1 Reeaghyn 21 - Yn Vible Casherick 1775 1819

CAB. XXI

¹ As haink eh gy-kione lurg ny cooishyn shoh, dy row ec Naboth yn Jezreelite, va cummal ayns Jezreel, garey-feeyney ayns Samaria, er-gerrey da plaase Ahab ree Samaria.

² As loayr Ahab rish Naboth, gra, Cur dou dty gharey-feeyney, dy vod eh ve aym son garey dy lossreeyn, er-yn-oyr dy vel eh er-gerrey da my hie; as ver-yms dhyt er y hon garey-feeyney share na eh: er-nonney, my she dty reih eh, ver-ym dhyt ny sheeagh eh ayns argid.

³ As dooyrt Naboth rish Ahab, Ny lhig eh Jee, dy lhiggin’s lhiat eiraght my ayraghyn.

⁴ As hie Ahab stiagh gys e hie, trimshagh as jymmoosagh, kyndagh rish y fockle va Naboth yn Jezreelite er loayrt rish; son v’eh er ghra, Cha der-ym dhyt eiraght my ayraghyn: as lhie eh sheese er e lhiabbee, as hyndaa eh ersooyl e eddin, as cha goghe eh veg y veaghey.

⁵ Agh haink Jezebel e ven huggey, as dooyrt ee rish, Cre’n-fa ta dty chree cha trome, nagh vel oo goaill veg y veaghey?

⁶ As dooyrt eh r’ee, Er-yn-oyr dy loayr mee rish Naboth yn Jezreelite, as dooyrt mee rish, Cur dou dty gharey-feeyney son argid; er-nonney my sailt, ver-ym dhyt garey-feeyney elley er y hon: as dreggyr eh, Cha der-ym dhyt’s my gharey-feeyney.

⁷ As dooyrt Jezebel e ven rish, Vel uss nish reill reeriaght Israel? Irree as gow beaghey, as lhig da dty chree ve gennal: ver-yms dhyt garey-feeyney Naboth yn Jezreelite.

⁸ Er shoh ren ee screeunyn ayns ennym Ahab, as seal ee ad lesh yn seal echey, as hug ee ny screeunyn gys y chanstyr, as gys ny ard-gheiney va cummal ayns e ard-valley marish Naboth.

⁹ As hug ee ayns ny screeunyn, gra, Jean-jee trostey y ockley magh, as soie-jee Naboth seose fenish y pobble.

¹⁰ As soie-jee daa ghooinney, mec Velial, kiongoyrt rish, dy ymmyrkey feanish n’oï, gra, Ren uss loayrt goan mollaghtagh noi Jee, as goltooaney’n ree: eisht cur-jee lhieu eh magh, as clagh-jee eh dy baase.

¹¹ As ren deiney yn ard-valley echey, eer yn chanstyr as ny deiney ooasle, cummaltee yn ard-valley, myr va Jezebel er chur roue, as myr ve ayns ny screeunyn v’ee er chur huc:

¹² Doardee ad trostey, as hoie ad seose Naboth fenish y pobble.

¹³ As haink daa ghooinney stiagh, cloan Velial, as hoie ad kiongoyrt rish: as ren deiney Velial gymmyrkey feanish n’oï, eer noi Naboth, kiongoyrt rish y pobble, gra, Ren Naboth loayrt goan mollaghtagh noi Jee, as goltooaney’n ree. Eisht hug ad lhieu eh magh ass yn ard-valley, as chlagh ad eh lesh claghyn, dy dooar eh baase.

¹⁴ Eisht hug ad fys gys Jezebel, gra, Ta Naboth er ny chlaghey, as t’eh marroo.

¹⁵ As haink eh gy-kione tra cheayll Jezebel dy row Naboth er ny chlaghey, as dy row eh marroo, dy dooyrt Jezebel rish Ahab, Irree, gow possession jeh garey-feeyney Naboth yn Jezreelite, ren eh gobbal dy choyrt dhyt son argid: son cha vel Naboth bio, agh marroo.

¹⁶ As haink eh gy-kione, tra cheayll Ahab dy row Naboth marroo, dy dirree Ahab dy gholl sheese gys garey-feeyney Naboth yn Jezreelite, dy ghoaill possession jeh.

¹⁷ As haink goo’n Chiarn gys Elijah yn Tishbite, gra,

¹⁸ Trog ort, immee sheese quail Ahab ree Israel, t’ayns Samaria: cur-my-ner, t’eh ayns garey-feeyney Naboth, raad t’eh er gholl sheese dy ghoaill possession jeh.

¹⁹ As nee uss loayrt rish, gra, Shoh myr ta’n Chiarn dy ghra, Vel oo er varroo, as myrgeddin er ghoaill possession? As nee uss loayrt rish, gra, Shoh myr ta’n Chiarn dy ghra, Ayns yn ynnyd raad ren moddee sliee fuill Naboth, nee moddee sliee yn uill ayd’s, eer dty uill’s.

²⁰ As dooyrt Ahab rish Elijah, Vel oo er my gheddyn magh, O my noid? As dreggyr eh, Ta mee er gheddyn magh oo; er-yn-oyr dy vel oo er chreck oo-hene dy obbraghey olk ayns shilley’n Chiarn.

²¹ Cur-my-ner, ver-ym lesh olk ort’s, as goym ersooyl dty heeloghe, as giare-ym jeh veih Ahab ooilley e gheiney, rass as cass, marish ooilley ny ta bentyn da ayns Israel,

²² As ver-ym er dty hie dy ve goll-rish thie Yeroboam mac Nebat, as goll-rish thie Vaasha mac Ahijah, son dty ghrogh-yannoo lesh t’ou er m’y vrasnaghey gys corree, as er hayrn Israel gys peccah.

²³ As mychione Jezebel loayr y Chiarn myrgeddin, gra, Nee ny moddee gee Jezebel liorish voalley Jezreel.

²⁴ Eshyn ta geddyn baase jeh sluight Ahab ’syn ard-valley nee ny moddee gee; as eshyn ta geddyn baase ’sy vagher nee eeanlee’n aer gee.

²⁵ Agh cha row fer erbee goll-rish Ahab, ren creck eh-hene dy obbraghey olkys ayns shilley’n Chiarn, eh ren Jezebel e ven y ghreinnaghey.

²⁶ As ren eh gymmyrkey eh-hene feer dwoaiagh ayns geiyrt da jallooyn, cordail rish ooilley ny ren ny Amoriteyn, ad ren y Chiarn geiyrt magh kiongoyrt rish cloan Israel.

²⁷ As haink eh gy-kione, tra cheayll Ahab ny goan shoh, dy raip eh e choamraghyn, as chur eh aanrit-sack er e chorp, as hrosht eh, as lhie eh ayns aanrit-sack, as huill eh dy trimshagh.

²⁸ As haink goo’n Chiarn gys Elijah yn Tishbite, gra,

²⁹ Vel uss fakin kys ta Ahab dy injillaghey eh-hene kiongoyrt rhym? Er-yn-oyr dy vel eh ginjillaghey eh-hene kiongoyrt rhym, cha der-ym lhiam yn kerraghey ayns ny laghyn echeysyn; agh ayns laghyn e vac ver-ym lhiam yn kerraghey er e hie.