar: as va’n keayn soit er y dreeym oc, as va ooilley’n lieh jerree oc sthie fo e vean.

²⁶ As ve lheead-bass er cheeid, as va’n beeal echey obbrit myr beeal cappan, lesh blaa lileeyn: ve goaill daa housane bath.

²⁷ As ren eh jeih stuill [ny binkyn] dy phrash: kiare cubityn va lhiurid un stoyl, as kiare cubityn yn lheead echey, as three cubityn yn yrjid echey.

²⁸ As va ny stuill obbrit er yn aght shoh: va boarderyn orroo, as va ny boarderyn eddyr ny rimmaghyn:

²⁹ As er ny boarderyn va eddyr ny rimmaghyn va lionyn, dew, as cherubim: as er ny rimmaghyn va stoyl er-nyn-skyn: as fo ny lionyn as ny dew va slane obbyr thanney elley er ny obbraghey.

³⁰ As va fo dagh stoyl kiare queeylyn dy phrash, as plaityn prashey: as va cassyn fo ny kiare corneilyn echey; fo’n tubbyr va cassyn roit, ec lhiattee dagh unnane jeu.

³¹ As va’n beeal echey, cheu-sthie jeh’n attey as er-y-skyn, lheead cubit: as va’n beeal echey runt, obbrit myr y stoyl, ayns cubit dy lieh; as myrgeddin er y veeal echey va grainnit boarderyn kiare-square, cha nee runt.

³² As fo ny boarderyn va kiare queeylyn; as va essyl ny queeylyn soit ’sy stoyl, as va yrjid queeyl cubit dy lieh.

³³ As va obbyr ny queeylyn casley rish obbyr queeyl fainagh; va ny essylyn oc, as ny rhollanyn oc, as ny croughyn oc, as ny spakyn oc ooilley roit.

³⁴ As va kiare cassyn gys kiare corneilyn un stoyl: as va ny cassyn jeant jeh’n un stoo.

³⁵ As ayns mullagh y stoyl va combaase runt lieh cubit er yrjid: as er mullagh yn stoyl, va ny rimmaghyn, as ny boarderyn echey, yn un chooid.

³⁶ Son er plaityn ny rimmaghyn, as er ny boarderyn ren eh grainnaghey cherubim, lionyn, as biljyn-palm, cordail rish cummey dagh unnane oc; as reddyn elley ooilley mygeayrt.

³⁷ Er yn aght shoh ren eh ny jeih stuill: v’ad ooilley roit er yn un aght, jeh’n un towse, as yn un thummyd.

³⁸ Eisht ren eh jeih tubbyryn prashey: va un saagh goaill da-eed bath: as va dagh saagh kiare cubityn: as er dagh unnane jeh ny jeih stuill va soit un saagh.

³⁹ As hug eh queig stuill er cheu yesh y thie, as queig er cheu chiare y thie; as hoie eh yn keayn er cheu yesh y thie lesh y shiar, my-yiass.

⁴⁰ As ren Hiram jannoo ny tubbyryn, as ny sleaystyn aile, as ny basonyn. Myr shoh hug Hiram kione er ooilley’n obbyr ren eh da ree Solomon son thie’n Chiarn.

⁴¹ Yn daa phillar, as yn daa voogh ny atteeyn v’er mullagh yn daa phillar; as yn daa obbyr-lieen, dy choodagh daa voogh ny atteeyn v’er mullagh ny pillaryn;

⁴² As kiare cheead pomegranate son y daa obbyr-lieen, dy jarroo daa roa dy phomegranateyn son un obbyr-lieen, dy choodaghey daa voogh ny atteeyn va soit er ny pillaryn;

⁴³ As ny jeih binkyn, as ny jeih tubbyryn v’er ny binkyn;

⁴⁴ As un cheayn, as daa ghow jeig fo’n cheayn;

⁴⁵ As ny pooiyt, as ny sleaystyn, as ny basonyn: as ooilley ny siyn shoh, va Hiram er n’yannoo da ree Solomon son thie yn Chiarn, v’ad jeant jeh prash sollys.

⁴⁶ Ayns thalloo-rea Yordan ren y ree ad y lheïe, ayns y thalloo craie eddyr Succoth as Zarthan.

⁴⁷ As daag Solomon ooilley ny siyn gyn towse, er-yn-oyr dy row ad erskyn coontey: chamoo va towse yn phrash er ny gheddyn magh.

⁴⁸ As ren Solomon ooilley ny siyn va bentyn gys thie’n Chiarn: yn altar airh, as yn boayrd airh, orroo va’n arran casherick soit.

⁴⁹ As ny kainlereyn dy airh ghlen, queig er y cheu yesh, as queig er y cheu chiare kiongoyrt rish yn ynnyd casherick, marish ny blaaghyn, as ny lampyn, as ny cloughyn airh,

⁵⁰ As ny meilaghyn, as ny smalyderyn, as ny basonyn, as ny spainyn, as ny censeryn dy airh ghlen; as ny jeushanyn airhey, chammah son dorryssyn yn thie sodjey stiagh, yn ynnyd smoo casherick, as son dorryssyn y thie, ta shen, yn chiamble.

⁵¹ Myr shoh va kione er ooilley yn obbyr ren ree Solomon y yannoo son thie’n Chiarn. As hug Solomon lesh stiagh yn stoo va David e ayr er chasherickey; ta shen, yn argid, as yn airh, as ny siyn, hug eh mastey tashtaghyn thie’n Chiarn.