- यहोशू 3 - Bundeli Holy Bible

इस्राएलियन कौ यरदन पार करबो

¹ यहोशू भुन्‍सारे उठो, और सबरे इस्राएलियन हों संगै लैकें शित्तीम सें कड़कें यरदन के किनारे आओ; और बे पार उतरबे सें पैलां उतईं टिक गए।

² तीन दिना के बाद सरदारों ने छावनी के मजारें जाकें,

³ परजा के मान्‍सन हों जौ हुकम दओ, “जब तुम हों अपने यहोवा परमेसुर की बाचा कौ संदूक और ऊहों उठाए भए लेवीय याजक सोई दिखाई पड़ें, तब अपनी जागां सें कड़कें ऊके पाछें पाछें चलियो,

⁴ परन्‍त ऊके और तुमाए मजारें दो हजार हाथ (लगभग नौ सौ मीटर) के बरोबर अंतर रए; तुम बक्‍सा के लिगां नें जईयो। जीसें तुम हेर पाओ कि कौन गैल सें तुम हों निंगनें आय, कायसे अब लौ तुम ई गैल पै होकें नईं निंगे।”

⁵ फिन यहोशू ने परजा के मान्‍सन सें कई, “तुम अपने आपहों पवित्तर करो; कायसे भ्‍याने के दिना यहोवा परमेसुर तुमाए मजारें आस्‍चर्यकर्म करहै।”

⁶ तब यहोशू ने याजकों सें कई, “बाचा कौ संदूक उठाकें परजा के आंगू आंगू निंगो।” तब बे बाचा कौ संदूक उठाकें आंगू आंगू निंगे।

⁷ तब यहोवा परमेसुर ने यहोशू सें कई, “आज के दिना सें मैं सब इस्राएलियन के सामूं तोरी बढ़ाई करबो सुरू करहों, जीसें बे जान लैबें कि जैसे मैं मूसा के संगै रैत हतो बैसई मैं तोरे संगै सोई आंव।

⁸ तें बाचा कौ संदूक के उठाबेवारे याजकों हों जौ हुकम दे, ‘जब तुम यरदन के पानूं के किनारे पोंचो, तब यरदन में ठांड़े रईयो’।”

⁹ तब यहोशू ने इस्राएलियन सें कई, “लिगां आकें अपने यहोवा परमेसुर के बचन सुनो।”

¹⁰ यहोशू कैन लगो, “ईसें तुम जान लैहौ कि जीयत यहोवा परमेसुर तुमाए मजारें आय, और ऊ तुमाए सामूं सें पक्‍कौ कनानियों, हित्तियों, हिब्‍बियों, परिज्‍जियों, गिर्गाशियों, एमोरियों और यबूसियों हों उनके देस में सें काड़ दैहै।

¹¹ हेरो, पृथ्‍वी भर के यहोवा परमेसुर की बाचा कौ बक्‍सा तुमाए आंगू आंगू यरदन में जा रओ आय।

¹² ई लाने अब इस्राएल के गोत्रों में सें बारह मान्‍सन हों चुन लेओ, बे एक एक गोत्र में सें एक मान्‍स होए।

¹³ जौन बेरा पृथ्‍वी भर के यहोवा परमेसुर की बाचा कौ बक्‍सा उठाबेवारे याजकों के गोड़े यरदन के पानूं में पड़हें, ऊ बेरा यरदन कौ ऊपर सें बहत भओ पानूं थम जैहै, और ढेर होकें ठैरो रैहै।”

¹⁴ ई लाने जब परजा के मान्‍सन अपने डेरों सें यरदन पार जाबे कड़े, और याजक बाचा कौ बक्‍सा उठाए भए परजा के आंगू आंगू निंगे,

¹⁵ और बक्‍सा के उठाबेवारे यरदन पै पोंचे, और बक्‍सा के उठाबेवारे याजकों के गोड़े यरदन के पानूं में डूब गए (यरदन कौ पानूं तौ कटनी की बेरा के सब दिना अपने तट के ऊपर ऊपर बहो करत आय),

¹⁶ तब जौन पानूं ऊपर की कोद सें बहो आत हतो ऊ बेजा दूर, मतलब आदाम नगर के लिगां जौन सारतान के लिगां आय रुककें एक ढेर हो गओ, और भींत जैसो उठो रओ, और जौन पानूं अराबा कौ तलाब जौन खारो तलाब भी कहात आय, ऊकी कोद बहो जात हतो, ऊ पूरी तरहां सें सूख गओ; और परजा के मान्‍सन यरीहो के सामूं पार उतर गए।

¹⁷ याजक यहोवा परमेसुर की बाचा कौ बक्‍सा उठाए भए यरदन के मजारें पोंचकें सूखी धरती पै स्‍थर ठांड़े रए, और सबरे इस्राएली सूखी-सूखी धरती सें पार उतरत रए, अखीर में बे पूरी जाति के मान्‍सन यरदन पार हो गए।