- मत्ती 15 - Bundeli Holy Bible

¹ तब यरूशलेम के कछु फरीसी और शास्त्री यीशु के ऐंगर आके कहन लगे।

² तोरे चेले पुरखन की रीतियन हां काय नईं मानत आंय, बे तो रोटी खाती बेरा हाथ नईं धोत?

³ ऊ ने उत्तर दओ, तुम अपनी रीतियन के लाने खुद परमेसुर के हुकुम कौ पालन काय नईं करत आव?

⁴ कायसे परमेसुर ने कई हती, कि अपने बाप और अपनी मताई कौ मान करियो: और जौन कोऊ बाप और मताई हां बुरओ कहे, बो मार डालो जाए।

⁵ पर तुम कहत आव, कि अगर कोऊ अपने बाप या मताई से कहे, कि जो कछु तोय से लाभ मोय पहुंच सकत हतो, बो परमेसुर हां चढ़ाओ जा चुको आय।

⁶ तो बो अपने बाप कौ आदर नईं करे, ई तरहां तुम ने अपनी रीतियन के लाने परमेसुर के बचन हां टार दओ।

⁷ हे कपटियो, यशायाह ने तुमाए लाने जा आगमवानी सही करी हती।

⁸ कि जे लोग होंठन से तो मोरो मान करत आंय, पर इन कौ मन मोसे दूर रहत आय।

⁹ और जे बेकार मोरी भक्ति करत आंय, कायसे मान्सन की रीतियन हां धरम के बचन बता के सिखात हैं।

¹⁰ और ऊ ने भीड़ हां अपने ऐंगर टेर के उन से कई, सुनो और समजो।

¹¹ जो मों में जात आय, बो मान्स हां अशुद्ध नईं करत, पर जो मों से बायरें कड़त आय, बो मान्स हां अशुद्ध करत आय।

¹² तब चेलन ने आके ऊसे कई, का तें जानत आय कि फरीसियन ने जौ बचन सुनके ठोकर खाई?

¹³ ऊ ने उत्तर दओ, हर पौधा जीहां मोरे स्वर्गीय बाप ने नईं लगाओ, उखाड़ दओ जै है।

¹⁴ उन हां रहन दो; बे अन्धी गैल बताबे वाले आंय: और अन्धरा अगर अन्धरा हां गैल बताए, तो दोई गड्ढे में गिर हैं।

¹⁵ जा सुन के, पतरस ने ऊसे कई, जा कनौत हम हां समजा दे।

¹⁶ ऊ ने कई, का तुम लोग अबै लौ नईं जाने।

¹⁷ का तुम नईं जानत, कि जो कछु मों में जात आय, बो पेट में जाके, और संडास में निकल जात है?

¹⁸ पर जो मों से कड़त आय, बो मन से कड़त आय, और बो मान्स हां अशुद्ध करत आय।

¹⁹ कायसे बुरए सोच, हत्या, व्यभिचार, भड़याई, लबरी गवाई और निन्दा मन से कड़त आय।

²⁰ जेई बातें आंय जौन मान्स हां अशुद्ध करत आंय, पर बिना हाथ धोए मान्स हां अशुद्ध नईं करत।

²¹ यीशु उते से कड़ के, सूर और सैदा के परगना में चलो गओ।

²² और हेरो, ऊ परगना की एक कनानी बईयर आई और चिल्लया के कहन लगी; हे पिरभू दाऊद की सन्तान, मोय पे दया कर, मोरी बिटिया हां दुष्ट आत्मा सता रई है।

²³ पर ऊ ने ऊहां कछु उत्तर नईं दओ, और चेले ऊके ऐंगर आके कहन लगे; ईहां पठैय दे; कायसे जा चीखत भई हमाए पाछें आत आय।

²⁴ ऊ ने उन से कई, मैं केवल इस्राएल के घराने की हिराई भई गाड़रन के ऐंगर पठैव गओ आंव।

²⁵ पर बो आई, और परनाम करके कहन लगी; हे पिरभू, मोरी मदद कर।

²⁶ ऊ ने ऊसे कई, लरका बिटियन की रोटी लैके कुत्तन के आंगू डारबो साजो नईंयां।

²⁷ ऊने कई, सांची आय पिरभू; पर कुत्ते भी तो मालक की मेज से गिरो भओ चूरचार खात आंय।

²⁸ तब यीशु ने कई, ऐ बईयर, तोरो भरोसा बिलात आय: जैसो तें चाहत आय, वैसई तोरे लाने होबै; और ऊ की बिटिया तुरतईं साजी हो गई।

²⁹ यीशु उते से निंग के, गलील की झील के तीरे गओ, और उते पहरवा पे चढ़के बैठ गओ।

³⁰ और बिलात लोग ऊके ऐंगर आए, और बे अपने संग्गै लंगड़े, लूले, अन्धरे, बौरे और बिलात औरन हां लैके आए; और उन हां ऊके गोड़ों में डार दओ, और ऊने उन हां साजो करो।

³¹ जब भीड़ ने हेरो, कि बौरा बोलत, लूला साजे होत, लंगड़े निंगत और अन्धरे हेरत आंय, तो लोगबाग अचम्भित भए और उन ने इस्राएल के परमेसुर की बड़ाई करी।

³² यीशु ने अपने चेलन हां ऐंगर टेर के कई, मोय भीड़ पे तरस आत आय; कायसे जे लोग तीन दिना से मोरे संग्गै आंय और इन के ऐंगर खैबे हां कछु नईंयां; और मैं उन हां भूखो नईं पठैबो चाहत; कहूं ऐसो न होय कि बे गैल में थक के रह जाबें।

³³ चेलन ने ऊसे कई, हम हां ई सूनी जांगह में ऐसी भीड़ हां अफराबे के लाने, इतनी बिलात रोटीं किते से मिल हैं?

³⁴ यीशु ने उन से कई, तुमाए ऐंगर कितेक रोटियां आंय? उन ने कई; सात और तनक सी हल्की मछरियां।

³⁵ तब ऊ ने भीड़ हां धरती पे बैठवे कौ हुकुम करो।

³⁶ फिन ऊ ने सात रोटियां और मछरियन हां लओ और धन्यवाद करके तोड़ो और चेलन हां देत गओ; और चेलन ने भीड़ हां दओ।

³⁷ बे सब खाके अफर गए और बचे भए टुकड़न से सात टुकनियां भरके उठाईं।

³⁸ और खाबे वारे बईयरन और लड़ेर हां छोड़ के चार हज़ार मन्सेलू हते।

³⁹ तब भीड़ हां विदा करके, बो नाव पे चढ़ गओ, और मगदन देश के हल्कन में आओ।