- नहेम्याह 4 - Bundeli Holy Bible

नहेम्‍याह द्वारा बिरोधियन कौ सामना

¹ जब सम्‍बल्‍लत ने सुनो कि यहूदी लोग सहरपनाह हों बना रए आंय, तब ऊने ईहों बुरओ मानो, और भौत रिसियाकें यहूदियन हों ठट्ठों में उड़ाऊन लगो।

² ऊ अपने भईयन के और शोमरोन की सेना के सामूं ऐसो कैन लगो, “बे कमजोर यहूदी का करबो चाहत आंय? का बे औरें जौ काम अपनी ताकत सें करहें? का बे अपनी जागां पक्‍की कर पाहें? का बे बलिदान चढ़ा पाहें? का बे सबरो काम आजई निपटा दैहें? का बे माटी के ढेरन में के जले पथरों हों फिन नए सिरे सें बनाहें?”

³ ऊके लिगां तो अम्‍मोनी तोबियाह हतो, और ऊ कैन लगो, “जो कछु बे बना रए आंय, अगर कौनऊं लड़ईया भी ऊके ऊपर चढ़ै, तो बो उनकी बनाई भई पथरन की सहरपनाह हों तोड़ डालहै!”

⁴ हे हमाए यहोवा परमेसुर, सुन ले कि हमाई कैसी बेज्‍जती हो रई आय; और उनको करो भओ अपमान उनईं की मूंड़ पै लौटा दे, और उनहों गुलामी के देस में लुटवा दे।

⁵ उनकौ अधरम तें नें छिपा, और नें उनकौ पाप तोरे सामूं सें मिटाओ जाए; कायसें उनोंरन ने तोहों सहरपनाह बनाबेवारन के सामूं गुस्‍सा दिलाओ आय।

⁶ हमोंरन ने सहरपनाह हों बनाओ; और सबरी सहरपनाह आधी ऊंचाई लौ जुड़ गई। कायसें लोगन कौ हिया ऊ काम में रोज लगो रओ।

⁷ जब सम्‍बल्‍लत, तोबियाह, अरबियों, अम्‍मोनियों और अशदोदियों ने सुनो, कि यरूशलेम की सहरपनाह की मरम्‍मत होत जात आय, और ऊमें के नाके बन्‍द होन लगे आंय, तब उनोंरन ने भौतई बुरओ मानो;

⁸ और सबई ने मिलकें ऐसी पंचयात करी कि जाकें यरूशलेम सें लड़ें, और उनके काम में गड़बड़ी करें।

⁹ परन्‍त हमोंरन ने अपने यहोवा परमेसुर सें बिन्‍तवाई करी, और उनके बिरोद में दिन-रात के चौकीदार ठैरा दए।

¹⁰ परन्‍त यहूदा के मान्सन कैन लगे, “ढोबेवारन की ताकत कम होन लगी आय, और मलबा तौ मुतकौ पड़ो आय, ई लाने सहरपनाह हमसें नईं बन सकत।”

¹¹ हमाए दुस्‍मन कैन लगे, “जब लौ हम उनके मजारें नें पोंचें, और उनहों मारकें काम बन्‍द नें करें, तब लौ उनहों नें कछु मालूम हुईयै, और नें कछु दिखाई पड़है।”

¹² फिन जो यहूदी उनके आस-पास रैत हते, उनोंरन ने सब जागां से दस बेर आ आकें, हमोंरों सें कई, “तुमोंरों हों हमाए लिगां लौट आओ चईये।”

¹³ ई कारन मैंने लोगन हों तलवारें, बरछियां और धनुस देकें सहरपनाह के पाछेें सबसे नेंचें की खुली जागां में घराने घराने के अनसार बैठा दओ।

¹⁴ तब मैं हेरकें उठो, और रईसन और हाकमन और दूसरे मान्‍सन सें कई, “उनसें नें डरौ; पिरभु जो महान और भयजोग आय, ओई हों याद करकें, अपने भईयन, बेटा, बिटियन, बईयरन और घरों के लाने लड़ाई करियो।”

¹⁵ जब हमाए दुस्‍मनन ने सुनो कि जा बात हमोंरों हों मालूम हो गई आय, और यहोवा परमेसुर ने उनकी चाल निस्‍फल कर दई आय, तब हम सब सहरपनाह के लिगां अपने अपने काम पै लौट गए।

¹⁶ ऊ दिना सें मोरे आधे सेवक तौ ऊ काम में लगे रए और आधे बरछियां, तलवारों, धनुषों और झिलम हों पैरें रैत हते; और यहूदा के सबरे घराने के पाछें हाकम रओ करत हते।

¹⁷ सहरपनाह होें बनाबेवारे और बोझ ढोबेवारे दोई बोझ उठात हते, मतलब एक हाथ सें काम करत हते और दूसरे हाथ सें हथयार पकड़ें रैत हते।

¹⁸ राजमिस्‍त्री अपनी अपनी जांघ पै तलवारें लटकाए भए काम करत जात हते। नरसिंगा फूंकबेवारो मोरे लिगां रैत हतो।

¹⁹ ई लाने मैंने रईसों, हाकमन और सबरे मान्‍सन सें कई, “काम तौ बड़ो और फैलो भओ आय, और हम लोग सहरपनाह पै अलग अलग एक दूसरे सें दूर रैत आंय।

²⁰ ई लाने जितै सें नरसिंगा तुमें सुनाई दे, उतईं हमाए लिगां जमा हो जईयो। हमाओ यहोवा परमेसुर हमाई कोद सें लड़है।”

²¹ सो ई तरहां हमोंरें काम में लगे रए, और उन में सें आधे, बड़े भुंसारे सें तारों कें कड़बे लौ बरछियां लएं रैत हते।

²² फिन ओई बेरा मैंने लोगों सें जा सोई कई, “एक एक मान्‍स अपने सेवक समेंत यरूशलेम के भीतर रात बिताए करें, कि बे रात हों तौ हमाई रखनवारी करें, और दिन हों काम में लगे रएं।”

²³ और नें तौ मैं अपने उन्‍ना उतारत हतो, और नें मोरे भईया, नें मोरे सेवक और नें बे चौकीदार जो मोरे संगै रैत हते, बे सोई अपने उन्‍ना नईं उतारत हते; सब औरें पानू के लिगां सोई हथयार लेकें जात हते।