1 Reeaghyn 3 - Yn Vible Casherick 1775 1819

CAB. III

¹ As ren Solomon cleunys rish Pharaoh ree Egypt, as ghow eh inneen Pharaoh, as hug eh lesh ee gys ard-valley Ghavid, derrey v’eh er n’yannoo kione er troggal e hie hene, as thie’n Chiarn, as voalley Yerusalem runt mygeayrt.

² Agh dy ren y pobble oural y hebbal ayns ny ard-ynnydyn, er-yn-oyr nagh row thie troggit gys ennym y Chiarn gys y traa shoh.

³ As hug Solomon graih da’n Chiarn, as huill eh ayns slattyssyn Ghavid e ayr: magh voish dy ren eh chebbal as lostey oural-incense er ny ard-ynnydyn.

⁴ As hie yn ree gys Gibeon dy hebbal oural ayns shen; son shen va’n ard-ynnyd mooar: thousane dy ourallyn-losht heb Solomon er yn altar shen.

⁵ Ayns Gibeon ren y Chiarn eh-hene y hoilshaghey da Solomon ayns ashlish ’syn oie: as dooyrt Jee, Shir cre ver-ym dhyt.

⁶ As dooyrt Solomon, T’ou er hoilshaghey da dty harvaant David my ayr myghin mooar, myr ren eh gimmeeaght kiongoyrt rhyt’s ayns firrinys, as ayns cairys, as ayns ynrickys cree mayrt; as t’ou uss er reayll ny chour yn chenjallys vooar shoh, dy vel oo er choyrt mac da dy hoie er e stoyl-reeoil, myr te ’sy laa t’ayn jiu.

⁷ As nish, O Hiarn my Yee, t’ou er n’yannoo dty harvaant ny ree ayns ynnyd Ghavid my ayr: as cha vel mee agh myr lhiannoo; cha vel tushtey aym kys dy gholl magh, ny dy heet stiagh [roish y pobble shoh].

⁸ As ta dty harvaant ayns mean dty phobble t’ou er reih; pobble mooar nagh vod ve er nyn earroo, ny coontit, t’ad whilleen.

⁹ Cur er-y-fa shen da dty harvaant cree tushtagh, dy vriwnys dty phobble, dy voddym cronnaghey eddyr mie as sie: son quoi ta abyl dy vriwnys ad shoh dty phobble ta cha earrooagh?

¹⁰ As ren y ghlare shoh yn Chiarn y wooiys, dy row Solomon er yeearree lheid y red shoh.

¹¹ As dooyrt Jee rish, Er-yn-oyr dy vel oo er yeearree shoh, as nagh vel oo er hirrey dhyt hene bea veayn, ny er hirrey berchys er dty hon hene, ny er hirrey bioys dty noidyn; agh er yeearree dhyt hene tushtey dy chur briwnys;

¹² Cur-my-ner, ta mee er n’yannoo cordail rish dty ghoan: jeeagh, ta mee er choyrt dhyt cree creeney as tushtagh, myr shen nagh row unnane erbee roish dty hraa casley rhyt, chamoo dty lurg nee unnane erbee troggal seose corrym rhyt.

¹³ As ta mee myrgeddin er choyrt dhyt shen nagh vel oo er hirrey, chammah berchys as ooashley; myr shen nagh bee unnane erbee mastey ny reeaghyn casley rhyt ooilley dty laghyn.

¹⁴ As my nee oo shooyl ayns my raaidyn, dy reayll my lattyssyn as my haraghyn, myr ren dty ayr David, eisht nee’m dty laghyn dy ve beayn.

¹⁵ As ghooisht Solomon; as cur-my-ner, she ashlish v’ayn. As haink eh gys Jerusalem, as hass eh kiongoyrt rish arg conaant y Chiarn, as heb eh ourallyn-losht, as heb eh ourallyn-shee, as ren eh cuirraghyn da ooilley ny fir-oik echey.

¹⁶ Eisht haink daa ven oainjyragh gys y ree, as hass ad kiongoyrt rish.

¹⁷ As dooyrt y derrey ven, O my hiarn, ta mish as y ven shoh cummal ’syn un thie; as va mee er my livrey jeh lhiannoo mâree ’sy thie.

¹⁸ As haink eh gy-kione er y trass laa lurg dou ve er my livrey, dy row’n ven shoh er ny livrey neesht: as va shin cooidjagh; cha row joarree erbee mârin, agh shin hene ny-neesht ’sy thie.

¹⁹ As hooar lhiannoo yn ven shoh baase ’syn oie; kyndagh dy ren ee lhie er.

²⁰ As ren ee girree ec y vean-oie, as ghow ee my vac’s veih my lhiattee, tra va dty inney-veyl ny cadley, as ghow ee eh ’syn oghrish eck, as hug ee yn lhiannoo marroo eck hene ’syn oghrish aym’s.

²¹ As tra dirree mee ’sy voghrey dy chur keeagh da my lhiannoo, cur-my-ner, v’eh marroo; agh lurg dou ve er smooinaght er shoh ’sy voghrey, cur-my-ner, cha nee my vac’s v’ayn, ren mee y ymmyrkey.

²² As dooyrt y ven elley, Cha nee shen myr te; agh y fer bio my vac’s, as y fer marroo yn mac ayd’s. As dob ee shoh, gra, Yn fer marroo dty vac’s, as yn fer bio yn mac aym’s. Myr shoh loayr ad fenish y ree.

²³ Eisht dooyrt y ree, Ta’n derrey yeh gra, My vac’s ta bio, as dty vac’s ta marroo: as ta’n jeh elley gra, Cha nee; agh dty vac’s yn er marroo, as my vac’s yn er bio.

²⁴ As dooyrt y ree, Cur-jee lhieu cliwe hym. As hug ad lhieu cliwe kiongoyrt rish y ree.

²⁵ As dooyrt y ree, Rheynn-jee yn lhiannoo bio ayns daa ayrn, as cur-jee lieh da’n derrey yeh, as lieh da’n jeh elley.

²⁶ Eisht loayr y ven by-liesh y lhiannoo bio rish y ree, (son ren e cree chiow gys e lhiannoo,) as dooyrt ee, O my Hiarn, cur jeeish yn lhiannoo bio, as ny marr eh er aght erbee. Agh dooyrt yn unnane elley, Ny lhig da ve edyr lhiam’s ny lhiat’s, agh lhig da ve rheynnit.

²⁷ Eisht dreggyr y ree as dooyrt eh, Cur y lhiannoo bio jee shen, as ny marr eh edyr; son ish yn voir echey.

²⁸ As cheayll ooilley Israel jeh’n vriwnys va’n ree er choyrt; as v’ad arrymagh roish y ree: son honnick ad dy row creenaght Yee mârish, ayns jannoo briwnys.