1 Reeaghyn 17 - Yn Vible Casherick 1775 1819

CAB. XVII

¹ As dooyrt Elijah yn Tishbite, va jeh cummaltee Ghilead, rish Ahab, Myr ta’n Chiarn Jee Israel bio, eh ta mee dy hirveish, cha bee druight ny fliaghey ayn rish ny bleeantyn shoh, agh cordail rish my ghoo’s.

² As haink goo’n Chiarn huggey, gra,

³ Immee royd veih shoh, as chyndaa lesh y shiar as follee oo-hene liorish yn strooan Cherith, ta liorish Jordan.

⁴ As hig eh gy-kione, dy jean oo giu ass y trooan; as ta mee er chur sarey da cummaltee Oreb dy dty veaghey ayns shen.

⁵ Er shoh hie eh roish, as ren eh cordail rish goo’n Chiarn: son hie eh as duirree eh liorish strooan Cherith, ta er-gerrey da Jordan.

⁶ As hug cummaltee Oreb lhieu huggey arran as feill ’sy voghrey, as arran as feill ’syn astyr: as diu eh ass y trooan.

⁷ As haink eh gy-kione lurg earish, dy hyrmee yn strooan seose, er-yn-oyr nagh row veg y fliaghey er ve ’sy cheer.

⁸ As haink goo’n Chiarn huggey, gra,

⁹ Irree, as immee royd gys Sarepta, ta bentyn gys Zidon, as fuirree ayns shen: cur-my-ner ta mee er chur sarey da ben-treoghe dy choyrt beaghey dhyt ayns shen.

¹⁰ Er shoh dirree eh, as jimmee eh roish gys Sarepta. As tra haink eh gys giat yn ard-valley cur-my-ner, va’n ven-treoghe ayns shen chaglym brasnagyn: as deïe eh urree, as dooyrt eh, Cur lhiat hym, ta mee guee ort, red beg dy ushtey ayns saagh, dy voddym giu.

¹¹ As myr v’ee goll dy chur lh’ee eh, deïe eh urree, as dooyrt eh, Cur lhiat hym, ta mee guee ort, greme dy arran ayns dty laue.

¹² As dooyrt ee, Myr ta’n Chiarn dty Yee bio, cha vel wheesh berreen aym, agh lane doarn dy veinn ayns barrel, as red beg dy ooil ayns saagh: as cur-my-ner, ta mee chaglym brasnagyn, dy voddym goll stiagh dy aarlaghey eh er my hon hene as my vac, dy vod mayd gee eh, as baase y gheddyn.

¹³ As dooyrt Elijah r’ee, Ny bee aggle ort; immee, as jean myr t’ou er ghra: agh jean dooys hoshiaght soddag berreen, as cur lhiat hym eh, as eisht jean er dty hon hene, as son dty vac.

¹⁴ Son shoh myr ta’n Chiarn Jee Israel gra, Cha jig y varrel veinney fo, chamoo nee’n saagh ooil failleil, derrey’n laa ver yn Chiarn fliaghey er y thalloo.

¹⁵ As hie ee ro-ee, as ren ee cordail rish raa Elijah: as ren ish, as eshyn, as e mooinjer, beaghey er ymmodee laghyn.

¹⁶ As cha jagh y varrel veinney fo, chamoo ren yn saagh ooil failleil, cordail rish goo’n Chiarn, v’eh er loayrt liorish Elijah.

¹⁷ As haink eh gy-kione, lurg ny reddyn shoh, dy huitt mac y ven, ben y thie, ching; as va’n chingys cha trome, dy dooar eh baase.

¹⁸ As dooyrt ee rish Elijah, Cre ta mee er n’yannoo rhyt’s, O uss ghooinney dy Yee? vel oo er jeet hym’s dy eamagh er my pheccah gys cooinaghtyn, as dy ve baase my vac?

¹⁹ As dooyrt eh r’ee, Cur dou dty vac. As ghow eh eh ass yn oghrish eck, as hug eh lesh eh seose er e lout raad v’eh goaill aaght, as chur eh dy lhie eh er e lhiabbee hene.

²⁰ As deïe eh gys y Chiarn, as dooyrt eh, O Hiarn my Yee, vel oo dy jarroo er hayrn seaghyn er y ven-treoghe mâree ta mee goaill aaght, liorish goaill bioys e mac?

²¹ As heeyn eh eh-hene er y lhiannoo three keayrtyn, as deïe eh gys y Chiarn, as dooyrt eh, O Hiarn my Yee, ta mee guee ort, lhig da bioys yn lhiannoo shoh cheet ayn reesht.

²² As cheayll y Chiarn coraa Elijah, as haink yn ennal ’sy lhiannoo reesht, as ren eh aa-vioghey.

²³ As ghow Elijah yn lhiannoo, as hug eh lesh neose eh ass y chiamyr stiagh ’sy thie, as livrey eh eh gys e voir: as dooyrt Elijah, Jeeagh, ta dty vac bio!

²⁴ As dooyrt y ven rish Elijah, Nish liorish shoh ta fys aym dy vel uss dooinney dy Yee, as dy vel goo’n Chiarn ayns dty veeal’s yn irriney.