- यहोशू 5 - Bundeli Holy Bible

इस्राएलियन कौ खतना

¹ जब यरदन के पच्‍छिम कुदाईं रैबेवारे एमोरियों के सबरे राजाओं ने, और समंदर के लिगां रैबेवारे कनानियों के सबरे राजाओं ने जौ सुनो, कि यहोवा परमेसुर ने इस्राएलियन के पार होबे लौ उनके सामूं सें यरदन कौ पानूं हटाकें सुखा दओ आय, तब इस्राएलियन के डर के मारें उनकौ मन घबरा गओ, और उनके जी में जी नें रओ।

² ऊ बेरा यहोवा परमेसुर ने यहोशू सें कई, “चकमक की छुरियां बनवाकें दूसरी बेर इस्राएलियन कौ खतना करा दे।”

³ तब यहोशू ने चकमक की छुरियां बनवाकें खलड़िया नाओं टीले पै इस्राएलियन कौ खतना कराओ।

⁴ यहोशू ने जौन खतना कराओ, ईकौ कारन जौ आय, कि जितेक लड़ाई के जोग मान्‍स मिस्र सें कड़े हते बे सबरे मिस्र सें कड़बे पै जंगल की गैल में मर गए हते।

⁵ जौन मान्‍स मिस्र सें कड़े हते उन सबकौ तौ खतना हो गओ हतो, परन्‍त जितेक मिस्र सें कड़बे पै जंगल की गैल में पैदा भए उनमें सें कोऊ कौ खतना नें भओ हतो।

⁶ कायसे इस्राएली तौ चालीस साल लौ जंगल में भटकत रए, जब लौ बा पूरी जाति के मान्‍सन, मतलब जितेक लड़ाई के जोग मान्‍स मिस्र सें कड़े हते बे नास नें हो गए, कायसे उनोंरन ने यहोवा परमेसुर की नें मानी हती; ई लाने यहोवा परमेसुर ने कौल खाकें उनसें कई हती, कि जौन देस मैंने तुमाए पुरखों सें कौल खाकें तुमें दैबे हों कई हती, और ऊमें दूध और मेंपर की धाराएं बहत आंय, ऊ देस मैं तुम हों नईं दिखाबे कौ।

⁷ तौ उन मान्‍सन के मोंड़ा जिनहों यहोवा परमेसुर ने उनकी जागां पै पैदा करो हतो, उनकौ खतना यहोशू सें कराओ, कायसे गैल में उनके खतना नईं होबे के कारन बे बिना खतना के हते।

⁸ जब बा पूरी जाति के मान्‍सन कौ खतना हो चुको, तब बे चंगे हो जाबे लौ अपनी अपनी जागां पै छावनी में रए।

⁹ तब यहोवा परमेसुर ने यहोशू सें कई, “तुमाई नाओंधराई जौन मिस्रियों में भई आय ऊहों मैंने आज दूर करी आय।” ई कारन ऊ जागां कौ नाओं आज के दिना लौ गिलगाल पड़ो आय।

फसह मनाबो

¹⁰ ई लाने इस्राएली गिलगाल में डेरे डाले रए, और उनोंरन ने यरीहो के लिगां, अराबा में पूरनमासी हों मतलब पैले मईना के चऊदवें दिना की संझा बेरा फसह मानो।

¹¹ फसह के दूसरे दिना बे ऊ देस की फसल में सें अखमीरी रोटी और ओई दिना सें भुनो भओ दाना खान लगे।

¹² जौन दिना बे ऊ देस की उपज में सें खान लगे, ओई दिना के भुन्‍सारे सें मन्‍ना गिरबो बन्‍द हो गओ, और इस्राएलियन हों आंगू फिन कभऊं मन्‍ना नें मिलो, परन्‍त ऊ साल उनोंरन ने कनान देस की उपज में सें खाओ।

यहोशू और तलवार लएं भओ एक मान्‍स

¹³ जब यहोशू यरीहो के लिगां हतो तब ऊने अपनी आंखें उठाईं, और का हेरो, कि हाथ में नंगी तलवार लएं भए एक मान्‍स सामूं ठांड़ो आय; और यहोशू ने ऊके लिगां जाकें पूंछो, “का तें हमाई कोद कौ आय, या हमाए बैरियन की कोद कौ?”

¹⁴ ऊने उत्तर दओ, “नईं, बल्‍कि मैं यहोवा परमेसुर की सेना कौ परधान होकें अभईं आओ हों।” तब यहोशू ने पृथ्‍वी पै मों के बल गिरकें प्रणाम करो, और ऊसें कई, “अपने दास के लाने मोरे यहोवा परमेसुर कौ का हुकम आय?”

¹⁵ यहोवा परमेसुर की सेना के परधान ने यहोशू सें कई, “अपनी पनईयां गोड़ों सें उतार डाल, कायसे जौन जागां पै तें ठांड़ो आय बा पवित्र आय।” तब यहोशू ने बैसई करो।