1 Reeaghyn 10 - Yn Vible Casherick 1775 1819

CAB. X

¹ As tra cheayll ben-reïn Sheba jeh goo Solomon, mychione ennym y Chiarn, haink ee dy phrowal eh lesh questionyn dorraghey.

² As haink ee gys Jerusalem lesh sheshaght feer vooar, as camelyn laadit lesh spiceyn, as weight airh, as jewellyn costal: as tra v’ee er jeet gys Solomon, loayr ee rish jeh ooilley ny v’eck ayns e cree.

³ As dinsh Solomon jee ooilley ny questionyn eck: cha row red erbee follit veih’n ree, nagh dinsh eh jee.

⁴ As tra va ben-reïn Sheba er vakin ooilley creenaght Solomon, as yn thie v’eh er hroggal,

⁵ Gien e voayrd, as myr va ny fir-oik echey nyn soie, as stayd e hirveishee, as nyn goamrey, as ny butleryn, as ny greeshyn, orroo hie eh seose gys thie’n Chiarn; chaill ee e tappey lesh yindys.

⁶ As dooyrt ee rish y ree, Spheer va’n goo cheayll mee ayns my heer hene jeh dty obbraghyn as dty chreenaght.

⁷ Ny-yeih cha chred mee ny goan, derrey haink mee-hene, as dy vel my hooillyn er vakin eh; as cur-my-ner, cha row’n derrey lieh inshit dou: ta dty chreenaght as dty vaynrys foddey erskyn y goo cheayll mee.

⁸ S’maynrey ta dty gheiney, s’maynrey t’ad shoh dty harvaantyn, ta shassoo dy kinjagh kiongoyrt rhyt, as clashtyn dty chreenaght.

⁹ Bannit dy row’n Chiarn dty Yee, ghow taitnys aynyd, dy hoiaghey oo er stoyl-reeoil Israel: er-yn-oyr dy bynney lesh y Chiarn Israel er-dy-rieau, shen-y-fa ren eh ree jeed’s, dy chur briwnys as cairys.

¹⁰ As hug ee da’n ree keead talent as feed dy airh, as stoyr yindyssagh dy spiceyn, as jewellyn costal: cha daink arragh lheid y palchey dy spiceyn, as ad shoh hug ben-reïn Sheba da ree Solomon.

¹¹ As lhuingys Hiram, hie son airh gys Ophir, hug ad lhieu myrgeddin veih Ophir palchey mooar dy viljyn-almug, as jewellyn costal.

¹² As ren y ree jeh ny biljyn-almug pillaryn son thie’n Chiarn, as son thie’n ree, claasaghyn myrgeddin, as greinyn-kiaullee son ny fir-chiaullee: cha daink veg jeh lheid ny biljyn-almug, chamoo va nyn lheid er ny akin gys y laa t’ayn jiu.

¹³ As hug ree Solomon da ben-reïn Sheba e slane geearree, cre-erbee ren ee shirrey, marish shen hug eh jee jeh e feoiltys reeoil: myr shen hyndaa ee, as hie ee roïe gys e cheer hene, ish as e sharvaantyn.

¹⁴ Nish va trimmid yn airh haink gys Solomon ayns un vleïn, shey cheead three-feed as shey talentyn dy airh;

¹⁵ Marish y custom v’eh troggal jeh ny oaneryn lhuingey va dellal, as jeh cooid ny marchanyn-spice, as jeh ooilley reeaghyn Arabia, as jeh kiannoortyn y cheer.

¹⁶ As ren ree Solomon daa cheead target dy airh hammarit: hie shey cheead shekel dy airh dy yannoo un target.

¹⁷ As ren eh three cheead scape dy airh hammarit; hie three puint dy airh dy yannoo un scape: as hasht y ree ad ayns thie keylley Lebanon.

¹⁸ Marish shoh, ren y ree stoyl-reeoil mooar dy ivory, as choodee eh harrish eh lesh glen airh.

¹⁹ Va shey greeshyn gys y stoyl-reeoil, as va mullagh yn stoyl-reeoil runt cheu-chooylloo: as va geayltyn er dagh cheu jeh’n ynnyd-soie, as hass daa lion [dy airh] liorish ny geayltyn.

²⁰ As hass daa lion jeig ayns shen er dagh cheu er ny shey greeshyn: cha row y lheid jeant ayns reeriaght erbee.

²¹ As va ooilley siyn-iu ree Solomon jeh airh, as va ooilley siyn thie keylley Lebanon jeh airh ghlen; cha row veg jeant jeh argid: son cha row veg y scansh jeh argid rish lhing Solomon.

²² Son va ec ree Solomon ec y cheayn lhuingys Tharshish, marish lhuingys Hiram: keayrt ayns three bleeaney haink lhuingys Tharshish, cur lhieu airh as argid, ivory, as apeyn, as peacockyn.

²³ Myr shoh va ree Solomon erskyn ooilley reeaghyn y theihll, son berchys as creenaght.

²⁴ As va ooilley’n seihll shirrey gys Solomon, dy chlashtyn e chreenaght, va Jee er choyrt ayns e chree.

²⁵ As hug ad lhieu dagh dooinney e yiootyn, siyn argid, as siyn airh, as coamraghyn, as eilley-caggee, as spiceyn, cabbil, as muleyn, kuse cour ny bleeaney.

²⁶ As haggil Solomon cooidjagh fainee as markee: as v’echey thousane as kiare cheead fainagh, as daa housane jeig dy varkee, ren eh pointeil ayns ny ard-valjyn son fainee, as dy ve marish y ree ec Jerusalem.

²⁷ As ren y ree yn argid cha palchey ayns Jerusalem as claghyn, as ny cedaryn myr ny biljyn-sycamore ta ’sy choan, cha palchey.

²⁸ As hug Solomon lesh cabbil ass Egypt, as snaie aanrit: as va’n snaie aanrit er ny chreck rish marchanyn y ree.

²⁹ As va fainagh er ny choyrt lesh veih Egypt son shey cheead shekel dy argid, as cabbyl son shiaght-feed as jeih: as myrgeddin son ooilley reeaghyn ny Hittiteyn, as son reeaghyn Syria, hug ad lhieu magh ad liorish nyn ghellal.