1 Reeaghyn 13 - Yn Vible Casherick 1775 1819

CAB. XIII

¹ As cur-my-ner, haink dooinney dy Yee veih Judah liorish goo’n Chiarn gys Beth-el: as hass Jeroboam liorish yn altar dy hebbal incense.

² As hrog eh seose e choraa noi’n altar liorish goo’n Chiarn, as dooyrt eh, O altar, altar, myr shoh ta’n Chiarn dy ghra, cur-my-ner, bee lhiannoo er ny ruggey da thie Ghavid, e ennym Josiah; as ort’s nee eh chebbal saggyrtyn ny ard-ynnydyn ta lostey incense ort, as bee craueyn deiney er nyn lostey ort’s.

³ As hug eh cowrey yn laa cheddin, gra, Shoh’n cowrey ta’n Chiarn er loayrt; Cur-my-ner, bee’n altar er ny vrishey, as yn leoie t’er er ny gheayrtey magh.

⁴ As haink eh gy-kione, tra cheayll ree Jeroboam raa yn dooinney dy Yee, v’eh er n’ockley magh noi’n altar ayns Beth-el, dy heeyn eh magh e laue veih’n altar, gra, Gow-jee greme er. As va e laue, heeyn eh magh n’oï, shirkit seose, myr shen nagh voddagh eh tayrn eh stiagh huggey reesht.

⁵ Va’n altar myrgeddin er ny vrishey, as yn leoie deayrtit magh veih’n altar, cordail rish yn cowrey va’n dooinney dy Yee er choyrt liorish goo’n Chiarn.

⁶ As dreggyr y ree as loayr eh rish yn dooinney dy Yee, Jean aghin nish gys eddin y Chiarn dty Yee, as guee er my hon, dy voddym use my laue y gheddyn reesht. As ren yn dooinney dy Yee guee gys y Chiarn, as va laue’n ree er ny laanaghey da reesht, as haink eh dy ve myr v’eh roïe.

⁷ As dooyrt y ree rish yn dooinney dy Yee, Tar thie mârym, as jean oo-hene y ooraghey, as ver-ym leagh dhyt.

⁸ As dooyrt yn dooinney dy Yee rish y ree, My ver oo dou lieh jeh dty hie cha jem stiagh mayrt, chamoo nee’m gee arran ny giu ushtey ’syn ynnyd shoh:

⁹ Son shoh myr ve curmit orrym liorish goo’n Chiarn, gra, Ny jean gee arran, ny giu ushtey, ny chyndaa reesht er y raad haink oo.

¹⁰ Myr shoh ghow eh raad elley, as cha hyndaa eh er y raad haink eh gys Beth-el.

¹¹ Nish va shenn phadeyr cummal ayns Beth-el; as haink ny mec echey, as dinsh ad da ooilley ny obbraghyn va’n dooinney dy Yee er n’yannoo yn laa shen ayns Beth-el: ny goan v’eh er loayrt rish y ree, ad shen dinsh adsyn myrgeddin da nyn ayr.

¹² As dênee nyn ayr jeu, Cre’n raad ghow eh? son honnick e vec cre’n raad va’n dooinney dy Yee er ghoaill, haink veih Judah.

¹³ As loayr eh rish e vec, Cur-jee jeelt er yn assyl. Myr shen hug ad yn jeelt er, as varkee eh,

¹⁴ As jimmee eh geiyrt er y dooinney dy Yee, as hooar eh eh ny hoie fo billey-darragh: as dooyrt eh rish, Nee uss yn dooinney dy Yee haink veih Judah? As dooyrt eh, Mish eh.

¹⁵ Eisht dooyrt eh rish, Tar thie mârym, as gow arran.

¹⁶ As dooyrt eh, Cha negin dou chyndaa mayrt, ny goll stiagh mayrt; chamoo nee’m gee arran ny giu ushtey mayrt ’syn ynnyd shoh:

¹⁷ Son ve sarit dou liorish goo’n Chiarn, Cha n’ee oo veg yn arran, chamoo nee oo giu ushtey ayns shen, ny chyndaa reesht er y raad haink oo.

¹⁸ Dooyrt eh rish, Ta mish my adeyr neesht myr t’ou uss, as loayr ainle rhym liorish goo’n Chiarn, gra, Cur lhiat eh back mayrt gys dty hie, dy vod eh gee arran as giu ushtey. Agh she breg dinsh eh da.

¹⁹ Myr shoh hie eh back mârish, as d’ee eh arran ayns e hie, as diu eh ushtey.

²⁰ As haink eh gy-kione, myr v’ad nyn soie ec y voayrd, dy daink goo’n Chiarn gys y phadeyr hug lesh back eh:

²¹ As deïe eh da’n dooinney dy Yee haink veih Judah, gra, Shoh myr ta’n Chiarn dy ghra, Son wheesh as dy vel uss er ve mee-viallagh gys oardagh yn Chiarn, as nagh vel oo er reayll yn sarey hug yn Chiarn dty Yee dhyt.

²² Agh haink oo back, as t’ou er n’ee arran, as er n’iu ushtey ’syn ynnyd, ayn dooyrt y Chiarn rhyt, Ny ee veg yn arran, ny giu ushtey; cha bee dty chorp oanluckit ayns oaie dty ayraghyn.

²³ As haink eh gy-kione, erreish da ve er ghoaill arran, as er n’iu, dy dug eh jeelt er yn assyl, ta shen, da’n phadeyr v’eh er choyrt lesh back.

²⁴ As tra v’eh er n’immeeaght, veeit lion eh er y raad, as varr eh eh; as va’n corp echey ceaut er y raad, as yn assyl ny hassoo liorish, va’n lion myrgeddin shassoo liorish y chorp.

²⁵ As cur-my-ner, hie deiney shaghey, as honnick ad yn corp ny lhie er y raad, as y lion ny hassoo liorish y chorp: as haink ad, as dinsh ad shoh ayns yn ard-valley raad va’n chenn phadeyr cummal.

²⁶ As tra cheayll yn phadeyr hug lesh eh back jeh’n raad, jeh shoh, dooyrt eh, She’n dooinney dy Yee t’ayn, nagh dug geill da goo’n Chiarn; shen-y-fa ta’n Chiarn er livrey eh gys lion, t’er raipey as er varroo eh, cordail rish goo’n Chiarn, loayr eh rish.

²⁷ As loayr eh rish e vec, gra, Cur-jee jeelt er yn assyl. As hug ad yn jeelt er.

²⁸ As jimmee eh, as hooar eh yn corp echey ny lhie er y raad, as yn assyl as y lion nyn shassoo liorish y chorp: cha row’n lion er n’ee yn corp, ny er raipey yn assyl.

²⁹ As hrog y phadeyr seose corp yn dooinney dy Yee, as hug eh eh er yn assyl, as hug eh lesh eh back: as haink y chenn phadeyr gys yn ard-valley, dy ghobberan, as dy oanluckey eh.

³⁰ As ren eh goanluckey e chorp ’syn oaie echey hene; as ren ad dobberan harrish gra, Aless, my vraar!

³¹ As haink eh gy-kione, lurg da v’er n’oanluckey eh, dy loayr eh rish e vec, gra Tra veem’s marroo, eisht jean-jee mish y oanluckey ayns y lhiaght, raad ta’n dooinney dy Yee oanluckit; cur-jee my chraueyn’s liorish ny craueyn echeysyn:

³² Son nee’n raa, ren eh fockley magh liorish goo’n Chiarn noi’n altar ayns Beth-el, as noi ooilley thieyn ny ard-ynnydyn t’ayns ard-valjyn Samaria, son shickyrys cheet gy-kione.

³³ Lurg yn obbyr shoh, cha hyndaa Jeroboam veih e ghrogh raaidyn, agh ren eh reesht jeh’n sleih s’inshley saggyrtyn jeh ny ard-ynnydyn: quoi-erbee baillish, ren eh casherickey eh, as haink eh dy ve fer jeh saggyrtyn ny ard-ynnydyn.

³⁴ As haink y red shoh dy ve peccah er thie Yeroboam, dy jarroo dy yiarey jeh eh, as dy stroie eh jeh eddin ny hooirey.