- मरकुस 4 - Bundeli Holy Bible

¹ ऊ फिन झील के किनारे उपदेस दैन लगो: और ऐसी बड़ी भीड़ ऊके ऐंगर एकट्ठी हो गई, कि ऊ झील में एक नाव पै चढ़ के बैठ गओ और पूरी भीड़ धरती पै झील के किनारे ठांड़ी रई।

² और ऊ कनौत देके उन हां भौत सी बातें सिकाऊ न लगो, और अपने उपदेस में उनसे कओ।

³ सुनौ: देखो, एक बोवेवालो, बीज बोवे हां निकलो।

⁴ और बोत भए कछु तो गैल के किनारे गिरो और चिरईंयन ने आके ऊहां चुग लओ।

⁵ और कछु पथरीली धरती पै गिरो जां ऊहां भौत माटी न मिली, और गैरी माटी न मिलबे के कारन जल्दी जम आओ।

⁶ और जब सूरज कड़ो, सो जल गओ, और जड़ न पकड़बे के कारन सूक गओ।

⁷ और कछु तो झाड़ियन में गिरो, और झाड़ियन ने बड़े होकें ऊहां दबा लओ, और ऊ फल न पाओ।

⁸ लेकिन कछु साजी जमीन पै गिरो, और ऊ जमो, और बड़ौ होकें फलो फूलो, और कौनऊं तीस गुनौ, कौनऊं साठ गुनौ और कौनऊं सौ गुनौ फल लाओ।

⁹ और यीशु ने कओ; जीके पास सुनबे के लाने कान होबें ऊ सुन ले।

¹⁰ जब ऊ अकेलो रै गओ, तो ऊके संगियन ने ऊ बारह समेंत ऊसे ई कनौत के बारे में पूछो।

¹¹ यीशु ने उनसे कओ; तुम हां तो परमेसुर के राज्य के भेद की समझ दई गई आय, लेकिन बाहर वालन के लाने सबरी बातें कनौत में होती आंय।

¹² ई लाने कि बे देखत भए देखें और उने न सूझे और सुनत भए सुनें भी और न समझें; ऐसो न होबै कि बे बदलें, और माफ कर दए जाबें।

¹³ फिन यीशु ने उनसे कओ; काय तुम जा कनौत नईं समझत? तो फिन और कनौत कैसे समझ हौ?

¹⁴ बोवेवालो बचन बोऊत आय।

¹⁵ जो गैल के किनारे के आंय जां पै बचन बोओ जात आय, जे बे आएं, कि जब उन ने सुनो, तो शैतान तुरतईं आके बचन हां जौन उन में बोओ गओ हतो, उठा ले जात आय।

¹⁶ और ऊं सई जौन पथरीली धरती पै बोए जात आंय, जे बे आएं, कि जौन बचन सुन के तुरतईं खुसी से अपना लेत आंय।

¹⁷ लेकिन अपने भीतर जड़ न रखबे के कारन बे तनक दिना के लाने रहत आंय; ईके बाद जब बचन के कारन उन पै क्लेश या उपद्रव होत आय, तो बे तुरतईं ठोकर खात आंय।

¹⁸ और जौन झाड़ियन में बोए गए बे जे आंय जिन ने बचन सुनो।

¹⁹ और दुनिया की चिन्ता, और धन कौ धोका, और और चीजन कौ लोभ उन में भरके बचन हां दबा देत आय। और ऊ बेकार रै जात आय।

²⁰ और जौन साजी धरती में बोए गए, जे बे आएं, जो बचन सुनके अपना लेत और फल लिआत आंय, कौनऊं तीस गुनौ, कोनऊं साठ गुनौ, और कौनऊं सौ गुनौ।

²¹ और ऊ ने उनसे कओ; का दिया हां ई लाने लाओ जात आय कि पैमाने या खटिया के तरें धरो जाए? काय ईके लाने नईं, कि ओंटा पै धरो जाए?

²² कायसे कि कौनऊं चीज छिपी नईंयां, बल्कि ईहां कि दिखान लगै।

²³ और न कछु छिपो भओ आय, पै ईके लाने कि दिखान लगै। अगर कोऊ के सुनबे के कान होबें, तो सुन लैबे।

²⁴ फिन उनसे ऊ ने कओ; ध्यान देओ, कि का सुनत आव? जौन नाप से तुम नापत आव ओई से तुमाए लाने भी नापो जै है, और तुमें ज्यादा दओ जै है।

²⁵ कायसे जीके पास में है, ऊहां दओ जै है; लेकिन जीके पास में नईंयां ऊसे जौन ऊके ऐंगर आय लै लओ जै है।

²⁶ फिन ऊ ने कओ; परमेसुर कौ राज्य ऐसो आय, जैसे कोनऊं मान्स धरती पै बीज छिड़के।

²⁷ और रात में सो जाबै, और दिन होत जगै और ऊ बीज ऐसे जमै और बढ़ै कि ऊ न जान पाए।

²⁸ धरती अपने आप फल लिआत आय, पेंला कुश, फिन बाल, और तब बालन में तईयार दाना।

²⁹ लेकिन जब दाना पक जात आय, तो ऊ तुरतईं हंसिया लगात आय, कायसे कि कटाई आ गई आय।

³⁰ फिनऊ ने कओ; कि हम परमेसुर के राज्य की कनौत कीसें देबें, और कौन किस्सा से ऊकौ बखान करें?

³¹ ऊ राई के दाने कैसो आय; कि जब धरती में बोओ जात आय तो धरती के सबरे बीजन से छोटो होत आय।

³² लेकिन जब बोओ गओ, तो जमके सबरे साग पातन से बड़ो हो जात आय, और ऊ की बड़ी डगालें निकलत आंय, कि आकास की चिरईयां ऊके छांयरे में बसेरो कर सकत आंय।

³³ और ऊ उन हां ई तरहां के भौत से किस्सा सुना सुना के उनकी जितनी समझ हती उतनो बचन सुनात हतो।

³⁴ और बिना किस्सा कएं उनसे कछु भी न कैत हतो; लेकिन अकेले में खुद के निजी चेलन हां सबरी बातन कौ मतलब बतात हतो।

³⁵ ओई दिना जब दिन डूबन लगो और संजा भई, तो ऊ ने उनसे कओ; आओ, हम ऊ पार चलें।

³⁶ और बे भीड़ हां छोड़ के जैसो ऊ हतो, ऊं सई ऊहां नाव पै संग्गै ले चले; और ऊके संग्गै, और भी नावें हतीं।

³⁷ तबईं जोर से आंधी आई, और पानी की हिलोरें नाव पै इतै तक लगीं, कि बा अब पानी से भरी जा रई हती।

³⁸ और ऊ खुद पछाऊं के हिस्सा में गद्दी पै सो रओ हतो; तब उन ने ऊहां जगा के ऊसे कओ; हे गुरू, काय तोय चिन्ता नईंयां, कि हम नास भए जात आंय?

³⁹ तब ऊ ने उठके आंधी हां डांटो, और पानी से कओ; “शान्त रह, रुक जा”: और आंधी चलबो बन्द हो गई और खूब चैन हो गओ।

⁴⁰ और उनसे कओ; तुम काय डरात आव? काय तुमें अब तक बिसवास नईंयां?

⁴¹ और बे भौत डरा गए और एक दूसरे से बोले; जौ को आय, कि आंधी और पानी तक ऊ की आज्ञा मानत आंय?