ئاشكراكرن 20 - ئنجیلا پیرۆز

پاشایەتیا هزار ساڵی

¹ پشتی هنگی من فریشتەیەك دیت، ژ ئەسمانی دهاتە خوارێ و كلیلا چاڵا بێ بن و زنجیرەكا مەزن د دەستێ وی دا بوون.

² ئەوی ئەژدەها، ئانكو مارێ كەڤنار، كو ئبلیسە و ساتانە، گرت و بۆ هزار ساڵان گرێ دا

³ و هاڤێتە د چاڵا بێ بن دا و دەرگەهێ وێ ل سەر وی گرت و موهر كر، دا ئەو ئێدی مللەتان نە خاپینیت، تاكو هزار ساڵ تەمام ببن. پشتی ڤان تشتان، پێدڤیە ئەو بۆ دەمەكێ كورت بهێتە بەردان.

⁴ پاشی من تەخت و یێن ل سەر روینشتی دیتن، ئەوێن دەستهەلاتا دادكرنێ بۆ وان هاتبوو دان. هەروەسا من گیانێن وان دیتن یێن ژ پێخەمەت شاهدەییێ بۆ عیسای و بۆ پەیڤا خودێ هاتینە ڤەكوشتن، ئەوێن سوجدە بۆ دڕندەی و وێنەیێ وی نەبری و نیشانا وی ل سەر ئەنیا خۆ و دەستێ خۆ قەبیل نەكری. ئەو زیندی بوونەڤە و بۆ هزار ساڵان ل گەل مەسیحی پاشایەتی كر.

⁵ (ئەو مریێن ماین، زیندی نەبوونەڤە تاكو ئەو هزار ساڵ تەمام بووین.) ئەڤە رابوونا مریان یا ئێكێیە.

⁶ چەند یێ بەختەوەر و پیرۆزە ئەوێ بەهر د رابوونا مریان یا ئێكێ دا هەی. مرنا دوویێ دەستهەلات ل سەر وان نینە، لێ ئەو دێ بنە كاهنێن خودێ و مەسیحی و دێ ل گەل وی بۆ هزار ساڵان پاشایەتیێ كەن.

كەفتنا ئبلیسی یا دویماهیێ

⁷ دەمێ هزار ساڵ تەمام دبن، ئبلیس دێ ژ زیندانا وی هێتە بەردان.

⁸ ئەو دێ دەركەڤیت دا مللەتێن ل هەر چوار كوژیێن ئەردی، ئانكو گۆگ و ماگۆگ، بخاپینیت، دا وان بۆ جەنگێ كۆم بكەت. ژمارەیا وان وەكو خیزێ دەریایە.

⁹ ئەو ل سەر هەمی ئەردی بەڵاڤ بوون و سەربازگەها پیرۆزكریان و باژێڕێ خۆشتڤی دۆرپێچ كر. لێ ئاگر ژ ئەسمانی هاتە خوارێ و ئەو خوارن

¹⁰ و ئەو ئبلیسێ ئەو خاپاندین، بۆ ناڤ دەریاكا ئاگری و كپریتێ هاتە هاڤێتن، بۆ وی جهێ دڕندە و پێغەمبەرێ درەوین تێدا. ئەو دێ ب شەڤ و رۆژ، بۆ هەتا هەتایێ هێنە ئەشكەنجە دان.

دادكرنا دویماهیێ

¹¹ پشتی هنگی من تەختەكێ مەزن یێ سپی دیت و ئەوێ ل سەر روینشتی ژی، یێ كو ئەرد و ئەسمان ژ بەر رویێ وی رەڤین و جهەك بۆ وان نەبوو.

¹² پاشی من مری دیتن، یێن مەزن و یێن بچویك، ل بەرامبەری تەختی د راوەستیای بوون و پەرتووك ڤەبوون. پەرتووكەكا دی ژی ڤەبوو، كو پەرتووكا ژیانێ بوو. مری ب تشتێن نڤیسی د پەرتووكان دا، ل دویڤ كریارێن وان، هاتنە دادكرن.

¹³ دەریایێ مریێن د ناڤ خۆ دا رادەست كرن و مرنێ و وارێ مریان ژی مریێن د ناڤ خۆ دا رادەست كرن. هەر ئێك ل دویڤ كریارێن خۆ هاتە دادكرن.

¹⁴ پشتی هنگی مرن و وارێ مریان بۆ دەریاكا ئاگری هاتنە هاڤێتن. ئەڤ دەریاكا ئاگری مرنا دوویێیە.

¹⁵ هەر كەسێ ناڤێ وی تۆماركری د پەرتووكا ژیانێ دا نەهاتە دیتن، ئەو بۆ دەریاكا ئاگری هاتە هاڤێتن.