ئاشكراكرن 8 - ئنجیلا پیرۆز

موهرا حەفتێ و بخویردانكا زێڕین

¹ دەمێ بەرخی موهرا حەفتێ ڤەكری، نێزیكی نیڤ دەمژمێرێ بێدەنگێەكێ ئەسمان گرت.

² من هەر حەفت فریشتەیێن راوەستیای ل پێشیا خودێ دیتن و حەفت بۆڕیزان بۆ وان هاتنە دان.

³ فریشتەیەكێ دی هات و ل نك قوربانگەهێ راوەستیا، بخویردانكەكا زێڕین ڤێ بوو. گەلەك بخویر بۆ وی هاتە دان، دا ل گەل نڤێژێن هەمی پیرۆزكریان، ل سەر قوربانگەها زێڕین، ئەوا ل پێشیا تەختی، پێشكێش بكەت.

⁴ ئەڤجا دویكێلا بخویرێ ل گەل نڤێژێن پیرۆزكریان ژ دەستێ فریشتەی بلند بوو پێشیا خودێ.

⁵ پشتی هنگی فریشتەی بخویردانك بر و ژ ئاگرێ قوربانگەهێ پڕ كر و هاڤێتە سەر ئەردی، ئینا گڕگڕا عەوران، دەنگەدەنگ، برویسی و بیڤەلەرز چێبوون.

چوار بۆڕیزانێن پێشین

⁶ هنگی هەر حەفت فریشتەیان، ئەوێن حەفت بۆڕیزان ڤێ، خۆ ئامادە كر دا وان لێ بدەن.

⁷ یێ ئێكێ لێ دا، ئینا تەرگ و ئاگرێن تێكهەلی خوینێ چێبوون و بۆ سەر ئەردی هاتنە هاڤێتن. ئەڤجا سێئێكا ئەردی سۆت و سێئێكا داران سۆت و هەمی گیایێ كەسك سۆت.

⁸ فریشتەیێ دوویێ لێ دا، ئینا تشتەكێ وەكو چیایەكێ مەزن یێ ب ئاگری هەل، بۆ ناڤ دەریایێ هاتە هاڤێتن. ئەڤجا سێئێكا دەریایێ بوو خوین

⁹ و سێئێكا ئافراندیێن د دەریایێ دا دژین مرن و سێئێكا گەمیان ژ ناڤ چوون.

¹⁰ فریشتەیێ سێیێ لێ دا، ئینا ستێرەكا مەزن یا وەكو خەتیرەیا هەل ژ ئەسمانی كەفتە سەر سێئێكا رویباران و سەر كانیێن ئاڤێ.

¹¹ (ناڤێ ستێرێ تەحلیشكە.) ئینا سێئێكا ئاڤان تەحل بوو و ژ بەر وان ئاڤان گەلەك مرۆڤ مرن، چنكو تەحل ببوو.

¹² فریشتەیێ چوارێ لێ دا، ئینا ل سێئێكا رۆژێ، سێئێكا هەیڤێ و سێئێكا ستێران هاتە دان، ئەڤجا سێئێكا وان تاری بوو و سێئێكا رۆژێ رۆناهی نەدا، هەروەسا شەڤێ ژی.

¹³ هنگی من بەرێ خۆ دایێ و دەنگێ ئەلهۆیەكی ل ناڤەڕاستا ئەسمانی دفڕی بهیست، ب دەنگەكێ بلند دگۆت: «نەخوزیكێن، نەخوزیكێن، نەخوزیكێن ئاكنجیبوویێن ل سەر ئەردی، ژ بەر دەنگێ بۆڕیزانێن ماین یێن سێ فریشتەیێن دی كو ل بەرە لێ بدەن.»