1 Reeaghyn 5 - Yn Vible Casherick 1775 1819

CAB. V

¹ As hug Hiram ree Tyre e harvaantyn er chaghteraght gys Solomon; (son v’eh er chlashtyn dy row ad er ooilaghey eh ny ree ayns ynnyd e ayr;) son va Hiram rieau ny charrey da David.

² As hug Solomon fys gys Hiram, gra,

³ Ta fys ayd kys nagh voddagh David my ayr thie y hroggal gys ennym y Chiarn e Yee, kyndagh rish ny caggaghyn va mygeayrt-y-mysh er dagh cheu, derrey hug y Chiarn ad fo bun e choshey.

⁴ As nish ta’n Chiarn my Yee er choyrt fea dooys er dagh cheu, myr shen nagh vel edyr noid ny olk ayns my raad.

⁵ As cur-my-ner, ta mee kiarail thie y hroggal gys ennym y Chiarn my Yee, myr loayr y Chiarn rish David my ayr, gra, Nee dty vac neem’s y hoiaghey er dty stoyl-reeoil ayns dty ynnyd thie y hroggal gys my ennym.

⁶ Shen-y-fa nish cur uss sarey dy jean ad giarey sheese dooys biljyn-cedar ayns Lebanon; as bee my harvaantyn marish dty harvaantyn’s: as ver-ym faill dhyt son dty harvaantyn, cordail rish dty raa hene: son ta fys ayd nagh vel veg ny mast’ ainyn ta schleioil fuygh y yiarey myr ny Sidonianee.

⁷ As haink eh gy-kione, tra cheayll Hiram goan Solomon, dy ghow eh lane boggey, as dooyrt eh, Bannit dy row’n Chiarn er y laa shoh, t’er choyrt da David mac creeney harrish yn pobble mooar shoh.

⁸ As hug Hiram fys gys Solomon, gra, Ta mee er n’ghoaill gys my smooinaghtyn ny reddyn hug uss fys hym er nyn son: as cooilleen-ym ooilley dty yeearree son y fuygh-cedar, as son y fuygh-juys.

⁹ Ver my harvaantyn lhieu ad neose veih Lebanon gys y cheayn; as ver-ym lhiam ad er y cheayn ayns raftyn gys y boayl nee oo pointeil dou, as ver-ym ad er thalloo ayns shen, as nee uss ad y ghoaill: as nee oo yn yeearree aym’s y chooilleeney liorish coyrt beaghey da my vooinjer.

¹⁰ Myr shen hug Hiram da Solomon biljyn-cedar as biljyn-juys, cordail rish ooilley e yeearree.

¹¹ As hug Solomon da Hiram feed thousane towse dy churnagh son beaghey da e vooinjer, as feed thousane towse dy ooil ghlen: myr shoh hirveish Solomon Hiram dagh bleïn.

¹² As hug y Chiarn creenaght da Solomon, myr yiall eh da: as va shee eddyr Hiram as Solomon; as ren adsyn ny-neesht conaant ry-cheilley.

¹³ As hrog ree Solomon sheshaght reiht ass ooilley Israel; as va’n cheshaght jeih thousaneyn as feed dy gheiney.

¹⁴ As hug eh ad gys Lebanon, jeih thousaneyn ’sy vee dagh keayrt: v’ad mee ayns Lebanon, as daa vee ec y thie: as va Adoniram soit harrish y cheshaght.

¹⁵ As va ec Solomon three-feed as jeih thousaneyn va gymmyrkey erraghyn, as kiare-feed thousane ry-hoi giarey fuygh ayns ny sleityn:

¹⁶ Cheu-mooie jeh ard-oaseiryn Solomon va harrish yn obbyr, three thousaneyn as three cheead, va reill harrish yn pobble va laboragh ’syn obbyr.

¹⁷ As hug y ree sarey, as hug ad lhieu claghyn mooarey, claghyn aalin costal, as claghyn cummit, dy hoiagh undin y thie.

¹⁸ As ren masoonee Solomon as masoonee Hiram ad y chleiy, mâroosyn va cummey ny claghyn: myr shoh hooar ad aarloo fuygh as claghyn dy hroggal y thie.