1 كورنتۆس 13 - ئنجیلا پیرۆز

هێژاترین رێك حەزژێكرنە

¹ ئەگەر ئەز ب زمانێن مرۆڤ و فریشتەیان بئاخڤم، لێ من حەزژێكرن نەبیت، ئەو ئەز وەكو وێ سێلا سفری لێ هاتم، ئەوا ب قوتانێ تنگە تنگێ دكەت یان ژی زەنگلەكێ زنگە زنگێ دكەت.

² ئەگەر من بەهرەیا راگەهاندنا پەیاما خودێ هەبیت و هەمی نهێنیان و هەمی زانینێ بزانم و ئەگەر من باوەریەكا تەمام هەبیت، كو چیایان پێ ڤەگوهێزم، لێ من حەزژێكرن نەبیت، ئەو ئەز چ نینم.

³ ئەگەر ئەز هەمی مالێ خۆ ل سەر بەلەنگازان بەڵاڤە بكەم و لەشێ خۆ بۆ سۆتنێ دانم، لێ من حەزژێكرن نەبیت، ئەڤە من چ قازانج نەكر.

⁴ حەزژێكرن یا بێهنفرەهە، حەزژێكرن یا دلنازكە. حەزژێكرن چاڤپێڕانەبوونێ ناكەت، شانازیێ ب خۆ نابەت، دفنا خۆ بلند ناكەت،

⁵ رەفتارێن كرێت ناكەت، بزاڤێ بۆ بەرژەوەندیا خۆ ناكەت، زوی تۆڕە نابیت، شاشیێن كەسێن دی د دلێ خۆ دا هەلناگریت،

⁶ ل سەر خرابیێ دلخۆش نابیت، لێ ل سەر راستیێ دلخۆش دبیت،

⁷ خۆ ل بەر هەمی تشتان دگریت، باوەر ژ هەمی تشتان دكەت، دەربارەی هەمی تشتان دەست ژ هیڤیێ بەرنادەت، بێهنا خۆ ل سەر هەمی تشتان فرە‍‌ھ دكەت.

⁸ حەزژێكرن چ جاران ب دویماهی ناهێت. لێ بەهرەیا پەیام راگەهاندنێ دێ ژ كار كەڤیت، بەهرەیا ئاخفتنێ ب زمانێن دی دێ ب دویماهی هێت و بەهرەیا زانینێ دێ ژ كار كەڤیت،

⁹ چنكو زانینا مە نە یا كاملە و پەیام راگەهاندنا مە ژی نە یا كاملە.

¹⁰ لێ دەمێ تشتێ كامل بهێت، ئەوێ نەكامل دێ ژ كار كەڤیت.

¹¹ دەمێ ئەز زاڕۆك بووم، ئەز وەكو زاڕۆكان دئاخفتم، من وەكو زاڕۆكان هزر دكر، ئەز وەكو زاڕۆكان د تشتان دگەهشتم. دەمێ ئەز بوویمە زەڵام، من دەست ژ تشتێن زاڕۆكینیێ بەردا.

¹² ئەڤجا نوكە د خۆدیكێ را، ئەم شێلی دبینین، لێ وی دەمی ئەم دێ روی ب روی بینین. نوكە زانینا من نە یا كاملە، لێ وی دەمی ئەز دێ ب كاملی نیاسم، هەروەكو ئەز ب كاملی هاتیمە نیاسین.

¹³ ئەڤجا ئەڤ هەر سێیە دمینن: باوەری، هیڤی و حەزژێكرن و یا ژ هەمیان مەزنتر حەزژێكرنە.