- मत्ती 28 - Bundeli Holy Bible

¹ सब्त के दिना के बाद हफ्ताह के पेंलई दिना बड़े भुनसारे मरियम मगदलीनी और दूसरी मरियम कबर हेरबे आईं।

² और हेरो, एक बड़ो भूंडोल भओ, कायसे परमेसुर कौ एक दूत सरग से उतर के आओ, और पत्थरा हां लुढ़का के ऊपे बिराज गओ।

³ ऊको रूप बिजली जैसो और ऊके उन्ना पाला जैसे उजरे हते।

⁴ पहिरेदार ऊके डर से थर्रा गए, और मरे से हो गए।

⁵ सरदूत ने बईयरन से कई, डराओ नईं कायसे मैं जानत आंव, कि तुम यीशु हां जीहां क्रूस पे चढ़ाओ गओ हतो, खोज रई आव।

⁶ बो इतै नईंयां, पर बो अपने कहबे के अनसार जी गओ आय; आओ बो जांगह हेरो, जिते बो धरो गओ हतो।

⁷ ऊके चेलन हां तुरतईं जाके बताओ, कि बो मरे भयन में से जी गओ आय; और हेरो बो तुम से पेंला गलील हां जै है, उते तुम ऊहां देख हौ, तको, मैं ने तुम हां बता दओ आय।

⁸ और बे डर और भारी खुसी के संग्गै झट्टई कबर से लौटीं, और चेलन हां जौ सन्देस देबे के लाने गदबद दई।

⁹ तब हेरो, यीशु उन से मिलो; और उन हां परनाम करो, और बे ऊके ऐंगर आईं, और उन ने ऊके गोड़े पकड़ के ऊहां दण्डवत करो।

¹⁰ तब यीशु ने उन से कई, डराओ नईं; जाओ और मोरे भईयन से कहियो, कि बे गलील हां चले जाएं उते बे मोय देख हैं।

¹¹ बे गैल में हतीं, कि हेरो, पहिरेदारों में से कछु ने नगर में जाके पूरो हाल महायाजकन हां कह सुनाओ।

¹² तब उन ने पुरनियन के संग्गै जमा होकें सलाह करी और सिपाहियन हां बिलात रुपईया दैके कई।

¹³ लोगन से कहियो, रात में जब हम सो रए हते, तो ऊके चेले आके ऊहां चुरा लै गए।

¹⁴ और अगर राज्यपाल के कान लौ जा बात पहुंचे, तो हम ऊहां मना लै हैं और तुम हां जोखम से बचा लै हैं।

¹⁵ उन ने रुपईया लैके जैसो बताओ गओ हतो, वैसई करो; और जे बात यहूदियन में दूर दूर लौ फैल गई, और अबै लौ प्रचलित आय।

¹⁶ ऊके बाद ग्यारह चेले गलील के ऊ पहरवा पे गए, जीहां यीशु ने उन हां बताओ हतो।

¹⁷ और उन ने ऊके दरसन पाके ऊहां परनाम करो, पर कोऊ कोऊहां शंका भई।

¹⁸ तब यीशु ने उन के ऐंगर आके कई, कि सरग और धरती कौ पूरो अधकार मोय दओ गओ आय।

¹⁹ ई लाने जाओ और सब जातन के लोगन हां चेला बनाओ, और उन हां बाप, पूत और पवित्रआत्मा के नाओं से बपतिस्मा देओ।

²⁰ और जौन जौन हुकुम मैं ने तुम हां दए आंय, ऊको पालन करबो सिखाओ, और तको, मैं संसारी के आखिर लौ सदा तुमाए संग्गै आंव।