1 Reeaghyn 18 - Yn Vible Casherick 1775 1819

CAB. XVIII

¹ As haink eh gy-kione lurg ymmodee laghyn, dy daink goo’n Chiarn gys Elijah ’sy trass vleïn, gra, Immee as jeeagh oo-hene da Ahab; as ver-yms fliaghey er y thalloo.

² As hie Elijah dy yeeaghyn eh-hene da Ahab. As va genney trome ayns Samaria.

³ As deïe Ahab er Obadiah, va kiannoort e hie: (Nish va Obadiah baghey dy jeean ayns aggle y Chiarn:

⁴ Son shen myr ve, tra ren Jezebel stroie phadeyryn y Chiarn, dy ghow Obadiah keead phadeyr, as dollee eh ad jeih as da-eed ayns ooig, as ren eh ad y veaghey lesh arran as ushtey.)

⁵ As dooyrt Ahab rish Obadiah, Immee trooid y cheer, gys ooilley ny farraneyn ushtey, as gys ooilley ny strooanyn: foddee dy vow mayd faiyr dy hauail ny cabbil as ny muleyn bio, nagh gaill mayd ooilley’n maase.

⁶ Myr shoh rheynn ad y cheer eddyr ad, dy gholl ny hrooid: ghow Ahab un raad da hene, as ghow Obadiah raad elley er hene.

⁷ As myr va Obadiah er y raad, cur-my-ner, haink Elijah ny whail: as hug eh enney er, as huitt eh er e eddin, as dooyrt eh, Nee uss shen my hiarn Elijah?

⁸ As dreggyr eh, Mish eh: immee, insh da dty hiarn, Cur-my-ner, ta Elijah ayns shoh.

⁹ As dooyrt eh, Cre’n foill ta mee er n’yannoo, dy jinnagh uss dty harvaant y livrey gys laue Ahab, dy my varroo?

¹⁰ Myr ta’n Chiarn dty Yee bio, cha vel ashoon erbee ny reeriaght nagh vel my hiarn er chur fys dy gheddyn magh oo: as tra dooyrt ad, Nagh row eh ayns shen, ghow eh loo jeh’n reeriaght as yn ashoon, nagh r’ou ry-gheddyn.

¹¹ As nish t’ou uss gra, Immee, as insh da dty hiarn, Cur-my-ner, ta Elijah ayns shoh.

¹² As hig eh gy-kione, cha beem’s ny s’leah er dty aagail, agh dy jean Spyrryd y Chiarn lesh oo cha vel fys cre’n raad; as myr shen tra hig-ym dy insh da Ahab, as nagh bee oo ry-gheddyn, nee eh mish y varroo: agh ta mish dty harvaant er ve ayns aggle y Chiarn veih my aegid.

¹³ Nagh row eh er ny insh da my hiarn cre ren mee tra stroie Jezebel phadeyryn y Chiarn, kys dollee mee keead dooinney jeh phadeyryn y Chiarn, jeih as da-eed ayns ooig, as ren mee ad y veaghey lesh arran as ushtey?

¹⁴ As nish t’ou uss gra, Immee, as insh da dty hiarn, Cur-my-ner, ta Elijah ayns shoh: as ver eh dy baase mee.

¹⁵ As dooyrt Elijah, Myr ta’n Chiarn dy heshaghtyn-flaunyss bio, eh ta mee dy hirveish, nee’m son shickyrys mee-hene y hoilshaghey da yn laa t’ayn jiu.

¹⁶ Myr shoh hie Obadiah quail Ahab, as dinsh eh shoh da: as hie Ahab quail Elijah.

¹⁷ As haink eh gy-kione, tra honnick Ahab Elijah, dy dooyrt Ahab rish, Nee uss eshyn ta boirey Israel?

¹⁸ As dreggyr eh, Cha nee mish t’er voirey Israel; agh uss as thie dt’ayrey, ayns dy vel shiu er hreigeil saraghyn y Chiarn, as t’ou uss er n’eiyrt er Baalim.

¹⁹ Nish er-y-fa shen, cur magh order, as chaggil hym’s ooilley Israel gys cronk Carmel, as phadeyryn Vaal kiare cheead as jeih as da-eed, as phadeyryn ny keylley kiare cheead, ta gee ec boayrd Jezebel.

²⁰ Er shoh hug Ahab magh order gys ooilley cloan Israel, as haggil eh ny phadeyryn cooidjagh gys cronk Carmel.

²¹ As haink Elijah gys ooilley’n pobble, as dooyrt eh, Caïd ta shiu leaystey eddyr daa chredjue? my she’n Chiarn y Jee, eiyr-jee er: agh my she Baal, eisht eiyr-jee ersyn. As cha dug y pobble fockle dy ansoor da.

²² Eisht dooyrt Elijah rish y pobble, She mish, dy jarroo mish my-lomarcan, t’er-mayrn ayns shoh jeh phadeyryn y Chiarn; agh ta phadeyryn Vaal kiare cheead as jeih as da-eed.

²³ Lhig daue er-y-fa shen cur dooin daa ghow; as lhig daue dow y reih daue hene, as giarey eh ayns peeshyn, as cur eh ny lhie er y fuygh, as gyn veg yn aile y chur fo: as aarl-ym’s y dow elley, as ver-ym eh ny lhie er y fuygh, as cha der-ym veg yn aile fo:

²⁴ As eïe-jee shiuish er ennym ny jeeghyn euish; as eïe-yms er ennym y Chiarn: as y Jee nee gansoor liorish aile, lhig dasyn ve yn Jee. As dreggyr ooilley’n pobble, as dooyrt ad, Ta shen loayrit dy mie.

²⁵ As dooyrt Elijah rish phadeyryn Vaal, Reih-jee shiuish un dow diu hene, as aarlee-jee eh hoshiaght; son ta shiu mooarane: as eïe-jee er ennym ny jeeghyn eu, agh ny cur-jee veg yn aile fo.

²⁶ As ghow ad yn dow va er ny chur daue, as daarlee ad eh, as deïe ad er ennym Vaal veih’n voghrey dy jarroo gys yn vun-laa, gra, O Vaal, clasht rooin! Agh cha row coraa, ny fer erbee ren gansoor. As ren ad lheimyragh mygeayrt yn altar v’ad er droggal.

²⁷ As haink eh gy-kione ec y vun-laa, dy ren Elijah craidey moo, gra, Yllee-jee dy ard; son she jee eh; edyr t’eh taggloo, ny t’eh ayns roie, ny t’eh er jurnah, ny, hoiggal dy vel eh ny chadley, as dy negin y ghoostey eh.

²⁸ As dyllee ad dy ard, as yiare ad ad-hene, lurg nyn gliaghtey, lesh skynnyn as lanceyn, derrey ren yn uill spreih magh orroo.

²⁹ As haink eh gy-kione lurg y vun-laa, dy jagh ad er myr ayns aght phadeyrys, derrey traa chebbal yn oural-fastyr: agh cha row edyr coraa, ny fer erbee dy ansoor, ny fer erbee dy choyrt geill daue.

³⁰ As loayr Elijah rish ooilley’n pobble, Tar-jee er-gerrey hym’s. As haink ooilley’n pobble er-gerrey da. As chiartee eh altar y Chiarn va er ny vrishey.

³¹ As ghow Elijah daa chlagh jeig, cordail rish earroo tribeyn mec Yacob, huggey haink goo’n Chiarn, gra, Israel vees dty ennym.

³² As lesh ny claghyn ren eh altar ayns ennym y Chiarn: as ren eh jeeig mysh yn altar, wheesh as chummagh daa howse dy arroo.

³³ As chiartee eh yn fuygh, as yiare eh yn dow ayns peeshyn, as hug eh eh ny lhie er y fuygh, as dooyrt eh, Lhieen-jee kiare barrellyn lesh ushtey, as deayrt-jee eh er yn oural-losht, as er y fuygh.

³⁴ As dooyrt eh, Jean-jee eh yn nah cheayrt: as ren ad eh yn nah cheayrt. As dooyrt eh, Jean-jee eh yn trass cheayrt: as ren ad eh yn trass cheayrt.

³⁵ As roie yn ushtey mygeayrt yn altar; as lhieen eh yn jeeig myrgeddin lesh ushtey.

³⁶ As haink eh gy-kione, ec traa chebbal yn oural-fastyr, dy daink Elijah yn phadeyr er-gerrey, as dooyrt eh, Hiarn Yee Abraham, Isaac, as Israel, lhig da ve er ny hoilshaghey er y laa jiu, dy vel uss y Jee ayns Israel, as dy nee mish dty harvaant, as dy vel mee er n’yannoo ooilley ny reddyn shoh ec dty ghoo.

³⁷ Clasht rhym, O Hiarn, as cur dou clashtyn, dy vod fys ’ve ec y pobble shoh dy nee uss yn Chiarn Jee, as dy vel uss er hyndaa nyn greeaghyn mygeayrt reesht.

³⁸ Eisht huitt aile y Chiarn, as losht eh yn oural, as y fuygh, as ny claghyn, as y joan, as hyrmee eh seose yn ushtey va ’sy jeeig.

³⁹ As tra honnick ooilley’n pobble shoh, huitt ad er nyn eddin, as dooyrt ad, Yn Chiarn, she eshyn y Jee; yn Chiarn, eshyn y Jee.

⁴⁰ As dooyrt Elijah roo, Gow-jee phadeyryn Vaal; ny lhig da fer jeu scapail. As ghow ad ad: as hug Elijah lesh ad sheese gys strooan Kishon, as ayns shen v’ad er nyn goyrt gy-baase.

⁴¹ As dooyrt Elijah rish Ahab, Trog ort, ee as iu, son t’ayn sheean mooar dy liaghey trome.

⁴² Myr shoh hie Ahab seose dy ee as dy iu. As jimmee Elijah seose gys mullagh Carmel; as chroym eh eh-hene sheese gys y thalloo, lesh e eddin eddyr e ghlioonyn.

⁴³ As dooyrt eh rish e harvaant, Immee seose nish, jeeagh lesh yn aarkey. As hie eh seose, as yeeagh eh, as dooyrt eh, Cha vel monney ry-akin. As dooyrt eh, Immee reesht shiaght keayrtyn.

⁴⁴ As haink eh gy-kione ec y chiaghtoo cheayrt, dy dooyrt eh, Cur-my-ner, ta bodjal beg troggal ass y cheayn, myr bass dooinney. As dooyrt eh, Immee seose, loayr rish Ahab, Fow aarloo dty ainagh, as cosne royd sheese, nagh jean y fliaghey dty lhiettal.

⁴⁵ As haink eh gy-kione ’sy traa cheddin, dy row’n aer dorraghey lesh bodjallyn as geay, as va deayrtey mooar fliaghee ayn. As varkee Ahab, as hie eh gys Jezreel.

⁴⁶ As va laue’n Chiarn er Elijah: as chryss eh seose e veeghyn, as roie eh roish Ahab, derrey haink eh gys Jezreel.