3 یوحەننا 1 - ئنجیلا پیرۆز

سڵاڤ

¹ ژ من یێ ریهسپی، بۆ گایۆسێ خۆشتڤی، ئەوێ ئەز د راستیێ دا حەز ژێ دكەم.

² هەی خۆشتڤی، ئەز نڤێژێ دكەم كو تۆ د هەمی تشتان دا یێ سەركەفتی و ساخلەم بی، هەروەكو گیانێ تە یێ سەركەفتی.

³ ئەز گەلەك دلخۆش بووم دەمێ هندەك برا هاتین و دەربارەی پێگیریا تە ب راستیێ شاهدەیی دای، كا چەوا تۆ ل سەر راستیێ دچی.

⁴ من دلخۆشیەكا ژ ڤێ مەزنتر نینە كو ئەز ببهیسم زاڕۆكێن من ل سەر راستیێ دچن.

پشتەڤانیكرنا برایان

⁵ هەی خۆشتڤی، تۆ یێ دلسۆزی د كارێن خۆ دا، یێن تۆ بۆ برایان دكەی، هەر چەندە د بیانینە.

⁶ وان ل بەرامبەر جڤاكا باوەرداران شاهدەیی ل سەر حەزژێكرنا تە دا. تۆ دێ كارەكێ باش كەی، دەمێ تۆ ب شێوەیەكێ هەژی خودێ وان ب رێ بئێخی.

⁷ چنكو ئەو ژ پێخەمەت ناڤی دەركەفتینە و تشتەك ژ مللەتان وەرنەگرتیە.

⁸ لەوما پێدڤیە ئەم پشتەڤانیا كەسێن وەسا بكەین، دا هەڤكارێن وان بین بۆ راستیێ.

دیۆتریفس و دیمیتریۆس

⁹ من تشتەك بۆ جڤاكا باوەرداران نڤیسی، لێ دیۆتریفس، ئەوێ دڤێت د ناڤ وان دا كەسێ ئێكێ بیت، مە قەبیل ناكەت.

¹⁰ لەوما ئەگەر ئەز هاتم، دێ سەرنجا هەوە راكێشمە سەر كارێن ئەو دكەت، كا چەوا ب گۆتنێن خراب نەكامیا مە دكەت. ئەو ب ڤێ چەندێ ژی بەس ناكەت، لێ برایان ژی قەبیل ناكەت و هەر ئێكێ دڤێت برایان قەبیل بكەت، ئەو رێكێ لێ دگریت و ژ جڤاكا باوەرداران دەردئێخیت.

¹¹ هەی خۆشتڤی، چاڤ ل خرابیێ نەكە، لێ ل باشیێ بكە. هەر ئێكێ باشیێ دكەت، ئەو ژ خودێیە و یێ خرابیێ دكەت، ئەوی خودێ نەدیتیە.

¹² سەبارەت دیمیتریۆسی، هەمی كەس بۆ باشیا وی شاهدەییێ ددەن، خۆ پەیاما راستیێ ب خۆ ژی شاهدەییێ بۆ ددەت. ئەم ژی شاهدەییێ بۆ ددەین و هوین دزانن كو شاهدەییا مە یا راستە.

سڵاڤێن ئاشتیێ

¹³ من گەلەك تشت هەبوون بۆ تە بنڤیسم، لێ من نەڤێت ب حبری و پێنڤیسی بیت.

¹⁴ ئەز هیڤیدارم ل دەمەكێ نێزیك تە ببینم و دێ روی ب روی ئاخڤین.

¹⁵ ئاشتی ل سەر تە بیت. هەڤال سڵاڤان ل تە دكەن. ناڤ ب ناڤ سڵاڤان ل هەڤالان بكە.