- मरकुस 11 - Bundeli Holy Bible

¹ जब यीशु और ऊके चेला यरूशलेम नगर के ऐंगर जैतून पहरवा पै बैतफगे और बैतनिय्याह गांव के ऐंगर आए, तो ऊ ने अपने चेलन में से दो हां जौ कह के भेजो।

² कि अपने सामने के गांव में जाओ, और ऊ में पोंचतई एक गदईया कौ बच्चा जी पै कभऊं कोऊ सवार नईं भओ, बंधो भओ तुम हां मिल है, ऊहां छोड़ लै आओ।

³ अगर तुम से कोऊ जौ पूछे, जौ का करत आव? तो कईयो, कि प्रभु हां ईकौ प्रयोजन आय; और ऊ तुरतईं ऊहां इतै भेज दै है।

⁴ उन ने जाके ऊ बच्चा हां दरवाजे के ऐंगर चौक में बंधो भओ पाओ, और छोड़न लगे।

⁵ उन में से जौन उतै ठांड़े हते, कोऊ कोऊ कहन लगे, जौ का करत आव, गदईया के बच्चा हां काय छोड़त आव?

⁶ उन ने जैसो यीशु ने कओ हतो, ऊं सईं उन से कै दओ, तब उन ने उने जान दओ।

⁷ और उन ने बच्चा हां यीशु के ऐंगर लै आके ऊ पे अपने उन्ना डाले और यीशु ऊके ऊपर बैठ गओ।

⁸ कैऊ अन ने अपने उन्ना गैल में बिछाए और दूसरन ने खेतन में से डगालें काट काट के फैला दईं।

⁹ और जौन ऊके आंगू आंगू जाते और पांछू पांछू चले आत हते, जोर जोर से चिल्लाऊ त जात हते, कि होशाना; धन्य आय ऊ जौन प्रभु के नाओं से आत आय।

¹⁰ हमाए बाप दाऊद कौ राज जो आ रओ आय; धन्य आय: आकास में होशाना।

¹¹ और यीशु यरूशलेम नगर में पोंच के मन्दर में आओ, और चारऊ कोद सब चीजन हां तक के बारह चेलन के संग्गै बैतनिय्याह गांव गओ कायसे कि संजा हो गई हती।

¹² दूसरे दिना जब यीशु और ऊके चेला बैतनिय्याह गांव से निकले तो ऊहां भूख लगी।

¹³ यीशु दूर से एक हरौ अंजीर कौ पेड़ तक के फल की आसा में ऐंगर गओ, पै पत्तन हां छोड़ कछु न पाओ; कायसे कि फल कौ समय न हतो।

¹⁴ ईपै यीशु ने ऊ पेड़ से कओ, अबईं से कोऊ तोरो फल कभऊं न खाए। ऊके चेला जे बात सुन रए हते।

¹⁵ फिन बे यरूशलेम में आए, और यीशु मन्दर में गओ; और उतै जौन सामान कौ लैन दैन कर रए हते उने बाहर निकालन लगो; और सर्राफों की पीढ़े और परेबा के बेंचबेवालन की चौकियां पलट दईं।

¹⁶ और मन्दर में से होकें कोऊहां बासन लैके आबे जाबे नईं दओ।

¹⁷ और उपदेस कर के उन से कओ, का जौ धरमपोथी में नईं लिखो आय, कि मोरो घर सब जातन के लाने प्रार्थना कौ घर कहला है? पै तुम ने ईहां डाकुअन की गुफा बना दई आय।

¹⁸ जौ सुन के बड़े पुजारी और शास्त्री ऊ की हत्या करबे कौ मौका ढूंढ़न लगे; कायसे कि ऊसे डरात हते, ईसे कि सबरे मान्स ऊके उपदेस से चकित हो जात हते।

¹⁹ और रोजाना संजा होत ऊ नगरी से बाहर जात हतो।

²⁰ फिन सबेरे जब बे उते से जात हते तो उन ने ऊ अंजीर के पेड़ हां जड़ तक सूखौ भओ तको।

²¹ पतरस हां बा बात याद आई, और ऊ ने ऊसे कओ, हे देवपुरुष, देख, जौ अंजीर कौ पेड़ जीहां तेंने श्राप दई हती सूख गओ आय।

²² यीशु ने ऊहां उत्तर दओ, परमेसुर पै बिसवास राखौ।

²³ मैं तुम से सांची कैत आंव, कि जो कोऊ ई पहरवा से कैबे; कि तें उखड़ जा, और समुन्दर में गिर पड़, और अपने मन में संका न करै, बल्कि आभास करै, कि जो कछु कैत आंव ऊ हो जै है, तो ऊके लाने ओई हुईये।

²⁴ ईसे मैं तुम से कैत आंव, कि जो कछु तुम प्रार्थना करके मांगौ, तो आभास कर लेओ कि तुमें मिल गओ, और तुमाए लाने हो जै है।

²⁵ और जब कभऊं तुम ठांड़े होकें प्रार्थना करत आव, तो अगर तुमाए मन में कोऊ की तरफ से कछु बिरोध होबै, तो क्षमा करो: ईसे कि तुमाओ सरगवालो बाप भी तुमाए अपराधन हां क्षमा कर है।

²⁶ अगर तुम क्षमा न कर हौ, तो तुमाओ बाप जौन सरग में आय, तुमाए अपराध क्षमा न कर है।

²⁷ यीशु अपने चेलन कै संग्गै फिन यरूशलेम नगर आओ, और जब ऊ मन्दर में टहल रओ हतो तो बड़े पुजारी, शास्त्री और पुराने तौर तरीका वाले ऊके ऐंगर आके पूंछन लगे।

²⁸ कि तें जे काम कौन हक्क से करत आय? और जौ हक्क तोहां कीने दओ कि तें जे काम करै?

²⁹ यीशु ने उन से कओ: मैं भी तुम से एक बात पूंछत आंव; मोहां जवाब देओ: तो मैं तुम हां बता हों, कि जे काम कौन से हक्क से करत आंव।

³⁰ यूहन्ना बपतिस्मा दैबेवाले कौ बपतिस्मा का सरग कोद से हतो कि मान्सन कोद से हतो? मोहां जवाब देओ।

³¹ तब बे आपस में बहस करन लगे कि अगर हम कहें, कि सरग कोद से, सो ऊ कै है; फिन तुम ने ऊकौ आभास काय नईं करो?

³² और अगर हम कहें, मान्सन कोद से तो मान्सन को डर आय, कायसे सब जानत आंय कि यूहन्ना सांचऊ में अगमवकता आय।

³³ सो उन ने यीशु हां जवाब दओ, कि हम नईं जानत: यीशु ने उन से कओ, मैं भी तुमें नईं बतात, कि जे काम कौन हक्क से करत आंव।