- मत्ती 13 - Bundeli Holy Bible

¹ ओई दिना यीशु घर से बायरें कड़के झील किनारे जा बैठो।

² और ऊके ऐंगर ऐसी भीड़ जमा भई कि बो नाव पे चढ़के बैठ गओ, और सबरी भीड़ किनारे ठांड़ी रई।

³ ऊने जा कहत भए उन से कनौत में बिलात बातें कईं, कि हेरो, एक बीज बोवेवारो बीज बोवे कड़ो।

⁴ बोत बेरा कछु बीज गैल किनारे गिरे और चिरईयन ने ऊहां आके चुग लओ।

⁵ कछु पथरावारी धरती पे गिरे, ऊहां बिलात माटी नईं मिली और जड़ें गहरी माटी न होबे से जल्दी ऊ ग आईं।

⁶ परन्त सूरज कड़वे पे बे घाम से झुलस गए, और जड़ न पकड़बे से सूख गए।

⁷ और कछु बीज जरियन में गिरो, और जरियन ने बढ़के उन हां दबा लओ।

⁸ पर कछु बीज उमदा धरती में गिरे, और फल लाए, कोऊ सौ गुनो, कोऊ साठ गुनो, और कोऊ तीस गुनो।

⁹ जीके कान होबें बो सुन ले।

¹⁰ और चेलन ने ऐंगर आके ऊसे कई, तें उन से कनौत में बातें काय करत आय?

¹¹ ऊने उन हां उत्तर दओ, तुम हां सरग के राज्य के भेदन की समझ दई गई आय, पर उन हां नईं।

¹² कायसे जीके ऐंगर आय, ऊहां और दओ जै है; और ऊके ऐंगर बिलात हो जै है; पर जीके ऐंगर नईंयां, ऊसे बो भी जौन ऊके ऐंगर आय, बो भी लै लओ जै है।

¹³ मैं उन से कनौत में बातें ई लाने करत आंव, कि बे हेरत भए भी नईं हेर पात; और सुनत भए भी नईं सुन पात; और नईं समझत।

¹⁴ और उन के बारे में यशायाह की जा आगमवानी पूरी होत आय, कि तुम कानों से सुनत तो रै हौ, पर न समझ पे हौ; और हेरत तो रै हौ, पर तुम हां न सूझ है।

¹⁵ कायसे इन लोगन कौ मन कठोर हो गओ आय, और बे अपने कानों से ऊं चो सुनत आंय और उन ने अपनी आंखन हां मूंद लओ आय; कहूं ऐसो न होए कि बे अपनी आंखन से हेरें, और कान से सुनबें और मन से समझें, और फिर जाबें, और मैं उन हां साजो कर हों।

¹⁶ मगर धन्य आंय तुमाई आंखें, कि बे हेरतीं आंय; और तुमाए कान, कि बे सुनत आंय।

¹⁷ कायसे मैं तुम से सांची कहत आंव, कि बिलात आगमवकतन और धर्मियन ने चाहो कि जौन बातें तुम हेरत आव, ऊहां हेरें, पर न हेरीं; और जौन बातें तुम सुनत आव, सुनो, पर न सुनीं।

¹⁸ अब बोवेवारे की कनौत सुनो।

¹⁹ जो कोऊ राज्य कौ बचन सुन के ऊहां नईं समझत, जो कछु ऊके मन में बोओ गओ हतो, ऊहां बो दुष्ट छुड़ा लै जात आय; जौ ओई आय, जो गैल किनारे बोओ गओ हतो।

²⁰ और जो पथरीली धरती पे बोओ गओ हतो, जे बो आंय, जौन बोलन हां सुनत आंय और तुरतईं खुसी के साथ मान लेत आंय।

²¹ फिन भी अपने मन में गहरी जड़ नईं धरत और तनक बेरा कौ आय, और जब बचन के लाने दुख सताव होत आय, तो तुरतईं ठोकर खात आय।

²² और जौन बीजा जरियन में बोओ गओ हतो, बो जौ आय, जौन बचन हां सुनत आय, पर संसार की सोच और धन कौ धोखा बचन हां दबात आय, और बो फल नईं लात।

²³ जौन उमदा धरती मैं बोओ गओ, बो जौ आय, जौन बचन हां सुनके समझत आय, और फल लात आय, कोऊ सौ गुनो, कोऊ साठ गुनो, और कोऊ तीस गुनो।

²⁴ ऊने उन हां एक और कनौत कई कि सरग कौ राज्य ऊ मान्स के जैसो आय, जीने अपने खेत में उमदा बीज बोओ।

²⁵ पर जब लोगबाग सो रए हते, तब ऊको बैरी आओ और गेंहूं के बीच में जंगली बीज बोके चलो गओ।

²⁶ मगर जब गेंहूं पीक आओ और ऊमें बालें आईं, तो जंगली दाने सोई दिखाई दए।

²⁷ तब चाकरन ने आके मालक से कई, मालक, का तेंने अपने खेत में उमदा बीज नईं बोआए हते? फिन ऊमें जंगली घांस किते से आई?

²⁸ ऊने उन से कई, जौ कोनऊ बैरी कौ काम आय। चाकरन ने ऊसे कई, का तें चाहत आय, कि हम जाके उन हां काड़ लेबें।

²⁹ ऊने कई, ऐसो नईं, कहूं ऐसो न होबै कि जंगली घांस काड़त बेरा तुम ऊके संग्गै गेंहूं भी काड़ देओ।

³⁰ काटबे की बेरा लौ दोई हां संग्गै बढ़न देओ, और काटबे की बेरा मैं काटबेवारन से कै हों; पेंला जंगली घांस काड़ के बारबे के लाने ऊके गट्ठा बांध लेओ, और गेंहूं हां मोरे खलिहान में इकट्ठो करो।

³¹ ऊने एक और कनौत कहके उन से कई; सरग कौ राज्य राई के दाने घांई आय, जीहां एक मान्स ने लैके अपने खेत में बो दओ।

³² जौ सब दानों से हल्को होत आय पर जब बढ़ जात आय तो सब साग पात से बड़ो हो जात है; और ऐसो पेड़ बन जात आय, कि आकास के पंछी आके ऊकी डारियन पे बसेरा करत आंय।

³³ ऊने एक और कनौत उन से कई; कि सरग कौ राज्य खमीर के घांई आय, जीहां एक बईयर ने तीन पसेरी आटे में मिला दओ और बो सब खमीर हो गओ।

³⁴ यीशु ने जे सब बातें कनौत में कई, और बो कनौत के बिना उन से कछु नईं कैत हतो।

³⁵ कि जो बचन आगमवकता द्वारा कहो गओ हतो, बो पूरो होबे कि मैं कनौत में बोलबे हां अपनो मों खोल हों: मैं उन बातन हां बोल हों, जौन जगत के रचबे की बेरा से लुकी हतीं।

³⁶ फिन बो भीड़ हां छोड़के घरै आओ, और ऊके चेला ऊके ऐंगर आके कैन लगे, खेत के जंगली दाने की कनौत हम हां समझा दे।

³⁷ ऊने उन हां उत्तर दओ, उमदा बीज बोवेवारो मान्स कौ पूत आय।

³⁸ खेत संसार आय, उमदा बीज राज्य की सन्तान आंय, और जंगली बीज शैतान की सन्तान आंय।

³⁹ और बैरी जीने ऊहां बोओ बो शैतान आय; कटनी ई जुग कौ अन्त आय: और फसल काटबेवारे सरगदूत आंय।

⁴⁰ जैसे जंगली दाने इकट्ठे करके आगी में बार दए जात आंय, ओई तरहां जगत के अन्त में भी हुईये।

⁴¹ मान्स कौ पूत अपने सरगदूतन हां पठै है, और बे ऊके राज्य में से सब कुकर्मियन हां इकट्ठो कर हैं।

⁴² और उन हां आगी के कुण्ड में डाल हैं, उते रोबो और दांत पीसबो हुईये।

⁴³ तब धर्मी अपने बाप के राज्य में सूरज के घांई चमक हैं; जीके कान होबें बो सुन लेबे।

⁴⁴ सरग कौ राज्य खेत में लुके भए धन घांई आय, जी हां कोऊ मान्स ने पाओ और लुका दओ, और खुस होकें ऊने अपनो सब कछु बेंच दओ और ऊ खेत हां मोल लै लओ।

⁴⁵ और सरग कौ राज्य मोतियन हां खोजबेवारे एक सेठ के घांई आय।

⁴⁶ जब ऊहां एक अनमोल मोती मिलो तो ऊने जाके अपनो सब कछु बेंच दओ और ऊ मोती हां मोल लै लओ।

⁴⁷ और सरग कौ राज्य ऊ बड़े जाल के घांई आय, जौन समन्दर में डालो गओ, और हर तरहां की मछरियन हां समेंट लियाओ।

⁴⁸ और जब जाल भर गओ, तो लोगबाग ऊहां घाट पे खेंच लाए, और उन ने साजी मछरियन हां तो टुकनियों में इकट्ठो करो और बुरई हां मेंक दओ।

⁴⁹ ई जुग के अन्त में ऐसई हुईये: सरगदूत आके पापियन हां धर्मियन से अलग कर हैं, और उन हां आग के कुण्ड में डार दें हैं।

⁵⁰ जिते रोबो और दांत पीसबो हुईये।

⁵¹ का तुमाए समझ में जे सब बातें आ गईं?

⁵² उन ने उत्तर दओ, हओ; और ऊने उन से कई, ई लाने हर एक शास्त्री, जौन सरग के राज्य की सीख पा चुको आय, ऊ घरईया के घांई आय जौन अपने घर से नई और पुरानी बस्त काड़त आय।

⁵³ जब यीशु जे सब कनौतें कह चुको, तो उते से चले गए।

⁵⁴ बो अपने देस में आके लोगन हां उन के प्रार्थनाघरन में सन्देस देन लगो; और बे अचम्भित होकें कहन लगे; कि ई मान्स हां ऐसो ज्ञान और सक्ति के काम किते से मिले?

⁵⁵ का जौ बढ़ई कौ पूत नईंयां? का ईकी मताई कौ नाओं मरियम और ईके भईयन कौ नाओं याकूब और यूसुफ और शमौन और यहूदा नईंयां?

⁵⁶ और का ईकी सब बहनें हमाए बीच में नईं रैतीं? फिन ई मान्स हां जौ सब किते से मिलो?

⁵⁷ और ऊसे लोगन हां बुरओ लगो, पर यीशु ने उन से कई, आगमवकता कौ अपने देस और अपने घर हां छोड़ और कहूं निरादर नईं होत।

⁵⁸ और ऊने उते उन के अबिसवास के काजें चमत्कार के बिलात काम नईं करे।