1 Reeaghyn 4 - Yn Vible Casherick 1775 1819

CAB. IV

¹ Myr shen va ree Solomon ny ree er ooilley Israel.

² As ad shoh va ny princeyn va fo; Azariah, mac Zadok yn saggyrt;

³ Elihoreph as Ahiah, mec Shisha, scrudeyryn; Jehoshaphat mac Ahilud, yn recortysser.

⁴ As va Benaiah mac Jehoiada harrish y cheshaght-chaggee; as Zadok as Abiathar va ny saggyrtyn.

⁵ As va Azariah mac Nathan harrish ny fir-oik; as Zabud mac Nathan va’n ard fer-oik, as carrey’n ree;

⁶ As va Ahishar harrish y lught-thie; as Adoniram mac Abda harrish ny keeshyn.

⁷ As v’ec Solomon daa fir-oik jeig harrish ooilley Israel, va goaill kiarail son beaghey da’n ree as lught e hie; dagh dooinney mee ’sy vleïn dy ghoaill kiarail.

⁸ As shoh va ny enmyn oc: Mac Hur, ayns cronk Ephraim.

⁹ Mac Dekar, ayns Makaz, as ayns Shaalbim, as Beth-shemesh, as Elon-beth-hanan.

¹⁰ Mac Hesed, ayns Aruboth; fosyn va Sochoh, as ooilley thalloo Hepher.

¹¹ Mac Abinadab, ayns ooilley cheer Dor; echey va Taphath inneen Solomon son ben.

¹² Baana, mac Ahilud; fosyn va Taanach as Megiddo, as ooilley Beth-shean, ta liorish Zartanah liorish Jezreel, veih Beth-shean gys Abel-meholah, eer gys yn ynnyd t’er cheu elley jeh Jokneam.

¹³ Mac Geber ayns Ramoth-gilead; fosyn va baljyn Jair mac Vanasseh, t’ayns Gilead: fosyn va myrgeddin cheer Argob t’ayns Bashan, three-feed dy ard-valjyn mooarey lesh voallaghyn, as boltyn prashey.

¹⁴ Va Mahanaim fo Ahinadab mac Iddo.

¹⁵ Va Ahimaaz ayns Naphtali; ghow eh myrgeddin Basmath inneen Solomon son ben.

¹⁶ Va Baanah mac Hushai ayns Asher as ayns Aloth.

¹⁷ Jehoshaphat mac Paruah ayns Issachar.

¹⁸ Shimei mac Elah ayns Benjamin.

¹⁹ Va Geber mac Uri ayns cheer Ghilead, ayns cheer Sihon ree ny Amoriteyn, as Og ree Vashan; as eh va’n ynrycan fir-oik va ’sy cheer.

²⁰ Va Judah as Israel ymmodee, myr genniagh ny marrey ayns earroo, gee as giu, as jannoo gien mie.

²¹ As ren Solomon reill harrish dy chooilley reeriaght veih’n awin gys cheer ny Philistinee, as gys cagliagh Egypt: hug ad lhieu giootyn, as hirveish ad Solomon ooilley laghyn e vea.

²² As va beaghey Solomon son un laa jeih towseyn as feed dy flooyr veein, as three-feed towse dy veinn,

²³ Jeih muirht, as feed dow ass nyn aber, keead keyrrey, marish feeaih fyrryn as bwoirryn jeh dy chooilley horch, as eeanlee roauyrey.

²⁴ Son va reiltys echey harrish ooilley’n cheer er cheu shoh jeh’n awin, veih Tiphsah eer gys Azzah, harrish ooilley ny reeaghyn cheu shoh jeh’n awin: as va shee echey er dy chooilley heu mygeayrt-y-mysh.

²⁵ As ren Judah as Israel baghey dy sauchey, dy chooilley ghooinney fo e villey-feeyney as fo e villey-figgagh hene, veih Dan eer gys Beer-sheba, rish slane lhing Solomon.

²⁶ As va da-eed thousane manjoor cour cabbil ec Solomon son e ainee, as daa housane jeig dy varkee.

²⁷ As chiare ny fir-oik shoh beaghey cour ree Solomon, as cour ooilley ny haink gys boayrd ree Solomon, dagh dooinney ’sy vee echey: cha row ad laccal nhee erbee.

²⁸ Oarn myrgeddin as coonlagh son ny cabbil as ny dromedareeyn hug ad lhieu gys yn ynnyd raad va ny fir-oik, dagh dooinney cordail rish e churrym.

²⁹ As hug Jee da Solomon creenaght as tushtey erskyn towse, as feoiltys cree, eer myr y gheinnagh ta rish oirr ny marrey.

³⁰ As va creenaght Solomon erskyn creenaght ooilley cloan y cheer har, as ooilley creenaght Egypt.

³¹ Son v’eh ny s’creeney na dooinney erbee; na Ethan yn Ezrahite, as Heman, as Chalcol, as Darda, mec Mahol: as hie goo jeh trooid ooilley ny cheeraghyn mygeayrt.

³² As loayr eh three thousaneyn dy raaghyn creeney: as va e arraneyn thousane as queig.

³³ As hug eh coontey jeh biljyn, veih’n billey-cedar t’ayns Lebanon eer gys y hyssop ta gaase ass y voall: hug eh coontey myrgeddin jeh beiyn, as jeh eeanlee, as jeh ny beishteigyn snauee, as jeh eeastyn.

³⁴ As haink sleih veih dy chooilley ard dy eaishtagh rish creenaght Solomon, veih ooilley reeaghyn y thallooin, va er chlashtyn jeh e chreenaght.