- मरकुस 7 - Bundeli Holy Bible

¹ तब फरीसी और कईयक शास्त्री जौन यरूशलेम से आए हते, ऊके ऐंगर इकट्ठे भए।

² और उन ने ऊके कैऊ चेलन हां अशुद्ध यानी बिना हाथ धोए रोटी खात भओ तको।

³ कायसे यहूदी और सबरे फरीसी, पुरनियों की रीत पै चलत आंय और जब लौ अच्छी तरहां से हाथ नईं धो लेत तब लौ नईं खात आंय।

⁴ और बाजार से आके, जब लौ सपर नईं लेत, तब लौ नईं खात; और भौत सी और बातें आंय, जौन उनके ऐंगर मानबे के लाने पोंचाईं गईं आंय, जैसे कटोरों, और लोटों, और तांबे के बासन हां धोबो मांजबो।

⁵ ईसे ऊ फरीसियन ने और शास्त्रियन ने ऊसे पूछो, कि तोरे चेला काय पुरनियों की रीत पै नईं चलत, और बिना हाथ धोए रोटी खात आंय?

⁶ ऊ ने उनसे कओ; कि यशायाह ने तुम कपटियन के बारे में भौत ठीक अगमबानी करी, जैसो लिखो आय; कि जे लोग ओंठन से तो मोरी इज्जत करत आंय, पै उनकौ मन मोय से दूर रैत आय।

⁷ और जे बेकार मोरी उपासना करत आंय, कायसे मान्सन की आज्ञा हां धरम कौ उपदेस देके सिखात आंय।

⁸ कायसे तुम परमेसुर की आज्ञा हां टालके मान्सन की रीति हां मानत आव।

⁹ और उनसे कओ; तुम अपनी रीतियन हां मानबे के लाने परमेसुर की आज्ञा कैसी अच्छी तरहां से टाल देत आव।

¹⁰ कायसे कि मूसा ने कओ आय कि अपने बाप और अपनी महतारी की इज्जत करो; और जो कोई बाप और महतारी हां बुरओ कहे, ऊ अवश्य मार डालो जाय।

¹¹ लेकिन तुम कैत आव कि अगर कोऊ अपने बाप और महतारी से कहे, कि जो कछु तुम हां मोसे फायदा पोंच सकत हतो, ऊ कुरबान यानी संकल्प हो चुको।

¹² तो तुम ऊहां, ऊके बाप और ऊ की महतारी की कछु सेवा नईं करन देत।

¹³ ई तरीका से तुम अपनी रीतियन से, जिन हां तुमने बनाओ आय, परमेसुर कौ बचन टाल देत आव; और एैसई भौत से काम करत आव।

¹⁴ और ऊने लोगन हां अपने ऐंगर बुलाके उनसे कओ, तुम सब मोरी सुनो, और समझो।

¹⁵ ऐसी तो कौनऊं चीज नईंयां जौन मान्स में बाहर से समा के अशुद्ध करै; लेकिन जौन चीजें मान्स के भीतर से कड़त आंय, बेई ऊहां अशुद्ध कर देती आंय।

¹⁶ (अगर कोऊ के सुनबे के कान होबें तो सुन ले)।

¹⁷ जब ऊ भीड़ के ऐंगर से घर में गओ, तो ऊके चेलन ने ई कनौत के बारे में ऊसे पूछो।

¹⁸ ऊ ने उनसे कओ; काय तुम भी ऐसे नासमझ आव? काय तुम नईं जानत, कि जौन चीज बाहर से मान्स के भीतर जात आय, बा ऊहां अशुद्ध नईं कर सकत?

¹⁹ कायसे कि बा ऊके मन में नईं, पेट में जात आय, और संडास में निकल जात आय? ऐसो कै के ऊ ने सबरी खाबेवाली चीजन हां शुद्ध बताओ।

²⁰ फिन ऊ ने कओ; जो कछु मान्स में से कड़त आय, ओई मान्स हां अशुद्ध करत आय।

²¹ कायसे भीतर से यानी मान्स के मन से, बुरई-बुरई चिन्ता व्यभिचार।

²² चोरी, हत्या, पराई बईयर पै बुरई नजर डालबो, लोभ, दुष्टता, छल, लुच्चपन, बुरई नजर, निन्दा, घमण्ड और मूरखता निकलत आय।

²³ जे सब बुरई बातें भीतर से ही कड़त आंय और मान्स हां अशुद्ध करत आंय।

²⁴ फिन ऊ उतै से उठके सूर और सैदा के देशन में आओ; और एक घर में गओ, और चाहत हतो, कि कोऊ न जान पाबै, लेकिन ऊ छिप न सको।

²⁵ और तुरतईं एक बईयर जी की मोंड़ी में बुरई आत्मा हती, ऊ की चरचा सुनके आई, और ऊके गोड़े पै गिरी।

²⁶ जा यूनानी और सूरूफिनीकी जात की हती; और ऊ ने ऊसे बिनती करी, कि मोरी मोंड़ी में से बुरई आत्मा निकाल दे।

²⁷ ऊ ने, ऊसे कओ, पेंला लड़कन हां तृप्त हौन दे, कायसे कि लड़कन की रोटी लैके कुत्तन के आंगू डालबो उचित नईयां।

²⁸ ऊने ऊहां उत्तर दओ; कि सच आय प्रभु; तौभी कुत्ते भी तो मेज के नेंचें बच्चन की रोटी कौ चूरा खा लेत आंय।

²⁹ ऊ ने ऊसे कओ; ई बात के कारन चली जा; बुरई आत्मा तोरी मोंड़ी में से कड़ गई आय।

³⁰ और ऊ ने अपने घरै आके तको कि मोंड़ी खटिया पै पड़ी आय, और बुरई आत्मा कड़ गई आय।

³¹ फिन ऊ सूर और सैदा के देशन से कड़ के दिकपुलिस देश से होत भओ, गलील की झील पै पोंचो।

³² और मान्सन ने एक बहरा हां जौन हकला भी हतो, ऊके ऐंगर लिवा के ऊसे बिनती करी, कि अपनौ हाथ ऊ पै धरै।

³³ तो ऊ ऊहां भीड़ से अलग ले गओ, और अपनी उंगरिया ऊके कानन में डाली, और थूंक के ऊ की जीभ हां छुओ।

³⁴ और सरग कोद हां तक के सांस लई, और ऊसे कओ; इप्फत्तह, यानी खुल जा।

³⁵ और ऊके कान खुल गए, और ऊ की जीभ की गांठ भी खुल गई, और ऊ साफ-साफ बोलन लगो।

³⁶ तब ऊ ने उने चिताओ कि कोऊ से न कहियो; लेकिन जितनौ ऊ ने उने चिताओ उतनईं बे और परचार करन लगे।

³⁷ और बे भौत अचम्भे में होकें कहन लगे, ऊ ने जो कछु करो आय सब अच्छो करो आय; ऊ बैहरन हां सुनबे की, और बौरन हां बोलबे की ताकत देत आय।