1 Reeaghyn 22 - Yn Vible Casherick 1775 1819

CAB. XXII

¹ As v’ad three bleeaney fegooish caggey eddyr Syria as Israel.

² As haink eh gy-kione, er y trass vleïn, dy daink Jehoshaphat ree Yudah neose gys ree Israel.

³ (As dooyrt ree Israel rish e harvaantyn, Vel fys euish dy nee lhianyn ta Ramoth t’ayns Gilead, as ta shin nyn daaue, chamoo ta shin dy ghoaill eh ass laue ree Syria?)

⁴ As dooyrt eh rish Jehoshaphat, Jed uss mârym’s gys y chaggey noi Ramoth-gilead? As dooyrt Jehoshaphat rish ree Israel, Ta mish myr t’ou uss, my phobble myr dty phobble’s, my chabbil myr ny cabbil ayd’s.

⁵ As dooyrt Jehoshaphat rish ree Israel, Jean briaght, ta mee guee ort, ec goo’n Chiarn jiu.

⁶ Eisht ren ree Israel sumney ny phadeyryn cooidjagh, mygeayrt kiare cheead dooinney, as dooyrt eh roo, Jem seose dy chaggey noi Ramoth-gilead, ny jean-ym lhiggey shaghey? As dooyrt ad, Immee seose; son nee’n Chiarn livrey eh gys laue yn ree.

⁷ As dooyrt Jehoshaphat, Nagh vel phadeyr erbee elley jeh’n Chiarn ayns shoh, dy vod mayd briaght jehsyn?

⁸ As dooyrt ree Israel rish Jehoshaphat, Ta ayn foast un dooinney, (Micaiah mac Imlah,) liorishyn foddee mayd briaght jeh’n Chiarn; agh ta dwoaie aym er; son cha vel eh dy bragh phadeyrys mie my-mychione’s, agh olk. As dooyrt Jehoshaphat, Ny lhig da’n ree shen y ghra.

⁹ Eisht deïe ree Israel er offishear huggey, as dooyrt eh rish, Lhiat ayns shoh dy tappee Micaiah mac Imlah.

¹⁰ As hoie ree Israel, as Jehoshaphat ree Yudah, dagh unnane er e stoyl-reeoil, ayns nyn goamraghyn reeoil, ’sy chooyrt foshlit ec giat Samaria: as ren ooilley ny phadeyryn phadeyrys kiongoyrt roo.

¹¹ As ren Zedekiah mac Chenaanah eairkyn yiarn: as dooyrt eh, Shoh myr ta’n Chiarn dy ghra, Lhieu shoh nee oo puttey ny Syrianee, derrey t’ou er stroie ad.

¹² As ren ooilley ny phadeyryn phadeyrys er yn aght cheddin, gra, Immee seose noi Ramoth-gilead, as aïgh mie dy row lhiat: son nee’n Chiarn livrey eh gys laue yn ree.

¹³ As loayr y chaghter va er gholl dy eamagh er Micaiah rish, gra, Cur-my-ner nish, ta goan ny phadeyryn fockley magh mie da’n ree lesh un choraa: lhig da dty ghoan’s, ta mee guee ort, ve cordail rish goan fer jeusyn, as loayr uss shen ny ta mie.

¹⁴ As dooyrt Micaiah, Myr ta’n Chiarn bio, cre-erbee jir y Chiarn rhym’s, shen neem’s loayrt.

¹⁵ Eisht haink eh gys y ree, as dooyrt y ree rish, Vicaiah, jem mayd seose noi Ramoth-gilead dy chaggey, ny lhig mayd shaghey? As dreggyr eh, Immee, as hig y varriaght lhiat: son nee’n Chiarn shen y livrey gys laue yn ree.

¹⁶ As dooyrt y ree rish, Cre cha mennick shegin dou currym y choyrt ort [er bree dty loo,] gyn oo dy insh dou veg agh shen ny ta firrinagh ayns ennym y Chiarn.

¹⁷ As dooyrt eh, Honnick mee ooilley Israel skeaylt er ny sleityn, myr kirree fegooish bochill: as dooyrt y Chiarn, Cha vel mainshtyr oc shoh; lhig da dy chooilley ghooinney jeu chyndaa gys e hie ayns shee.

¹⁸ As dooyrt ree Israel rish Jehoshaphat, Nagh dinsh mee dhyt, nagh jinnagh eh shoh phadeyrys mie erbee my-mychione’s, agh olk?

¹⁹ As dooyrt eh, Eaisht uss, er-y-fa shen, rish goo’n Chiarn: Honnick mee yn Chiarn ny hoie er e stoyl-reeoil, as ooilley sheshaght-flaunyss ny hassoo liorish, er e laue yesh as er e laue hoshtal.

²⁰ As dooyrt y Chiarn, Quoi nee Ahab y chleayney, dy gholl seose as dy huittym ec Ramoth-gilead? As loayr fer myr shoh, as fer er aght elley.

²¹ As haink spyrryd magh, as hass eh kiongoyrt rish y Chiarn, as dooyrt eh, Neem’s eh y chleayney.

²² As dooyrt y Chiarn rish, Cre’n aght? As dooyrt eh, Hem’s magh, as bee’m my spyrryd breagagh ayns beeal ooilley e adeyryn. As dooyrt eh, Nee oo eh y choyrlaghey, as hig eh lhiat myrgeddin: immee, as jean myr shen.

²³ Nish er-y-fa shen, cur-my-ner, ta’n Chiarn er choyrt spyrryd breagagh ayns beeal ooilley ad shoh dty adeyryn, as ta’n Chiarn er n’ockley magh olk my-dty-chione.

²⁴ Agh hie Zedekiah mac Chenaanah er-gerrey, as woaill eh Micaiah er y lieckan, as dooyrt eh, Cre’n raad ghow Spyrryd y Chiarn voym’s dy loayrt rhyt’s?

²⁵ As dooyrt Micaiah, Cur-my-ner, nee uss fakin er y laa shen, tra hed oo stiagh veih shamyr gys shamyr dy ollaghey oo-hene.

²⁶ As dooyrt ree Israel, Gow Micaiah, as cur lhiat back eh gys Amon kiannoort yn ard-valley, as gys Joash mac y ree.

²⁷ As abbyr roo, Shoh myr ta’n ree dy ghra, Cur-jee yn fer shoh ayns pryssoon, as jean-jee eh y veaghey lesh arran dy heaghyn, as lesh ushtey dy heaghyn, derrey hig-yms reesht ayns shee.

²⁸ As dooyrt Micaiah, My hig uss dy bragh back ayns shee, cha vel y Chiarn er loayrt liorym’s. As dooyrt eh, Eaisht-jee, O phobble, dy chooilley unnane eu.

²⁹ Myr shoh hie ree Israel, as Jehoshaphat ree Yudah, seose gys Ramoth-gilead.

³⁰ As dooyrt ree Israel rish Jehoshaphat, Ver-yms mee-hene ayns cummey elley, as hem stiagh ’sy chaggey; agh cur uss ort dty choamraghyn reeoil. As hug ree Israel cummey elley er hene, as hie eh gys y chaggey.

³¹ Agh hug ree Syria sarey da e ghaa chaptan jeig as feed, va reill harrish ny fainee, gra, Ny jean-jee caggey rish beg ny mooar, agh ynrycan rish ree Israel.

³² As haink eh gy-kione, tra honnick captanyn ny fainee Jehoshaphat, dy dooyrt ad, Son shickyrys, she ree Israel t’ayn. As hyndaa ad dy lhiattee dy chaggey n’oï: as deïe Jehoshaphat magh.

³³ As haink eh gy-kione, tra chronnee captanyn ny fainee nagh nee ree Israel v’ayn, dy hyndaa ad back veih geiyrt er.

³⁴ As ren dooinney dy row tayrn bow er ventyr, as woaill eh ree Israel eddyr juntyn yn eilley-caggee: shen-y-fa dooyrt eh rish immanagh yn ainagh, Chyndaa dty laue, as cur lhiat mee magh ass y chaggey; son ta mee guint.

³⁵ As va’n caggey feer chion er y laa shen: as ren y ree cummal rish ayns e ainagh noi ny Syrianee, as hooar eh baase ’syn astyr: as roie’n uill ass y lhott ayns mean yn ainagh.

³⁶ As hie magh eam trooid y magher-caggee mysh lhie ny greiney, gra, Dy chooilley ghooinney gys e ard-valley hene, as dy chooilley ghooinney gys e heer hene.

³⁷ Myr shoh hooar y ree baase; as hug ad lhieu eh gys Samaria, as doanluck ad yn ree ayns Samaria.

³⁸ As ren fer niee yn fainagh ayns poyll Samaria, as ren ny moddee sliee seose yn uill, as niee ad yn eilley-caggee echey, cordail rish goo’n Chiarn v’eh er loayrt.

³⁹ Nish yn chooid elley jeh obbraghyn Ahah, as ooilley ny ren eh, as yn thie ivory v’eh er n’yannoo, as ooilley ny ard-valjyn v’eh er hroggal, nagh vel ad scruit ayns lioar recortyssyn reeaghyn Israel?

⁴⁰ Myr shoh ren Ahab cadley marish e ayraghyn, as ren Ahaziah e vac reill ayns e ynnyd.

⁴¹ As ghow Jehoshaphat mac Asa toshiaght dy reill harrish Judah, ayns y chiarroo vleïn jeh Ahab ree Israel.

⁴² Va Jehoshaphat queig bleeaney jeig as feed dy eash tra ren eh toshiaght dy reill; as ren eh reill queig bleeaney as feed ayns Jerusalem. As va ennym e voir Azubah inneen Shilhi.

⁴³ As huill eh ayns ooilley raaidyn Asa e ayr; cha hyndaa eh dy lhiattee veih, jannoo shen ny va cairagh ayns shilley’n Chiarn: ny-yeih cha row ny ard-ynnydyn er nyn goyrt sheese; son ren y pobble chebbal as lostey incense foast ayns ny ard-ynnydyn.

⁴⁴ As ren Jehoshaphat shee rish ree Israel.

⁴⁵ Nish yn chooid elley jeh obbraghyn Jehoshaphat, as e niart ren eh soilshaghey, as kys ren eh caggey, nagh vel ad er nyn scrieu ayns lioar recortyssyn reeaghyn Yudah?

⁴⁶ As fooilliagh ny Sodomiteyn va er-mayrn rish lhing e ayr Asa, deiyr eh ass y cheer.

⁴⁷ Cha row ree erbee ayns Edom ec y traa shen: va deputy ny ree.

⁴⁸ Va lhongyn ec Jehoshaphat veih Tharshish dy gholl gys Ophir son airh; agh cha jagh ad: son va ny lhongyn brisht ec Ezion-geber.

⁴⁹ Eisht dooyrt Ahaziah mac Ahab rish Jehoshaphat, Lhig da my harvaantyn goll marish ny sharvaantyn ayd’s er ny lhongyn: agh cha jinnagh Jehoshaphat shen.

⁵⁰ As ren Jehoshaphat cadley marish e ayraghyn, as v’eh oanluckit marish e ayraghyn ayns ard-valley Ghavid e ayr: as ren Jehoram e vac reill ayns e ynnyd.

⁵¹ Ren Ahaziah mac Ahab toshiaght dy reill harrish Israel ayns Samaria yn chiaghtoo vleïn jeig jeh Jehoshaphat ree Yudah, as ren eh reill daa vleïn harrish Israel.

⁵² As ren eh dy olk ayns shilley’n Chiarn, as huill eh ayns raad e ayr, as ayns raad e voir, as ayns raad Yeroboam mac Nebat, eh hayrn Israel fo peccah.

⁵³ Son ren eh Baal y hirveish, as eh y ooashlaghey, as vrasnee eh jymmoose yn Chiarn Jee Israel, cordail rish ooilley ny va e ayr er n’yannoo.