1 Reeaghyn 1 - Yn Vible Casherick 1775 1819

CAB. I

¹ Nish va’n ree David shenn as er roie dy mie ayns eash; as choodee ad eh lesh eaddeeyn, agh cha dooar eh veg y chiass.

² Shen-y-fa dooyrt e harvaantyn rish, Lhig da ve er ny gheddyn magh son my hiarn y ree moidyn aeg, as lhig jee shirveish er y ree, as gerjaghey eh, as lhie ayns dty oghrish, dy vod my hiarn y ree chiass y gheddyn.

³ Myr shen hir ad magh son ben-aeg aalin trooid ooilley ardjyn Israel, as hooar ad Abishag yn Shunammite, as hug ad lhieu ee gys y ree.

⁴ As va’n ven-aeg feer aalin, as ren ee gerjaghey yn ree, as tendeil er: agh cha row veg echey dy yannoo r’ee.

⁵ Eisht hrog Adonijah mac Haggith eh-hene seose, gra, Beem’s yn ree: as ren eh aarloo fainee, as markee, as jeih coshee as da-eed dy roie roish.

⁶ As cha row e ayr er ve jymmoosagh rish ec traa erbee, ayns gra, Cre’n-fa t’ou er n’yannoo myr shoh? as v’eh myrgeddin ny ghooinney feer stoamey; as rug e voir eh lurg Absalom.

⁷ As ren eh stiagh rish Joab mac Zeruiah, as rish Abiathar yn saggyrt: as adsyn deiyr er Adonijah, chooin ad lesh.

⁸ Agh Zadok yn saggyrt, as Benaiah mac Jehoiada, as Nathan y phadeyr, as Shimei, as Rei, as ny ard-gheiney va lesh David, cha row ad lesh Adonijah.

⁹ As varr Adonijah kirree, as dew, as muirht, liorish creg Zoheleth, ta liorish Enrogel, as chuir eh ooilley e vraaraghyn mec y ree, as ooilley deiney Yudah sharvaantyn y ree.

¹⁰ Agh Nathan yn phadeyr, as Benaiah, as ny deiney mooarey, as Solomon e vraar, cha chuir eh edyr.

¹¹ Er-y-fa shen loayr Nathan rish Bath-sheba moir Solomon, gra, Nagh vel oo er chlashtyn dy vel Adonijah mac Haggith reill, as ta shoh ooilley gyn-yss da nyn jiarn David?

¹² Tar nish er-y-fa shen, as lhig dooys, ta mee guee ort, coyrle y choyrt dhyt, dy vod oo dty vioys hene, as bioys dty vac Solomon, y hauail.

¹³ Immee stiagh gys y ree David, as abbyr rish, Nagh ren uss, my hiarn, O ree, breearrey da dty inney-veyl hene, gra, Son shickyrys nee Solomon yn mac ayd’s reill my lurg’s, as nee eh soie er my stoyl-reeoil? kys te eisht dy vel Adonijah reill?

¹⁴ Cur-my-ner, choud as t’ou foast loayrt ayns shen rish y ree, hig-yms myrgeddin stiagh geiyrt ort, as nee’m dty ghoan y yannoo mie.

¹⁵ As hie Bath-sheba stiagh gys y ree ’sy chamyr, as va’n ree feer shenn, as ren Abishag yn Shunammite shirveish er y ree.

¹⁶ As chroym Bath-sheba sheese ayns ammys da’n ree. As dooyrt y ree, Cre t’ou geearree?

¹⁷ As dooyrt ee rish, My hiarn, ren uss breearrey liorish y Chiarn dty Yee da dty inney-veyl, gra, Son shickyrys nee Solomon dty vac reill my lurg, as nee eh soie er my stoyl-reeoil:

¹⁸ As nish, cur-my-ner, ta Adonijah reill; as nish, my hiarn yn ree, cha vel fys ayd er shoh.

¹⁹ As t’eh er varroo ymmodee dew as muirht, as niart kirree, as t’eh er chuirrey ooilley mec y ree, as Abiathar yn saggyrt, as Joab captan y cheshaght-chaggee: agh Solomon dty harvaant cha vel eh er chuirrey.

²⁰ As uss, my hiarn, O ree, ta sooillyn ooilley Israel soit ort, er-chee oo dy hoilshaghey daue, quoi nee soie er stoyl-reeoil my hiarn yn ree ny yeï.

²¹ Er aght elley, hig eh gy-kione, tra nee my hiarn y ree cadley marish e ayraghyn, dy beem’s as my vac Solomon coontit myr noidyn.

²² As cur-my-ner, choud as v’ee foast loayrt rish y ree, haink Nathan y phadeyr stiagh.

²³ As dinsh ad da’n ree, gra, Cur-my-ner, Nathan y phadeyr. As tra v’eh er jeet stiagh fenish y ree, chroym eh eh-hene kiongoyrt rish y ree lesh e eddin gys y thalloo.

²⁴ As dooyrt Nathan, My hiarn, O ree, vel uss er ghra, Nee Adonijah reill my lurg, as nee eh soie er my stoyl-reeoil?

²⁵ Son t’eh er n’gholl sheese jiu, as er varroo ymmodee dew as muirht as niart kirree, as t’eh er chuirrey ooilley mec y ree, as captanyn yn armee, as Abiathar y saggyrt: as cur-my-ner t’ad gee as giu kiongoyrt rish, as gra, Dy saue Jee ree Adonijah.

²⁶ Agh mish, eer mish dty harvaant, as Zadok yn saggyrt, as Benaiah mac Jehoiada, as dty harvaant Solomon, cha vel eh er chuirrey.

²⁷ Vel y chooish shoh veih my hiarn y ree, as cha vel oo er hoilshaghey eh da dty harvaant, quoi eh ta kiarit dy hoie er stoyl-reeoil my hiarn yn ree ny lurg?

²⁸ Eisht dansoor y ree David, as dooyrt eh, Eïe er Bath-sheba hym’s. As haink ee fenish y ree, as hass ee kiongoyrt rish.

²⁹ As ren y ree loo, as gra, Myr ta’n Chiarn bio, t’er livrey my annym ass dy chooilley arkys,

³⁰ Eer myr loo mee dhyt liorish yn Chiarn Jee Israel, gra, Son shickyrys nee Solomon dty vac reill my yeï, as nee eh soie er my stoyl-reeoil ayns my ynnyd, eer myr shen neem’s son firrinys jannoo yn laa t’ayn jiu.

³¹ Eisht chroym Bath-sheba sheese lesh e eddin gys yn ooir, as hug ee arrym da’n ree, gra, Lhig da my hiarn ree David ve foddey beayn.

³² As dooyrt ree David, Cur-jee hym’s Zadok yn saggyrt, as Nathan y phadeyr, as Benaiah mac Jehoiada. As haink ad kiongoyrt rish y ree.

³³ Dooyrt y ree myrgeddin roo, Gow-jee mêriu sharvaantyn nyn jiarn, as cur-jee er Solomon my vac dy varkiagh er my vule hene, as cur-jee lhieu eh sheese gys Gihon.

³⁴ As lhig Zadok yn saggyrt as Nathan y phadeyr ooilaghey eh ayns shen ny ree er Israel: as sheid-jee yn trumpet, gra, Dy saue Jee ree Solomon.

³⁵ Eisht hig shiu seose geiyrt er, dy vod eh cheet as soie er my stoyl-reeoil; son eshyn vees ree ayns my ynnyd: as ta mee er phointeil eh dy v’eh er-reill er Israel as er Judah.

³⁶ As dreggyr Benaiah mac Jehoiada yn ree, as dooyrt eh, Amen: lhig da’n Chiarn Jee my hiarn yn ree gra myr shen neesht.

³⁷ Myr ta’n Chiarn er ve marish my hiarn yn ree, eer myr shen dy row eh marish Solomon, as e stoyl-reeoil y yannoo ny s’pooaral na stoyl-reeoil my hiarn ree David.

³⁸ Myr shen Zadok yn saggyrt, as Nathan y phadeyr, as Benaiah mac Jehoiada, as ny Cherethiteyn, as ny Pelethiteyn, hie ad sheese, as hug ad er Solomon dy varkiagh er mule ree David, as hug ad lhieu eh gys Gihon.

³⁹ As ghow Zadok yn saggyrt eairk dy ooil ass y chabbane-agglish, as dooilee eh Solomon: As heid ad yn trumpet; as dooyrt ooilley’n pobble, Dy saue Jee ree Solomon.

⁴⁰ As haink ooilley’n pobble seose geiyrt er; as ren y pobble bingys lesh greïnyn-kiaullee, as v’ad ayns ard-voggey, ayns wheesh as dy ren y thalloo craa lesh y feiyr oc.

⁴¹ As cheayll Adonijah as ooilley ny goaldee va mârish shoh, myr v’ad erreish gee. As tra cheayll Joab feiyr y trumpet, dooyrt eh, Cre’n-fa ta’n anvea shoh, t’er chur yn ard-valley bun-ry-skyn?

⁴² As choud as v’eh foast loayrt, cur-my-ner, haink Jonathan mac Abiathar yn saggyrt, as dooyrt Adonijah rish, Tar stiagh, son t’ou uss dty ghooinney dunnal, as cur lhiat naightyn mie.

⁴³ As dreggyr Jonathan as dooyrt eh rish Adonijah, Dy firrinagh ta’n chiarn ain ree David er n’yannoo Solomon yn ree.

⁴⁴ As ta’n ree er choyrt mârish Zadok yn saggyrt, as Nathan y phadeyr, as Benaiah mac Jehoiada, as ny Cherethiteyn, as ny Pelethiteyn, as t’ad er choyrt er markiagh er mule y ree.

⁴⁵ As ta Zadok yn saggyrt, as Nathan y phadeyr er ooilaghey eh ny ree ayns Gihon; as t’ad er jeet seose veih shen ayns ard-voggey, myr shen dy ren yn ard-valley craa lesh y feiyr oc: as shoh’n chiaull ta shiu er chlashtyn.

⁴⁶ As myrgeddin ta Solomon soie er stoyl-reeoil yn reeriaght.

⁴⁷ As marish shen, haink sharvaantyn y ree dy vannaghey nyn jiarn ree David, gra, Dy jean Jee ennym Solomon ny s’ooasle na dty ennym’s, as dy jean eh yn stoyl-reeoil echeysyn ny s’troshey na’n stoyl-reeoil ayd’s: as chroym y ree eh hene er y lhiabbee, ooashlaghey.

⁴⁸ As dooyrt y ree ny-sodjey, Bannit dy row’n Chiarn Jee dy Israel, t’er choyrt fer dy hoie er my stoyl-reeoil jiu, my hooillyn hene eer jeeaghyn er.

⁴⁹ As huitt atchim er ooilley ny goaldee va marish Adonijah, as hrog ad orroo, as chossyn ad dy chooilley ghooinney e raad hene.

⁵⁰ As va Adonijah ayns aggle e vaaish roish Solomon, as dirree eh seose, as hie eh, as ghow eh greme er eairkyn yn altar.

⁵¹ As ve inshit da Solomon, gra, Cur-my-ner ta Adonijah goaill aggle roish ree Solomon: son cur-my-ner, t’eh er ghoaill greme er eairkyn yn altar, gra, Lhig da ree Solomon loo dooys jiu, nagh jean eh e harvaant y varroo lesh y chliwe.

⁵² As dooyrt Solomon, My yeeaghys eh eh-hene ny ghooinney onnoroil, cha jean renaig jeh tuittym gys yn ooir: agh my vees olkys er ny gheddyn ayn, yiow eh baase.

⁵³ Eisht hug ree Solomon fys er, as hug ad lhieu eh neose veih’n altar: as haink eh, as chroym eh eh-hene gys ree Solomon: as dooyrt Solomon rish, Immee royd gys dty hie.