- नहेम्याह 6 - Bundeli Holy Bible

नहेम्‍याह के बिरुद्ध साजिश

¹ जब सम्‍बल्‍लत, तोबियाह और अरबी गेशेम और हमाए और दुस्‍मनन हों जौ समाचार मिलो, कि मैं सहरपनाह हों बनवा चुको; लेकिन ऊ बेरा लौ मैं फाटकन में पल्‍ले नें लगा पाओ हतो, फिन भी सहरपनाह में कौनऊं दरार नें रै गई हती।

² तब सम्‍बल्‍लत और गेशेम ने मोरे लिगां ऐसो संदेसो पठैओ, “आ, हम ओनो के मेंदना के केफिरीम गांव में एक दूसरे सें भेंट करें।” परन्‍त बे मोरी हानि करबे की मन्‍सा रखत हते।

³ परन्‍त मैंने उनके लिगां दूतों सें ऐसो संदेसो पठै दओ, “मैं तौ भौत काम में लगो आंव, उतै नईं आ सकत; ई काम हों छोड़कें तुमाए लिगां आबे सें जौ काम बंद काय रए?”

⁴ फिन उनोंरन ने चार बेर मोरे लिगां बैसई संदेसो पठैओ, और मैंने उनहों बैसई जवाब दओ।

⁵ तब पांचवीं बेर सम्‍बल्‍लत ने अपने सेवक हों खुली भई चिठिया देकें मोरे लिगां पठैओ,

⁶ जीमें ऐसो लिखो हतो, “जात जात के लोगन में ऐसो कओ जात आय, और गेशेम सोई जाई बात कैत आय, कि तुमाई और यहूदियन की मनसा बलवा करबे की आय, और ई कारन तें ऊ सहरपनाह हों बनवा रओ आय; और तें इन बातन के अनसार उनकौ राजा बनबो चाहत आय।

⁷ तेंने यरूशलेम में आगमवक्‍ता ठैराए आंय, जो एैसो कहकें तोरे बारे में परचार करें, कि ‘यहूदा में एक राजा आय’। अब ऐसोई समाचार राजा हों दओ जैहै। ई लाने अब आ, हम एक संगै सम्‍मति करें।”

⁸ तब मैंने ऊके लिगां कहला पठैओ, “जैसो तें कैत आय, ऊंसो कछु भी नईं भओ, तें जे बातें अपने हिया सें गढ़त आय।”

⁹ बे सब जनें जौ सोचकें हमें डराओ चाहत हते, “उनके हाथ ढीले पड़ैं, और काम बन्‍द हो जाबै।” परन्‍त अब हे यहोवा परमेसुर तें मोहों हिम्‍मत दे।

¹⁰ फिन मैं शमायाह के घर में गओ, जो दलायाह कौ मोंड़ा और महेतबेल कौ पोता हतो, ऊ तौ घरई में रैत हतो; ऊने कई, “आ, हम यहोवा परमेसुर के भवन के भीतर आपस में भेंट करें और भवन के किवाड़ बन्‍द करें; कायसे बे लोग तोहों मारबे हों आहें, रातई हों बे तोहों मारबे हों आहें।”

¹¹ परन्‍त मैंने कई, “का मोरे जैसो मान्‍स भगै? और मोय जैसो को आय जो अपनो प्रान बचाबे के लाने भवन में पिड़ै? मैं नईं जाबे कौ।”

¹² फिन मैंने जान लओ कि ऊ यहोवा परमेसुर कौ भेजो मान्‍स नईंयां परन्‍त ऊने हर बात ईसुर कौ बचन कहकें मोरी हानि के लाने कई, कायसे तोबियाह और सम्‍बल्‍लत ने ऊहों रुपईया दे रखे हते।

¹³ उनोंरन ने ऊहोें ई कारन रुपईया दे रखे हते कि मैं डर जाओं, और डरकें पापी ठैरों, और उनहों दोस लगाबे कौ मौका मिलै और बे मोरी नामधराई कर सकें।

¹⁴ हे मोरे यहोवा परमेसुर! तोबियाह, सम्‍बल्‍लत, और नबिया नोअद्याह और जितेक आगमवक्‍ता मोहों डराओ चाहत हते, उन सबके ऐसे ऐसे कामन की याद धर।

सहरपनाह कौ काम पूरो होबो

¹⁵ एलूल मईना के पच्‍चीसवें दिन हों मतलब बावन दिना के भीतरें सहरपनाह बन चुकी।

¹⁶ जब हमाए सब दुस्‍मनन ने जा बात सुनी, तब हमाए चारऊं कोद रैबेवारे सब अन्‍यजाति डरा गए, और मुलक सरमिंदा भए; कायसे उनोंरन ने जान लओ कि जौ काम हमाए यहोवा परमेसुर की कोद सें भओ।

¹⁷ उन दिना में सोई यहूदी रईसन और तोबियाह के मजारें चिठिया बिलात आत जात हथीं।

¹⁸ कायसे ऊ आरह के मोंड़ा शकम्‍याह कौ दामाद हतो, और ऊके मोंड़ा यहोहानान ने बेरेक्‍याह के मोंड़ा मशुल्‍लाम की बिटिया हों ब्‍याह लओ हतो; ई कारन मुतके यहूदा के मान्सन ऊकी तरफदारी करबे हों बेवस हते।

¹⁹ बे मोरी सुनतई ऊके भले कामन की चरचा करन लगत हते, और मोरी बातन सोई ऊहों सुनाओं करत हते। और तोबियाह मोहों डराबे के लाने चिठियां भेजत हतो।