1 Reeaghyn 6 - Yn Vible Casherick 1775 1819

CAB. VI

¹ As haink eh gy-kione, er y chiarroo cheead as kiare-feed bleïn lurg da cloan Israel v’er jeet ass thalloo Egypt, er y chiarroo vleïn jeh reill Solomon harrish Israel, ayns y vee Zif, ta’n nah vee, ghow eh toshiaght dy hroggal thie’n Chiarn.

² As yn thie hrog ree Solomon da’n Chiarn, va’n lhiurid echey three-feed cubit, as yn lheead echey feed cubit, as yn yrjid echey jeih cubityn as feed.

³ As va’n porch roish chiamble y thie feed cubit er lhiurid, cordail rish lheead y thie: as jeih cubityn va’n lheead echey er eddin y thie.

⁴ As er y thie ren eh uinniagyn cooie son soilshey.

⁵ As noi voalley’n thie hrog eh shamyryn ooilley mygeayrt, rish voallaghyn y thie mygeayrt, chammah jeh’n chiamble as jeh’n ynnyd smoo casherick: as ren eh shamyryn ooilley mygeayrt.

⁶ Va’n chiamyr s’inshley queig cubityn er lheead, as va’n chiamyr meanagh shey cubityn er lheead, as va’n trass shiaght cubityn er lheead: son cheu-mooie ayns voalley’n thie ren eh lhiaghtyn coon ooilley mygeayrt, son nagh beagh ny beamyn soit ayns voallaghyn y thie.

⁷ As va’n thie, tra ve dy hroggal, er ny hroggal lesh clagh v’er ny chummey roish my daink eh gys shen: myr shen nagh row oayrd, ny teigh, ny greïe yiarn erbee, er ny chlashtyn ’sy thie choud as ve dy hroggal.

⁸ Va’n dorrys son y chiamyr veanagh er cheu yesh y thie: as hie ad seose er greeshyn cassee ’sy chiamyr veanagh, as ass y chiamyr veanagh hie ad stiagh ’sy trass.

⁹ Myr shoh hrog eh yn thie, as hug eh kione er; as choodee eh yn thie lesh beamyn as buird cedar.

¹⁰ As eisht hrog eh shamyryn noi ooilley’n thie queig cubityn er yrjid: as v’ad soit er y thie lesh fuygh-cedar.

¹¹ As haink goo’n Chiarn gys Solomon, gra,

¹² Mychione yn thie shoh t’ou dy hroggal, my nee oo shooyl ayns my lattyssyn, as cooilleeney my vriwnyssyn, as freaylley ooilley my haraghyn, dy immeeaght ayndoo; eisht neem’s my ghoo y chooilleeney rhyt, loayr mee rish David dty ayr:

¹³ As nee’m cummal mastey cloan Israel, as cha dreig-ym my phobble Israel.

¹⁴ Myr shoh hrog Solomon y thie, as hug eh mullagh er.

¹⁵ As hrog eh voallaghyn y thie cheu-sthie lesh buird cedar, chammah laare y thie as ceelyn ny voallaghyn: as choodee eh ad er cheu-sthie lesh fuygh, as choodee eh laare y thie lesh plankyn-juys.

¹⁶ As hrog eh feed cubit er lhiatteeyn y thie, chammah’n laare as ny voallaghyn, lesh buird cedar; hrog eh ad dy jarroo er y hon cheu-sthie, ta shen dy ghra, son yn ynnyd casherick, eer son yn ynnyd smoo casherick.

¹⁷ As va’n thie, ta shen dy ghra, yn chiamble kiongoyrt rish, da-eed cubit er lhiurid.

¹⁸ As va’n cedar cheu-sthie jeh’n thie grainnit lesh knoppyn as poseeyn ayns blaa: va ooilley cedar; cha row clagh erbee ry-akin.

¹⁹ As ren eh cummey cheu-sthie jeh’n thie yn ynnyd casherick, dy hoiagh ayn arg conaant y Chiarn.

²⁰ As va’n ynnyd casherick cheu-veealloo feed cubit er lhiurid, as feed cubit er lheead, as feed cubit er yrjid: as choodee eh eh lesh airh ghlen; as myrgeddin choodee eh yn altar va jeant jeh cedar.

²¹ Myr shoh choodee Solomon cheu-sthie’n thie lesh airh ghlen: as ren eh partition liorish ny linkyn airh roish yn ynnyd casherick; as choodee eh harrish eh lesh airh.

²² As choodee eh yn slane thie harrish lesh airh, derrey v’eh er chur kione er ooilley’n thie: myrgeddin yn slane altar va liorish yn ynnyd casherick choodee eh harrish lesh airh.

²³ As cheu-sthie jeh’n ynnyd casherick ren eh daa cherubim dy villey-olive, dagh unnane jeu jeih cubityn er yrjid.

²⁴ As queig cubityn va’n derrey skian y cherub, as queig cubityn va’n skian elley y cherub: veih baare yn un skian gys baare yn skian elley va jeih cubityn.

²⁵ As va’n cherub elley jeih cubityn: va’n daa cherubim jeh’n un towse, as jeh’n un thummyd.

²⁶ Va yrjid yn derrey cherub jeih cubityn, as myr shen va’n cherub elley.

²⁷ As hoie eh ny cherubim ’sy thie sodjey stiagh; as ren ny cherubim sheeyney magh nyn skianyn, myr shen dy ren skian yn derrey yeh roshtyn gys yn derrey voalley, as ren skian yn cherub elley roshtyn gys y voalley elley; as ren ny skianyn oc roshtyn dy cheilley ayns mean y thie.

²⁸ As choodee eh harrish ny cherubim lesh airh.

²⁹ As ren eh cummey ooilley voallaghyn y thie mygeayrt lesh caslyssyn grainnit cherubim, as biljyn-palm, as poseeyn ayns blaa, cheu-sthie as cheu-mooie.

³⁰ As laare y thie choodee eh harrish lesh airh, cheu-sthie as cheu-mooie.

³¹ As son dorrys yn ynnyd casherick ren eh coollaghyn dy villey-olive: va’n lindeer as ny essynyn yn wheiggoo ayrn jeh’n voalley.

³² Va’n daa choolley myrgeddin jeant jeh billey-olive: as ren eh grainnaghey orroo caslyssyn cherubim, biljyn-palm, as poseeyn ayns blaa, as choodee eh ad harrish lesh airh, as skeayl eh airh er ny cherubim, as er ny biljyn-palm.

³³ Myr shoh neesht ren eh son dorrys y chiamble, essynyn dy villey-olive, yn chiarroo ayrn jeh’n voalley.

³⁴ As va’n daa ghorrys jeh billey-juys: va daa choolley yn derrey ghorrys filley er y cheilley, as va daa choolley yn dorrys elley filley er y cheilley.

³⁵ As ren eh grainnaghey orroo cherubim, as biljyn-palm, as poseeyn ayns blaa; as choodee eh ad lesh airh soit er yn obbyr grainnit.

³⁶ As hrog eh yn chooyrt sodjey stiagh lesh three roaghyn dy chlagh cummit, as roa dy veamyn cedar.

³⁷ ’Sy chiarroo vleïn va undin thie’n Chiarn soit, er y vee Zif:

³⁸ As ’syn un vleïn jeig, er y vee Bul, (ta shen yn hoghtoo vee,) va’n thie slane troggit trooid magh ooilley ny ayrnyn echey, as cordail rish ooilley’n cummey echey. Myr shen ve shiaght bleeaney dy hroggal: