1 Reeaghyn 12 - Yn Vible Casherick 1775 1819

CAB. XII

¹ As hie Rehoboam gys Shechem: son va ooilley Israel er jeet gys Shechem, dy yannoo eh ny ree.

² As haink eh gy-kione tra cheayll Jeroboam mac Nebat, va foast ayns Egypt, jeh, (son v’eh er-chea veih fenish ree Solomon, as va Jeroboam baghey ayns Egypt,)

³ Dy dug ad fys as deïe ad er: as haink Jeroboam, as ooilley sheshaght Israel, as loayr ad rish Rehoboam, gra,

⁴ Ren dty ayr yn whing ain doccaragh: nish er-y-fa shen, jean uss shirveish creoi dty ayrey, as e whing hrome ’chur eh orrin, ny s’eddrym, as nee mayd uss y hirveish.

⁵ As dooyrt eh roo, Immee-jee reue foast son three laa, eisht tar-jee reesht hym’s. As jimmee yn pobble roue.

⁶ As ghow ree Rehoboam coyrle jeh ny shenn gheiney hass kiongoyrt rish Solomon e ayr, ’sy lhing echeysyn, as dooyrt eh, Cre’n choyrle ver shiu dou, dy voddym ansoor y choyrt da’n pobble shoh?

⁷ As loayr ad rish, gra, My vees oo dooie da’n pobble shoh jiu, as ad y hirveish, as gansoor ad, as cur glare vie daue, eisht bee ad dty harvaantyn er son dy bragh.

⁸ Agh hreig eh coyrle ny shenn gheiney, as ghow eh coyrle jeh ny deiney aegey va troggit mârish, as hass kiongoyrt rish;

⁹ As dooyrt eh roo, Cre ta’n choyrle euish, dy vod mayd ansoor y choyrt da’n pobble shoh, t’er loayrt rhym, gra, Jean y whing hug dty ayr orrin ny s’eddrym?

¹⁰ As loayr ny deiney aegey va troggit mârish, gra, Shoh myr nee oo gansoor yn pobble shoh loayr rhyt, gra, Ren dty ayr yn whing ain trome, agh jean uss eh ny s’eddrym dooin; shoh myr nee oo loayrt roo, Bee my vair-veg ny s’chee na slheeasid my ayrey.

¹¹ As nish, ga dy vel my ayr er laadey shiu lesh quing trome, neem’s y whing eu ny s’trimmey: ta my ayr er scuitchal shiu lesh kippyn, agh neem’s shiu y scuitchal lesh scorpionyn.

¹² Myr shoh haink Jeroboam as ooilley’n pobble gys Rehoboam yn trass laa, myr va’n ree er phointeil, gra, Tar-jee hym’s reesht kione y trass laa.

¹³ As dreggyr yn ree y pobble dy baggyrtagh, as hreig eh coyrle ny shenn gheiney;

¹⁴ As loayr eh roo cordail rish coyrle ny deiney aegey, gra, Ren my ayr yn whing eu trome, as neem’s eh ny s’trimmey: ren my ayr scuitchal shiu lesh kippyn, agh neem’s smaghtaghey shiu lesh scorpionyn.

¹⁵ Shen-y-fa cha deaisht y ree rish y pobble; son va’n chooish veih’n Chiarn, dy chooilleeney e ghoo, loayr y Chiarn liorish Ahijah yn Shilonite rish Jeroboam mac Nebat.

¹⁶ Myr shen tra honnick ooilley Israel nagh dug yn ree clashtyn daue, dreggyr yn pobble yn ree, gra, Cre’n ayrn t’ain ayns David? chamoo ta eiraght ain ayns mac Jesse: ersooyl-jee gys nyn gabbaneyn, O Israel: jeeagh nish da dty hie hene, Ghavid. Myr shoh jimmee Israel roue gys nyn gabbaneyn.

¹⁷ Agh son cloan Israel va cummal ayns ard-valjyn Yudah, ren Rehoboam reill harrystoo.

¹⁸ Eisht hug ree Rehoboam huc Adoram, va harrish ny keeshyn: as ren ooilley Israel eh y chlaghey lesh claghyn, dy dooar eh baase: shen-y-fa ren ree Rehoboam siyr dy gheddyn seose ayns e ainagh, dy chosney roish gys Jerusalem.

¹⁹ Myr shoh dirree Israel magh noi thie Ghavid gys y laa t’ayn jiu.

²⁰ As haink eh gy-kione, tra cheayll ooilley Israel dy row Jeroboam er jeet reesht, dy dug ad fys, as deïe ad er gys y cheshaght, as ren ad eh ny ree harrish ooilley Israel: cha row unnane deiyr er thie Ghavid, agh tribe Yudah ny-lomarcan.

²¹ As tra va Rehoboam er jeet gys Jerusalem, haggil eh cooidjagh ooilley thie Yudah, marish tribe Venjamin, keead as kiare-feed thousane reih deiney-caggee, dy chaggey noi thie Israel, dy chur lesh back yn reeriaght gys Rehoboam mac Solomon.

²² Agh haink goo Yee gys Shemaiah dooinney Yee, gra,

²³ Loayr uss rish Rehoboam mac Solomon, ree Yudah, as rish ooilley thie Yudah as Venjamin, as rish y chooid elley jeh’n pobble, gra,

²⁴ Shoh myr ta’n Chiarn dy ghra, Cha jig shiu seose, chamoo nee shiu caggey noi nyn mraaraghyn cloan Israel: chyndaa-jee dy chooilley ghooinney gys e hie hene; son ta’n chooish shoh voym’s. Ren ad geaishtagh er-y-fa shen rish goo’n Chiarn, as hyndaa ad roue, cordail rish goo’n Chiarn.

²⁵ Eisht hrog Jeroboam Shechem er cronk Ephraim, as ren eh cummal ayns shen; as hie eh magh veih shen, as hrog eh Penuel.

²⁶ As dooyrt Jeroboam ayns e chree, Nish nee yn reeriaght chyndaa reesht gys thie Ghavid:

²⁷ My hed yn pobble shoh seose dy hebbal oural ayns thie’n Chiarn ec Jerusalem, eisht nee cree yn pobble shoh chyndaa reesht gys nyn jiarn, dy jarroo gys Rehoboam ree Yudah, as nee ad mish y varroo, as hed ad reesht gys Rehoboam ree Yudah.

²⁸ Shen-y-fa ghow yn ree coyrle, as ren eh daa lheiy airh, as dooyrt eh roo, Te rouyr [tooilleil] diuish dy gholl seose gys Jerusalem: cur-my-ner dty yeeghyn, O Israel, hug lesh oo magh ass cheer Egypt.

²⁹ As hoie eh yn derrey yeh ayns Beth-el, as yn jeh elley hoie eh ayns Dan.

³⁰ As haink yn red shoh dy ve oyr peccah: son hie’n pobble dy chur ooashley kiongoyrt rish yn derrey yeh jeu, eer gys Dan.

³¹ As hrog eh thie er cronk ard, as ren eh saggyrtyn jeh’n vooinjer s’inshley jeh’n pobble, nagh row jeh mec Levi.

³² As doardee Jeroboam feailley er yn hoghtoo vee, er y wheiggoo laa yeig jeh’n vee, casley rish yn feailley t’ayns Judah, as hie eh seose gys yn altar, (myr shoh ren eh ayns Beth-el,) dy hebbal oural gys ny lheiyee v’eh er n’yannoo: as hoie eh ayns Beth-el saggyrtyn ny ynnydyn ardey v’eh er n’yannoo.

³³ Myr shoh ren eh-hene chebbal er yn altar v’eh er n’yannoo ayns Beth-el, er yn wheiggoo laa yeig jeh’n hoghtoo vee, eer er mee ghow eh-hene ny chione; as doardee eh feailley da cloan Israel; as heb eh oural er yn altar, as ren eh incense y lostey.