- मरकुस 15 - Bundeli Holy Bible

¹ भोर के होतईं तुरतईं बड़े पुजारियन, और धरम पंडितन, बल्कि सबरी बड़ी सभा ने सलाह कर के यीशु हां बंधवाओ, और ऊहां लै जाके पीलातुस नाओं हाकिम के हाथ में सौंप दओ।

² और पीलातुस ने ऊसे पूंछो, का तें यहूदियन कौ राजा आय? ऊने ऊहां जवाब दओ; कि तें खुद ही कै रऔ आय।

³ और बड़े पुजारी ऊ पै भौत बातन कौ दोष लगा रए हते।

⁴ पीलातुस ने ऊसे फिन पूंछो, का तें कछु जवाब नईं देत, देख जे तोपै कितनी बातन कौ दोष लगात आंय?

⁵ यीशु ने फिन कछु जवाब नईं दओ; इतै लौ कि पीलातुस हां बड़ौ अचम्भा भओ।

⁶ और पीलातुस ओई त्योहार में कौनऊं एक बंधुआ जीहां लोग चाहत हते, उन के लाने छोड़ दओ करत हतो।

⁷ और बरअब्बा नाओं कौ एक मान्स उन दंगा मचाबे वालन के संग्गै बंधुआ हतो, जिन ने दंगा में हत्या करी हती।

⁸ और भीड़ ऊपर जाके पीलातुस से बिनती करन लगी, कि जैसो तें हमाए लाने करत आओ आय, ऊंसई कर।

⁹ पीलातुस ने उन हां जवाब दओ, का तुम चाहत आव, कि मैं तुमाए लाने यहूदियन के राजा हां छोड़ देओं?

¹⁰ कायसे कि ऊ जानत हतो, कि बड़े पुजारियन ने ऊहां ईरषा से पकड़वाओ हतो।

¹¹ लेकिन बड़े पुजारियन ने लोगन हां उसकाओ, कि ऊ बरअब्बा हां उनके लाने छोड़ दे।

¹² जौ सुनके पीलातुस ने उनसे फिन पूंछो; तो जीहां तुम यहूदियन कौ राजा कैत आव, ऊहां मैं का करों? बे फिन चिल्लाने, कि ऊहां क्रूस पै चढ़ा दे।

¹³ पीलातुस ने उनसे कओ; काय, ईने का बुराई करी आय?

¹⁴ लेकिन बे और भी चिल्लाने, कि ऊहां क्रूस पै चढ़ा दे।

¹⁵ तब पीलातुस ने भीड़ हां खुस करबे की इच्छा से, बरअब्बा हां उनके लाने छोड़ दओ, और यीशु हां कोड़े लगवा के लोगन हां सौंप दओ, कि क्रूस पै चढ़ाओ जाए।

¹⁶ और सिपाही ऊहां किले के भीतर आंगन में लै गए जौन प्रीटोरियुन कहाऊ त आय, और सबरी पलटन हां बुला लाए।

¹⁷ और उन ने यीशु हां बैंजनी उन्ना पैराओ और कांटों कौ मुकुट बनाके ऊ की मूंड़ पै रख दओ।

¹⁸ और जौ कह के ऊहां नमस्कार करन लगे, कि हे यहूदियन के राजा, नमस्कार।

¹⁹ और बे ऊ की मूंड़ पै सरकण्डा मारत हते, और ऊ पै थूंकत, और टिंगरन के बल बैठ के ऊहां परनाम करत रए।

²⁰ और जब बे ऊ की हंसी कर चुके, तो ऊ पै से बैंजनी उन्ना उतार के ओई के उन्ना पैराए; और तब ऊहां क्रूस पै चढ़ाबे के लाने बाहर ले गए।

²¹ और सिकन्दर और रुफुस नाओं के मान्स कौ बाप, शिमौन नाओं एक कुरेनी जात कौ मान्स, जौन गांव से आ रओ हतो उते से कड़ो; उन ने ऊहां बेगार में पकड़ो, कि ऊकौ क्रूस उठा के लै चले।

²² और बे यीशु हां गुलगुता नाओं की जांगा पै जी कौ मतलब खोपड़ी की जांगा आय ले आए।

²³ और ऊहां मुर्र नाओं की नशीली दवा मिलो दाखन कौ रस दैन लगे, लेकिन ऊ ने नईं लओ।

²⁴ तब उन ने यीशु हां क्रूस पै चढ़ाओ, और ऊके उन्ना पै चिट्ठी डाल के, कि कीहां का मिलै, उने बांट लओ।

²⁵ और पहर भर दिन चढ़ आओ हतो, जब उन ने ऊहां क्रूस पै चढ़ाओ।

²⁶ और यीशु के दोष कौ कागज लिख के, ऊके ऊपर लगा दओ गओ कि “यहूदियन कौ राजा”।

²⁷ और उन ने यीशु के संग्गै दो डाकू, एक ऊ की दाहिनी और एक ऊके डेरे कोद क्रूस पै चढ़ाए।

²⁸ (तब धर्मशास्त्र कौ ऊ बचन, कि यीशु अपराधियन के संग्गै गिनो गओ, पूरौ भओ)।

²⁹ और गैल में जाबेवाले मूंड़ हला हला के और जौ कह के ऊ की निन्दा करत हते, कि वाह! मन्दर के गिराबेवाले और तीन दिना में बनाबेवाले! क्रूस पै से उतर के अपने आप हां बचा ले।

³⁰ ऐई तरीका से बड़े पुजारी और धरम पंडित यीशु कौ मजाक बनाऊ त हते।

³¹ बे आपस में हंसी उड़ा के कहत हते; कि ईनें औरन हां बचाओ, और खुद हां नईं बचा सकत।

³² इस्राएल कौ राजा मसीह अब क्रूस पै से उतर आबै कि हम देख के बिसवास करें, और जौन ऊके संग्गै क्रूस पै चढ़ाए गए हते, बे तक ऊ की निन्दा करत हते।

³³ और दोपहर होबे पै, सबरे देश में अन्धयारौ छा गओ; और तीसरे पहर लौ रओ।

³⁴ तीसरे पहर यीशु ने जोर से कओ, इलोई, इलोई, लमा शबकतनी? जी कौ मतलब आय; हे मोरे परमेसुर, हे मोरे परमेसुर, तेंने मोहां काय छोड़ दओ?

³⁵ जौन ऐंगर ठांड़े हते, उन में से कितनन ने जौ सुनके कओ: देखौ, जौ एलिय्याह अगमवकता हां पुकारत आय।

³⁶ और एक मान्स ने दौड़ के इसपंज हां सिरका में डुबाओ, और डंडा पै धर के ऊहां चुसाओ; और कओ, ठैर जाओ, तकें, कि एलिय्याह ऊहां उतारबे के लाने आत आय कि नईं।

³⁷ तब यीशु ने जोर से चिल्ला के प्रान छोड़ दए।

³⁸ और मन्दर कौ परदा ऊपर से नीचे लौ फट के दो टूंका हो गओ।

³⁹ जौन सिपाहियन कौ मुखिया यीशु के सामने ठांड़ो हतो, जब ऊहां ऐसे चिल्ला के प्रान छोड़त भओ तको, तो ऊ ने कओ, सच्चऊं जौ मान्स, परमेसुर कौ बेटा हतो।

⁴⁰ कैऊ बईयर भी दूर से तक रईं हतीं: उन में मरियम मगदलीनी और छोटे याकूब की और योसेस की महतारी मरियम और शलोमी हतीं।

⁴¹ जब यीशु गलील में हतो, तो जे बईयरें ऊके पांछू हो लेत हतीं और ऊ की सेवा खुसामद करत हतीं; और भी कैऊ एक बईयरें हतीं, जौन यीशु के संग्गै यरूशलेमआईं हतीं।

⁴² जब संजा हो गई, तो ईसे कि तईयारी कौ दिन हतो, जौन विश्राम के एक दिना पेंला होत आय।

⁴³ अरिमतिया शहर कौ रहबेवालो यूसुफ आओ, जौन इज्जतदार मंत्री और खुद भी परमेसुर के राज में बिसवास करत हतो; ऊ बड़ी हिम्मत कर के पीलातुस राजपाल के ऐंगर गओ और ऊसे यीशु की लाश मांगी।

⁴⁴ पीलातुस राजपाल ने अचम्भा करो, कि यीशु इतने जल्दी मर गओ; और सिपाहियन के मुखिया हां बुलाके पूंछो, कि का ऊहां मरे भए देर भई?

⁴⁵ सो जब सूबेदार से हाल जान लओ, सो लाश यूसुफ हां दिला दई।

⁴⁶ तब यूसुफ ने एक पतली चादर खरीदी, और लाश हां उतार के चादर में पलेड़ो, और एक कबर में जौन चट्टान में खोदी गई हती रखो, और कबर के द्वारे पै एक पथरा लुढ़का दओ।

⁴⁷ और मरियम मगदलीनी और योसेस की महतारी मरियम तक रईं हतीं, कि ऊ कहां रखो गओ आय।