- यहोशू 2 - Bundeli Holy Bible

यरीहो कौ भेद लओ जाबो

¹ तब नून के मोंड़ा यहोशू ने दो भेदियों हों शित्तीम सें चुपके सें पठै दओ, और उनसें कई, “जाकें ऊ देस और यरीहो हों हेरो।” तुरतईं बे चल दए, और राहाब नाओं बेस्‍या के घर जाकें सो गए।

² तब कोऊ ने यरीहो के राजा सें कई, “हेरो, आज रात कछु इस्राएली हमाए देस कौ भेद लैबे हों इतै आए भए आंय।”

³ तब यरीहो के राजा ने राहाब के लिगां एैसो कहला पठैओ, “जौन मान्‍सन तोरे इतै आएहें उनहों बायरें ल्‍या; कायसे बे पूरे देस कौ भेद लैबे हों आए भए आंय।”

⁴ ऊ बईयर ने दोई मान्‍सन हों छिपा रखो; और ई तरहां कई, “मोरे लिगां कई मान्‍स आए तौ हते, परन्‍त मैं नईं जानत कि बे कितै के हते;

⁵ और जब अंधयारो भओ, और फाटक बन्‍द होन लगो, तब बे कड़ गए; मोए पता नईयां कि बे कितै गए; तुम फुरती करके उनकौ पीछा करौ तौ उनहों पकड़ पाहौ।”

⁶ ऊने उनहों घर की छत पै चढ़ाकें सनई की लकड़ियों के तरें छिपा दओ हतो जो ऊने छत पै सजाकें रखी हतीं।

⁷ बे मान्‍सन तौ यरदन की गैल पकड़कें उनकी खोज में घाट लौ चले गए; और जैसई उनहों खोजबेवारे फाटक सें कड़े बैसई फाटक बन्‍द करो गओ।

⁸ जे लेट नें पाए हते कि बा बईयर छत पै इनके लिगां जाकें,

⁹ इन मान्‍सन सें कैन लगी, “मोए तौ पक्‍को आय कि यहोवा परमेसुर ने तुमोंरन हों जौ देस दओ आय, और तुमाओ डर हमोंरन के मन में भर गओ आय, और ई देस के सबरे रैबेवारे तुमाए कारन घबरा रए आंय।

¹⁰ कायसे हमने सुनो आय कि यहोवा परमेसुर ने तुमाए मिस्र सें कड़ती बेरां तुमाए सामूं लाल समंदर कौ पानूं सुखा दओ। और तुमोंरन ने सीहोन और ओग नाओं यरदन पार रैबेवारे एमोरियों के दोई राजाओं कौ सत्‍यानास कर दओ आय।

¹¹ जौ सुनतई हमाओ मन पिघल गओ, और तुमाए कारन कौनऊं के जी में जी नें रओ। कायसे तुमाओ यहोवा परमेसुर ऊपर के आकास कौ और नेंचें की पृथ्‍वी कौ यहोवा परमेसुर आय।

¹² अब मैंने जो तुम पै दया करी आय, ई लाने मोए सें यहोवा परमेसुर की कौल खाओ कि तुम भी मोरे बाप के घराने पै दया करहौ, और ईकी सच्‍ची चिनारी मोए देओ,

¹³ कि तुम मोरे मताई-बाप, भईयों और बहनों हों, और जो कछु उनकौ आय उन सब हों भी जियत रख छोड़ो, और हम सब कौ प्रान मरबे सें बचाहौ।”

¹⁴ तब उन मान्‍सन ने ऊसें कई, “जदि तें हमाई जा बात कौनऊं पै परगट नें करे, तौ तुमाए प्रान के बदले हमाओ प्रान जाए; और जब यहोवा परमेसुर हमें जौ देस दैहै, तब हम तोरे संगै किरपा और सच्‍चाई सें बरताव करहें।”

¹⁵ तब राहाब जीकौ घर सहरपनाह पै बनो हतो, और बा उतईं रैत हती, ऊने उनहों जंगला सें गिरमा के बल उतारकें नगर के बायरें कर दओ।

¹⁶ ऊने उनसें कई, “पहड़वा हों चले जाओ, एैसो नें होए कि खोजबेवारे तुम हों पाएं; ई लाने जब लौ तुमाए खोजबेवारे लौट नें आएं तब लौ, मतलब तीन दिना उतईं छिपे रईयो, ऊके बाद अपनी गैल लईयो।”

¹⁷ उनोंरन ने ऊसें कई, “जौन कौल तेंने हम हों खिलाई आय ऊके बारे में हम तौ निरदोस रैहें,

¹⁸ सुन, जब हमोंरें ई देस में आहें, तब जौन जंगला सें तेंने हम हों उतारो आय ऊमें जाई लाल रंग के सूत की डोरी बांध दईयो; और अपने मताई-बाप, भइयों, बल्‍कि अपने बाप के सबरे घराने हों ऐई घर में अपने लिगां इकट्ठो करके रखियो।

¹⁹ तब जौन कोऊ तोरे घर के दोरे सें बायरें कड़े, ऊके खून कौ दोस ओई की मूंड़ पड़है, और हम निरदोस ठैरहें: परन्‍त जदि तोरे संगै घर में रैत भए कोऊ पै कोऊ कौ हाथ पड़े, तौ ऊके खून कौ दोस हमाई मूंड़ पै पड़है।

²⁰ फिन जदि तें हमाई जा बात कोऊ पै परगट करे, तौ जौन कौल तेंने हम हों खिलाई आय ऊसें हम स्‍वतंत्र ठैरहें।”

²¹ ऊने कई, “तुमाए बचनों के अनसार होबै।” तब ऊने उनहों बिदा करो, और बे चले गए; और ऊने लाल रंग की डोरी हों जंगला में बांध दओ।

²² बे जाकें पहड़वा पै पोंचे, और उतै खोजबेवारों के लौटबे लौ, मतलब तीन दिना लौ रए; और खोजबेवारे उनहों पूरी गैल में ढूंढ़त रए और कऊं नें पाओ।

²³ तब बे दोई मान्‍सन पहड़वा सें उतरे, और पार जाकें नून के मोंड़ा यहोशू के लिगां पोंचकें जो कछु उनपै बीतो हतो ऊकौ बखान करो।

²⁴ उनोंरन ने यहोशू सें कई, “पक्‍कौ यहोवा परमेसुर ने ऊ पूरो देस हमाए हाथ में कर दओ आय; फिन ईके अलावा ऊके सबरे रैबेवारे हमाए कारन घबरा रए आंय।”